Esyonyimbo 31 - Nouveau Testament et Psaumes en Ndandi Version 1962

Eririra neripipa

Oko mwimbiriri mukulu. Sauma ya Dawidi.

¹ Oku we, MUKAMA, ko ngasagira Suleke ngitwa esisoni na kera: Unyilamaye omo ritunganene ryawe.

² Unyitegere okutu kwawe; unyilamaye luba: Ubye eribwe ryage ryamaka. Enyumba iwatire yerindamya.

³ Kusangwa uri ibwe ryage nobusayiro bwage; Neryo busana nerina ryawe unyisondole nerinyikangya enzira.

⁴ Unyipure omo kitego ekyo banyitega bubi-sobiso; Kusangwa uri busayiro bwage ahawatire.

⁵ Omo byala byawe ngahira ekirimu kyage: Uwe MUKAMA, wabirinyitongolya, uwe Mungu wakwenene.

⁶ Ngakwa ekiniga abakaganiraya bityabitya byamabihi: Nikwa ingye ngayiketera oMUKAMA.

⁷ Nasyatsema neritsanga omo lwanzo lwawe lubuya; Kusangwa wabirilebya malige wage: wabiriminya amalige womutima wage;

⁸ Suritanyikingira omo byala byenzigu yage; Wabirihira ebisandu byage ahagalihire.

⁹ Uwe MUKAMA, unyiganyire, kusangwa nyiri omo bulige: Eriso ryage rikabonda omo bulige, nekirimu nomubiriwage.

¹⁰ Kusangwa engebe yage ikabulira omo bulige, Nemituta yage nerihumulikana: Akagala kage kakabula busana nebibi byage, Namakuha wage akananuka.

¹¹ Nabiribya ekiponirwe nesyonzigu syage syosi, Noko balikyetu ekiponirwe kutsibu, Kandi ekyeriubahya oko banyasi: Abakanyilolako omo nzira bakanyisaga.

¹² Nabiribiriranwa ngoyu holire oyu teswibukawa: Nyiri nge nyungu isatikire.

¹³ Nabiriowa erisiningula ryabangi, Obuba oko mbande syosi: ibakaya embita erinyita, Bakaganiraya erilusya engebe yage.

¹⁴ Nikwa monayiketera we, uwe MUKAMA. Monabuga nyiti, uri Mungu wage.

¹⁵ Esyondambi syage siri omo byala byawe Unyilamaye omo byala byesyonzigu syage, noko abo bakanyendereraya.

¹⁶ Ukoleraye omugombe wawe obusu bwawe: Unyilamaye omo lwanzo lubuya lwawe.

¹⁷ Uwe MUKAMA, suleke ngitwa esisoni; kusangwa ngakulakira: Abakolanabi bitawe esisoni, babye bukutu eKurimu.

¹⁸ Eminywa eyikabiha ibye mumo, Abakahula abatunganene omwipona, Haguma neriyihamya neritindakenga.

¹⁹ Obubuya bwawe ni bunene obo Ukabikira abakakubaha, Obo wabirikola busana nabo bakakusagirako, Embere syabagala babandu!

²⁰ Omo bubisamo bwembere syawe wasyabisabo oko mbitanyibi yabandu: Wasyabikabo bubi-sobiso omo nyumba oko malwa wesyondimi.

²¹ Omuyisa abye oko MUKAMA: Kusangwa abirinyikangya olwanzo luwe lubuya lweriswekera omo muyi awatire.

²² Nikwa ingye monabuga lubaluba, Nabiritubwa erilwa oko meso wawe: Nikwa mowowa omulenge werigo ryage Omugulu nakulakira.

²³ Mwanze oMUKAMA, inywe ababuyirire buwe bosi: OMUKAMA akategaya abatesiganiraya, Akahemba ndeke abakakola eriyihamya.

²⁴ Mubye na maka, nomutima wenyu asike, Inywe bosi mukalinda oMUKAMA omo maha.