Esyonyimbo 22 - Nouveau Testament et Psaumes en Ndandi Version 1962

Obulige, neripipa

Oko mwimbiriri mukulu; ngengabi yengyakya-ngyakya. Sauma ya Dawidi.

¹ Mungu wage, Mungu wage, busana naki wabirinyisigania kwehi? Busana naki uri hali okwinyiwatikya, oko binywa byerisimba ryage kwehi?

² Uwe Mungu wage, ngalaka omwitungi, nikwa surinzubiraya; Kandi omo kiro, nikwa sindibana eriluhuka.

³ Nikwa ubuyirire, Wikere omwipipa ryaIsraeli.

⁴ Abotata wetu mobayiketera we; Mobayiketa, nawe mowalamyabo.

⁵ Mobakulakira, mobalamibwa; Mobayiketera we, mobatitwa esisoni.

⁶ Nikwa ingye ndi munyole, sindi mundu; Bandu bakanyisekereraya, kandi bandu bakanyipona.

⁷ Abosi abakanyilangira bakanyiseka, Bakanyineneulaya, bakanyitsingiraya emitwe yabo;

⁸ Bati, mwayiha oko MUKAMA; amutongolaye, Amulamaye, kusangwa akamutsemera!

⁹ Nikwa niwe wanyilusaya omo lubutiro; Wanyibika oko mabere wa koyo wage.

¹⁰ Nagusawa okowe eritsuka okwibutwa ryage Uri Mungu wage eritsuka omugulu koyo anyibuta.

¹¹ Subye hali kwingye, kusangwa obulige buri hakuhi Kandi sihari oweriwatikya.

¹² Esyonume nyingi sikandimbako, Esyonume syamaka syaBasani sikandimbako;

¹³ Bakanyitandira amuno wabo, Ngendale eyikasunza neriruruma.

¹⁴ Ngutawa nga magetsi, Amakuha wage gosi akalegeya; Omutima wage ari ngebisese, Akanyenyeta omwisi wekikuba kyage;

¹⁵ Akagala kage kakuma ngoluyo, Nolulimi lwage lukamatire oko mikese; Wabirinyihira omo lututu lwoluholo.

¹⁶ Kusangwa esyombwa sikandimbako; Endeko ya bakolanabi ikandimbako; Babiritobola ebyala byage nebisandu byage—

¹⁷ Ngatoka eriganza amakuha wage gosi— Bakanyitungerera nerinyiharangurira ameso;

¹⁸ Bakagaba esyongimba syage omukati-kati kabo, Bakakangira obukanga busana nekanzo yage.

¹⁹ Nikwa uwe, oMUKAMA, sunyibyeko hali! Uwe eriwatikya ryage, wanguhe erinyiwatikya!

²⁰ Ulamaye ekirimu kyage oko muyari, Nengebe yage oko maka wembwa!

²¹ Unyilamaye omo buno bwendale, Ega, oko mahembe wesyonganda wabirinyisubirya.

²² Nasyakanirya erina ryawe oko bagala betu; Omukati-kati kendeko nasyakupipa;

²³ Inywe abakubaha oMUKAMA, mumupipe! Inywe bosi abagala beYakobo mumukenge, Inywe olubuto lwa Israeli mumubahe!

²⁴ Kusangwa siaritapona kutse erikwa esyonye amalige wabakagalawa; Siaritamubisa obusu buwe, Nikwa mwamowa omugulu amulakira.

²⁵ Okuwe hakalwa eripipa ryage omo ndeko nene; Nasyahikania erilahirya ryage embere syabakamubaha.

²⁶ Abakagalawa basyarya ibuguta; Abakamusonda-sonda basyapipa oMUKAMA! Emitima yenyu ibyeho kera na kera!

²⁷ Esyonduli syosi sye kihugo syasibuka neribindukira oMUKAMA; Nebitunga byosi byebihanda byasyakukama embere syawe.

²⁸ Kusangwa eritabala ni ryoMUKAMA, Asyatabala endata oko bihanda.

²⁹ Abosi abanenehire abe kihugo basyarya neriunama; Abosi abakandagala omo lututu, basyunama embere siwe, Noyu tetoka eribika ekirimu kiwe okwibyaho.

³⁰ Olubuto lwasyamukolera; Abandu basyakanirya oMUKAMA oko lulengo olukasa,

³¹ Basyasa nerikanirya eritunganene riwe Oko bandu abakandisyabutwa, kwabirikolakyo.