Esyonyimbo 106 - Nouveau Testament et Psaumes en Ndandi Version 1962

Obwanise bwaIsraeli

¹ Mupipe oMUKAMA! Muhe ewasingya oko MUKAMA; kusangwa ni mubuya; Kusangwa olwanzo luwe lubuya ni lwa kera na kera.

² Ni ndi angatoka eriahula emibiri yamaka yoMUKAMA, Kutse erikangania eripipa riwe ryosi kwehi?

³ Omuyisa ari nabakabika ebitunganene, Noyu kakola ebitunganene ebiro byosi.

⁴ Unyibuke, uwe MUKAMA, neriganyira eryo waganyira abandu bawe; Unyibalamire nerilamya ryawe,

⁵ Nyilebaye eryuwana ryabayisogawa bawe, Nyitseme omo butseme bwekihanda kyawe, Nyiyipipa haguma nomwandu wawe.

⁶ Twabirikola nabi nabotata wetu, Twabirikola malolo, twabirikola ebibi.

⁷ Abotata wetu mobataminya ebyeriswekera byawe eMisiri; Mobatibuka obungi bolwanzo lubuya lwawe, Nikwa mobalwa obwanise oko ngetsi, Engetsi yoMunyama.

⁸ Nikwa busana nerina riwe mwalamyabo, Neryo iniatoka eriminyisyabo amaka wobutoki buwe.

⁹ Mwakunga Engetsi yoMunyama, moyuma: Ritya mwasondolabo omo mitobola, nge mbwarara.

¹⁰ Mwalamyabo omo byala byoyo wakwabo ekiniga, Mwatongolyabo omo byala byenzigu.

¹¹ Amagetsi mwakuninga esyonzigu syabo; Mohatasaka nomuguma.

¹² Neryo mobikirirya ebinywa biwe; Mobimba eripipa riwe.

¹³ Mobibirirwa emibiri yiwe yoluba; Mobatalinda erihana riwe,

¹⁴ Nikwa mobayitsutsa kutsibu omo mbwarara, Mobalenga oko Mungu omo lukorotsi.

¹⁵ Neryo mwahabo eribulya ryabo, Nikwa mwatuma eribonda omo kirimu kyabo.

¹⁶ Mobatsura Musa omo kiraririro, Haruni oyu buyirire woMUKAMA.

¹⁷ Ekitaka mokyasanzukala mokyamera Datani, Mokyakuninga endeko ya Abiramu.

¹⁸ Omuliro mwaka omo ndeko yabo; Ekirimi kyago mokyahisya abakolanabi.

¹⁹ Mobakola ekyana kyende eHorebe, Mobakukamira olusumba olunyenyetire.

²⁰ Batya mobabindula olukengerwa lwabo Busana nekisosire enume eyikarya ebiti,

²¹ Mobibirirwa oMungu oMulamya wabo. Oyu wakola emyatsi mineneminene eMisiri,

²² Emibiri yeriswekera omo kihugo kyaHamu, Nemyatsi yeriubahya oko Ngetsi Yomunyama.

²³ Neryo mwabuga ati asyatogotyabo, Kumbe Musa atari hangana embere siwe omo isesi, Eribindula erihitana riwe, isyaherayabo.

²⁴ Ega, mobapona e kihugo kyowene, Mobataliga eKinywa kiwe,

²⁵ Nikwa mobayitongo omo mahema wabo, Mobatahulikirira omulenge woMUKAMA.

²⁶ Kyaleka iniasumba ebyala biwe erilahirya kubo, Ati asyaleka ibayihinda omo mbwarara,

²⁷ Ati asyagusa olubuto lwabo omo bihanda, Neripanzapanzabo omo bihugo.

²⁸ Mobayamatania na BaliPiori, Mobarya amahere wabaholire.

²⁹ Ritya mobamuhitania nemibiri yabo; Nendwala moyahika kubo.

³⁰ Neryo Finehasi mwahangana, mwabererya eritswera; Ritya endwala moyakakiribwa.

³¹ Nekyo mokyaganzwa mo ritunganene busana naye, Oko ndengo syosi kera na kera.

³² Mobamuhitania oko magetsi weMariba, Kyaleka Musa iniabya namalige busana nabo;

³³ Kusangwa mobalwa nekirimu kiwe, Neryo mwabuga ebitatolere neminywa yiwe.

³⁴ Mobataherya ebihanda, Ngoko MUKAMA ategekabo,

³⁵ Nikwa mobayitulungania nebihanda, Mobiga emibiri yabo,

³⁶ Mobakolera esisumba syabo, Mosyabya ekitego busana nabo.

³⁷ Ega, mobaherera abagala babo nabali babo oko syombinga,

³⁸ Mobuta omusasi wabate kolubanza, Omusasi wabagala babo na bali babo, Mobaherera esisumba syaKanana; Ne kihugo mokyatsanda omo musasi.

³⁹ Ritya mobatsanda nemibiri yabo, Mobabya basingiri omo mibiri yabo.

⁴⁰ Kyaleka erihitana ryo MUKAMA iryatwanawa oko bandubuwe, Mwakwa esyonye omwandu wuwe.

⁴¹ Mwahirabo omo byala byebihanda; Nabakwabo ekiniga mobatabala kubo.

⁴² Esyonzigu syabo mosyanubyabo, Mobahirwa omwisi webyala byabo.

⁴³ Engendo nyingi mwalamyabo; Nikwa mobalwa obwanise omwiganirya ryabo, Mobakehibwa omo bibi byabo.

⁴⁴ Nikwa mwibuka amalige wabo, Omugulu owa erilaka ryabo:

⁴⁵ Neryo mwibuka erilaga alagana nabo, Mwabinduka busana nobungi bwolwanzo lubuya luwe.

⁴⁶ Mwaleka ibaganyirwa Nabosi ababya bakahungabo omo bukobe.

⁴⁷ Utulamaye, Uwe MUKAMA Mungu wetu, Utukumakume erilwa omo bihanda, Eriha ewasingya oko rina ryawe ribuyirire, Nerikinda omwipipa ryawe.

⁴⁸ Omuyisa abye oko MUKAMA Mungu waIsraeli, Eritsuka kera nerihika kera na kera. Na bandu bosi babuga bati, Bibye bitya. Mupipe oMUKAMA.