Esyonyimbo 119 - Nouveau Testament et Psaumes en Ndandi Version 1962

Olukengerwa nerisaba busana nekinywa kyoMungu

¹ Omuyisa ari nabakahikana omo nzira, Abakalendera omo bihano byoMUKAMA.

² Omuyisa ari mabakabika eritegeka riwe, Abakamusonda-sonda nomutima gosi.

³ Ega, abatekola bitatunganene; Abakalendera mo syonzira siwe.

⁴ Wabiritegeka ebihano byawe, Itwakwamabyo nomuhwa.

⁵ Kumbe esyonzira syage sisikire! Erikwama ebihano byawe!

⁶ Neryo ininditwa esisoni, Namakenga ebihano byawe byosi.

⁷ Ngandikuha ewasingya nomutima owatunganene, Omugulu namabiga eritswera ryawe eritunganene

⁸ Nasyakenga ebihano byawe: Sunyisiganaye kundu.

⁹ Omulwana asyerya enzira yiwe yumuki kwehi? Busana nerikenga eKinywa kyawe ngoko kiri.

¹⁰ Nabirikusonda-sonda nomutima wage gosi: Suleke ngagalaganda oko bihano byawe.

¹¹ eKinywa kyawe nabiribika omo mutima wage, Isinangakola nabi kuwe.

¹² Ubye nomuyisa, uwe oMUKAMA: Unyikangiriraye ebihano byawe.

¹³ Neminywa yage nabirikania Eritswera ryosi ryobuno bwawe.

¹⁴ Nabiritsema omo nzira yeritulago ryawe, Ngomo busoki bosi.

¹⁵ Nasyaganirya amategeko wawe, Nerikwama esyonzira syawe.

¹⁶ Nasyatsemera ebihano byawe: Sindiendibirirwa eKinywa kyawe.

¹⁷ Uyire ndeke nomugombe wawe, inatoka eribyaho; Ritya nasyakenga eKinywa kyawe.

¹⁸ Ribula ameso wage inalangira Emyatsi yeriswekera yemigambo yawe.

¹⁹ Ndi mugendi omo kihugo: Sunyibise amategeko wawe.

²⁰ Ekirimu kyage kikabunika busana nolukando Olo kiwite busana neritswera ryawe emigulu yosi.

²¹ Wabirikunga abakayianza babiritakirwa, Abakagalaganda oko amategeko wawe.

²² Unyilusaye okwihemulwa nokwiponwa; Kusangwa nabiribika eritulago ryawe.

²³ Abakulu mobikala nerinyitonga; Omugombe wawe mwaganirya ebihano byawe.

²⁴ Eritulago ryawe ni butseme bwage, Ni bandu bakanyihana.

²⁵ Ekirimu kyage kyabirimatira oko lututu: Unyisubaye nge kinywa kyawe ngoko kiri.

²⁶ Monakania esyonzira syage, nawe mowanyisubirya: Unyikangiriraye ebihano byawe.

²⁷ Unyiminyisaye enzira yamategeko wawe: Neryo nasyaganirya emibiri yawe yeriswekera.

²⁸ Ekirimu kyage kikatogonga busana nobulito: Unyisikaye nge kinywa kyawe ko kiri.

²⁹ Unyilusaye kwenzira yamabihi; Unyihe ebihano byawe omo lukogo.

³⁰ Nabiriyisoga enzira yeritindasiganirya: Eritswera ryawe nabirihira embere syage.

³¹ Ngamatana neritulago ryawe: Uwe MUKAMA, sunyite esisoni.

³² Nasyatibita omo enzira yamategeko wawe, Omugulu wasyagalihya omutima wage.

³³ Unyikangiriraye, uwe oMUKAMA, enzira yamategeko wawe; Nage nasyabikago erihika oko nduli.

³⁴ Unyihe eriminya, nage nasyateya ebihano byawe; Ega, nasyakengabyo nomutima wage gosi.

³⁵ Unyigenderaye omo nzira yamategeko wawe; Kusangwa go ngatsemera.

³⁶ Ubindulire omutima wage okwitulago ryawe, Butsira okwirumwa.

³⁷ Ubindule ameso wage okwilangira ebityabitya, Unzubaye omo nzira syawe.

³⁸ Usikaye eKinywa kyawe oko mugombe wawe, Ukwoyu kakubaha.

³⁹ Ubindule ekitsumi ekyo ngubaha; Kusangwa eritswera ryawe ni buya.

⁴⁰ Lebaya ndi nolukando busana nebihano byawe: Unyisubaye omo ngebe yeritunganene ryawe.

⁴¹ Olwanzo lwawe lubuya lunyihikeko, uwe oMUKAMA, Eryo ni lamya ryawe, nge kinywa kyawe ko kiri.

⁴² Neryo nasyabana erisubirya busana noyu kanyitsuma; Kusangwa ngayiketera eKinywa kyawe.

⁴³ Sulusaye eKinywa kyekwenene kyomo buno bwage; Kusangwa ngahira amaha okwitswera ryawe.

⁴⁴ Ritya nasyakenga ebihano byawe obutumbya Kera na kera.

⁴⁵ Nage nasyalendera neriyigenderya; Kusangwa nabirisonda-sonda amategeko wawe.

⁴⁶ Nasyabugira embere syabami ebyo watula, Sindiendisitwa esisoni.

⁴⁷ Nasyatsemera amategeko wawe, Ago nyanzire.

⁴⁸ Nasyasumba ebyala byage oko mategeko wawe, ago nyanzire; Nasyaganirya ebihano byawe.

⁴⁹ Wibuke eKinywa oko mugombe wawe, Kusangwa wabirileka inabya namaha.

⁵⁰ Eri ni sibikya omo bulige bwage; Kusangwa eKinywa kyawe kyamanyisubya omo buyingo.

⁵¹ Abakayianza babirinyikutya kutsibu: Sinditateruka oko migambo yawe.

⁵² Nabiriyibuka eritswera ryawe ya kera, uwe oMUKAMA, Nabiriyisibikya.

⁵³ Erikarama ryerihisya ryabirinyihamba, Busana na babi ababirisigania omugambo wawe.

⁵⁴ Ebihano byawe byabere nyimbo syage Omo nyumba yerihikiramo ryage.

⁵⁵ Uwe oMUKAMA, nabiribuka erina ryawe, omo kiro, Nabiribika omugambo wawe.

⁵⁶ Nabiribana eki, Kusangwa nabiribika ebihano byawe.

⁵⁷ OMUKAMA ni igabo ryage: Nabiribuga ko nasyabika ebinywa byawe.

⁵⁸ Monasaba eriganyira ryawe nomutima wage gosi: Unyiganyire nge kinywa kyawe ko kiri.

⁵⁹ Monaganirya esyonzira syage, Monabindula ebisandu byage okwitulago ryawe.

⁶⁰ Monanguha monda-sigalira, Eribika amategeko wawe.

⁶¹ Emikoba yababi yabiriyilingira kwingye; Sindibirirawa emigambo yawe.

⁶² Omo kati kanene ngandihangana erikuha ewasingya Busana neritswera ryawe ritunganene.

⁶³ Indi mulikyabo abakakubaha bosi, Nabakabika amahano wawe.

⁶⁴ Uwe oMUKAMA, e kihugo kyoswire nolwanzo lwawelubuya: Unyikangiriraye ebihano byawe.

⁶⁵ Wabiriyira omugombe wawe yondeke, Uwe oMUKAMA, nge kinywa kyawe ko kiri.

⁶⁶ Unyikangiriraye eritswera ribuya namenge; Kusangwa nabiriikirirya amategeko wawe.

⁶⁷ Ndenagalwa monatala; Nikwa lino ngabika eKinywa kyawe.

⁶⁸ Uri mubuya, ukakola ndeke; Unyikangiriraye ebihano byawe.

⁶⁹ Abakayianza babirinyikokoterya eribiha: Nasyabika ebihano byawe nomutima wage gosi.

⁷⁰ Omutima wabo abirineneha nga maguta; Nikwa ingye ngatsemera omugambu wawe.

⁷¹ Eriagalwa ryowene busana nage; Inatoka eriiga ebihano byawe.

⁷² Omugambo gobuno bwawe owene Kwilaba amaelfu wezahabu nebitsipa.

⁷³ Ebyala byawe byabirinyihangika nerinyibumba: Umbe amenge, inatoka eriiga amategeko wawe.

⁷⁴ Abakakubaha basyanyilolako neritsema, Kusangwa nabiriyiketera eKinywa kyawe.

⁷⁵ Uwe oMUKAMA, nyinasi kweritswera ryawe ritunganene, Kandi omwitindasiganirya wabirinyagalya.

⁷⁶ Ngakugo, busana nolwanzo lwawe lubuya lubyeerisibikya ryage, Ngoko eKinywa kyawe kiri busana nomugombe wawe.

⁷⁷ Olukogo lwawe lunyihikeko, inatoka eribyaho; Kusangwa omugambo wawe ni butseme bwage.

⁷⁸ Abakayianza bitawe esisoni; kusangwa babirinyigusa namabihi: Nikwa ngandiganirya emigambu yawe.

⁷⁹ Abakakubaha banyibindukire; Basyaminya eritulago ryawe.

⁸⁰ Omutima wage ahikane omo bihano byawe, Isinitawe esisoni.

⁸¹ Ekirimu kyage kikapisima busana neriyitsutsa erilamyaryawe; Nikwa ngayiketera eKinywa kyawe.

⁸² Ameso wage akahwa busana neriyitsutsa eKinywa kyawe, Omugulu ngabuga nyiti, wasyanyisibikya omugulu wahikwehi?

⁸³ Kusangwa nabiribya ngengunza yekihu kyebinyu omomuki; Nikwa sinditibirirwa ebihano byawe.

⁸⁴ Ebiro byomugombe wawe ni bingahi kwehi? Wasyaberererya eritswera oko bakanyendereraya omuguluwahi kwehi?

⁸⁵ Abakayianza babiritakula amahya busana nage, Abate ngokwe migambu yawe iri.

⁸⁶ Amategeko wawe gose siarisiganiraya: Bakanyendereraya omo mabihi; ungwatikaye.

⁸⁷ Babya bakisiya erinyiherya omo kihugo; Nikwa mondaleka ebihano byawe.

⁸⁸ Unyisubaye omo ngebe ngolwanzo lwawe lubuya; Ritya nasyakenga eritulago lyobuno bwawe.

⁸⁹ Uwe MUKAMA, kera na kera, eKinywa kyawe kyabirihandwa omo lubula.

⁹⁰ Eritindasiganirya ryawe riri omo syondengo syosi: Wabirisikya e kihugo nakyo kikabyaho.

⁹¹ Bikabyaho omo kiro eki ngokwe bihano byawe biri; Kusangwa emyatsi yosi ni bagombe bawe.

⁹² Kumbe emigambu yawe itabya obutseme bwage, Nga nabirihera omo bulige bwage.

⁹³ Sindiendisibirirwa ebihano byawe na kera; Kusangwa mubyo wabirinyisubya mo ngebe.

⁹⁴ Indi wawe, unyilamaye; Kusangwa nabirisonda-sonda ebihano byawe.

⁹⁵ Ababi babirindindirira erinyiherya; Nikwa nasyaganirya eritulago ryawe.

⁹⁶ Nabirilangira enduli yerihikana ryosi; Nikwa eritegeka ryawe ni rigali kutsibu.

⁹⁷ Amategeko wawe akanyiyira mo wamenge kwilaba esyonzigu syage; Kusangwa ari haguma nage ebiro byosi.

⁹⁸ Nyanzire ebihano byawe byonyitya! Byo ngaganiraya ekiro kyosi.

⁹⁹ Ngwite eriminya kwilaba abakangirirya bage bosi; Kusangwa eritulago ryawe ryo ngaganiraya.

¹⁰⁰ Ngaminya kwilaba abakulu, Kusangwa nabiribika ebihano byawe.

¹⁰¹ Nabirikakirya ebisandu byage oko buri nzira nyibi, Inatoka erikenga eKinywa kyawe.

¹⁰² Sinditayihengeka okwitswera ryawe; Kusangwa wabirinyikangirirya.

¹⁰³ Ebinywa byawe bisihire bitya omo buno bwage! Kwilaba obuki omo buno bwage!

¹⁰⁴ Busana nebihano byawe ngabana eriminya: Kikaleka inakwa oburi nzira yamabihi yekiniga.

¹⁰⁵ eKinywa kyawe ni luseke busana nebisandu byage, Ekyakakala omo nzira yage.

¹⁰⁶ Nabirilahirya, nerisikyaryo, nyiti, Nasyakenga eritswera ryawe ritunganene.

¹⁰⁷ Nabiriagalwa kutsibu: Unyisubaye omo ngebe, uwe MUKAMA, ngoko eKinywa kyawe ko kiri.

¹⁰⁸ Uwe MUKAMA, ngakugo, ulige erihitya ryobuhere bobuno bwage, Unyikangiriraye eritswera ryawe.

¹⁰⁹ Ekirimu kyage kiri mu byala byage endambi yosi; Nikwa sindibirirawa ebihano byawe.

¹¹⁰ Ababi babirinyitega ekitego; Nikwa sinditatala oko mategeko wawe.

¹¹¹ Eritulago ryawe nabiriimyaryo ngomwandu wage kera nakera; Kusangwa byo bikatsemesaya omutima wage.

¹¹² Nabirihira omutima wage okwikola erihana ryawe Kera na kera, erihika oko nduli.

¹¹³ Nabirikwabo ekiniga abamaringekania abiri; Nikwa ebihano byawe byo nyanzire.

¹¹⁴ Uri bubisamo bwage nengabo yage: Ngahira amaha oko kinywa kyawe.

¹¹⁵ Inywe abakolanabi, munyilweko, Inatoka eribika amategeko woMungu wage.

¹¹⁶ Unyisingike ngekinywa kyawe ko kiri, inabyaho; Sundeke ngitwa esisoni omo maha wage.

¹¹⁷ Unyisingike, neryo nasyabyaho ndeke, Nasyakenga ebihano byawe ndambi yosi.

¹¹⁸ Wabiripona abosi abakatala oko bihano byawe; Kusangwa amatebo wabo ni mabihi.

¹¹⁹ Ukaleka ababi be kihugo ibumbya nga mahungu wekyuma: Kikaleka inanza eritulago ryawe.

¹²⁰ Omubiri wage akatitimana busana nerikubaha; Ngubaha eritswera ryawe.

¹²¹ Nabirikola eritswera neritunganene: Sunyisiganaye oko bakanyinubaya.

¹²² Ubye omuwato busana nomugombe wawe busana nebibuya: Suleke abakayianza erinyinubya.

¹²³ Ameso wage akahuma neriyitsutsa erilamya ryawe, Nekinywa kyawe kitunganene.

¹²⁴ Ukolere omugombe wawe ebiringene nolwanzo lubuyalwawe, Unyikangiriraye ebihano byawe.

¹²⁵ Indi mugombe wawe; umbe eriminya, Inatoka eriminya eritulago ryawe.

¹²⁶ Ni mugulu woMUKAMA werikola, Babiriyira omugambu wawe mo buyira.

¹²⁷ Kikaleka inanza amategeko wawe Kwilaba zahabu, ega, kwilaba zahabu nyibuya.

¹²⁸ Kikaleka inaganirya ebihano byosi byawe bitunganenebusana nebyosi; Ngakwa ekiniga oburi nzira yamabihi.

¹²⁹ Eritulago ryawe ni ryeriswekera: Kikaleka ekirimu kyage ikyabikabyo.

¹³⁰ Eribisurirwa ebinywa byawe rikaleta ekyakakala; Rikaha ebikiru eriminya.

¹³¹ Monakumbula obuno bwage ndeke, monahumayira; Kusangwa nayitsutsa amategeko wawe.

¹³² Unyikebere, unyiganyire. Ngoko wagenda ukakola abanzire erina ryawe.

¹³³ Usikaye Eribasula ryage omo kinywa kyawe; Suleke ebibi bikanyitabalako.

¹³⁴ Unyitongolaye okwinubya ryabandu: Neryo nasyakenga ebihano byawe.

¹³⁵ Ukoleraye oko mugombe wawe obusu bwawe; Unyikangiriraye ebihano byawe.

¹³⁶ Esyonyusi syamagetsi sikasenda oko meso wage, Kusangwa sibekenga ebihano byawe.

¹³⁷ Uwe MUKAMA, utunganene, Neritswera ryawe ritunganene.

¹³⁸ Wabiritegeka eritulago ryawe omo ritunganene Nomo tindasiganirya kwenene.

¹³⁹ Omuhwa wage abirinyikonda, Kusangwa esyonzigu syage syabiribirirwa ebinywa byawe.

¹⁴⁰ eKinywa kyawe kitukwire; Kikaleka omugombe wawe inanzakyo.

¹⁴¹ Ingye ndi mukemuke niponirwe; Nikwa sindibirirawa ebihano byawe.

¹⁴² Eritunganene ryawe ni ritunganene ryakera na kera, Ebihano byawe ni kwenene.

¹⁴³ Obulige neriagalwa bikanyihamba; Nikwa amategeko wawe ni butseme bwage.

¹⁴⁴ Eritulago ryawe ritunganene kera na kera: Umbe menge, neryo nasyabyaho.

¹⁴⁵ Namabirikira nomutima wage gosi; Uwe MUKAMA, unyisubiraye: Nasyabika ebihano byawe.

¹⁴⁶ Nabirikubirikira; unyilamaye, Nage nasyakenga eritulago ryawe.

¹⁴⁷ Ngabuka bwasonda erikya, ngabirikira: Monahira amaha oko binywa byawe.

¹⁴⁸ Ameso wage mwatanga bisisimuko byekiro, Inatoka eriganirya eKinywa kyawe.

¹⁴⁹ Uhulikirire omulenge wage ngoko olwanzo lwawe lubuyaluri: Uwe MUKAMA, Unyisubaye omo ngebe ngoko eritswera ryawe riri.

¹⁵⁰ Bakasegera hakuhi abakakwama ebibi; Bari hali oko bihano byawe.

¹⁵¹ Uwe MUKAMA, uri hakuhi; Amategeko wawe gosi ni kwenene.

¹⁵² Eritsuka kera nabiriminya busana neritulago ryawe, Ko wabirihandaryo busana na kera na kera.

¹⁵³ Uganiraye eriagalwa ryage, undamaye; Kusangwa sindibirirawa ebihano byawe.

¹⁵⁴ Unyibuyire omwatsi wage, unyitongolaye: Unyisubaye omo ngebe ngoko eKinywa kyawe kiri.

¹⁵⁵ Erilama riri hali oko babi; Kusangwa sibesonda-sonda ebihano byawe.

¹⁵⁶ Uwe MUKAMA, Olukogo lwawe ni lunene: Unyisubaye omo ngebe ngoko eritswera ryawe riri.

¹⁵⁷ Abakanyendereraya nesyonzigu syage ni bangi; Nikwa sinditateguka okwitulago ryawe.

¹⁵⁸ Monalebya abakasiga erilaga, monakwabo esyonye, Kusangwa sibetakenga eKinywa kyawe.

¹⁵⁹ Lebaya ko nyanzire ebihano byawe: Uwe MUKAMA, unyisubaye omo ngebe ngoko olwanzo lwawe lubuya luri.

¹⁶⁰ eKinywa kyawe kyosi ni kwenene; Noburi tswera ryawe ritunganene ni rya kera na kera.

¹⁶¹ Abakulu babirinyendererya butsira ekikaleka; Nikwa omutima wage akakenga ebinywa byawe.

¹⁶² Ngatsemera eKinywa kyawe, Ngoyu kabana ebindu bingi omo malwa.

¹⁶³ Ngakwa amabihi ekiniga nerikwago esyonye; Nikwa omugambu wawe go nganza.

¹⁶⁴ Engendo sirinda oko kiro kiguma ngakupipa, Busana neritswera ryawe ritunganene.

¹⁶⁵ Abanzire omugambu wawe bari nobuholo bunene; Nabo sibawite ekyeritwikalyabo.

¹⁶⁶ Uwe oMUKAMA, Nabirihira amaha okwilamyaryawe, Nabirikola amategeko wawe.

¹⁶⁷ Ekirimu kyage kyabirikenga eritulago ryawe; Nyanzireryo kutsibu.

¹⁶⁸ Nabirikenga mategeko wawe neritulago ryawe; Kusangwa esyonzira syage syosi siri embere syawe.

¹⁶⁹ Erilaka ryage rihike hakuhi nawe, uwe MUKAMA: Unyihe eriminya ngoko kinywa kyawe kiri.

¹⁷⁰ Erigo ryage rihike embere syawe: Unyilamaye ngoko eKinywa kyawe kiri.

¹⁷¹ Eminywa ibuge eripipa; Kusangwa ukanyikangiriraya ebihano byawe.

¹⁷² Olulimi lwage lwimbe eKinywa kyawe; Kusangwa amategeko wawe gosi atunganene.

¹⁷³ Ebyala byawe bisike erinyiwatikya; Kusangwa nabiriyisoga ebihano byawe.

¹⁷⁴ Uwe MUKAMA, nabirikwa erilamya ryawe ryo lukando; Kandi ebihano byawe ni butseme bwage.

¹⁷⁵ Ekirimu kyage kibyeho, nakyo kyasyakupipa; Eritswera ryawe ringwatikaye.

¹⁷⁶ Nabiritala ngembuli itere; sonda-sonda omugombe wawe; Kusangwa sindibirirawa amategeko wawe.