Esyonyimbo 105 - Nouveau Testament et Psaumes en Ndandi Version 1962

Emibiri yoMUKAMA busana na Israeli

¹ Muhe ewasingya oko MUKAMA, mubirikire erina riwe; Muminyisaye emibiri yiwe omukati-kati kabandu.

² Mumwimbire, mumwimbire eripipa; Mukanaye emibiri yiwe yeriswekera.

³ Muyipipe omo rina riwe ribuyirire: Omutima wabo bakasonda-sonda oMUKAMA atseme.

⁴ Musondaye oMUKAMA namaka wuwe; Musondaye obusu buwe na kera na kera.

⁵ Muyibuke emibiri yiwe yeriswekera eyo abirikola, Ebyeriswekera biwe neritswera ryobuno buwe,

⁶ Inywe olubuto lwAbrahamu omugombe wuwe, Inywe abana baYakobo, abayisogawa buwe.

⁷ Iye ni MUKAMA Mungu wetu: Eritswera riwe riri omo kihugo kyosi.

⁸ Abiribuka erilaga riwe kera na kera, eKinywa ategeka oko syondengo amagana ikumi,

⁹ Erilaga eryo ayira na Abrahamu, Nerilahirya riwe na Isaka,

¹⁰ Mwasikyaryo ku Yakobo busana neritegeka, Uku Israeli busana nerilaga eritehwa,

¹¹ Ati, Uwe nasyakuha e kihugo kyaKanana, Igabu ryomwandu wawe;

¹² Omugulu babya bandu bake omwiganza, Ega, abake kutsibu, ini bagendi mukyo.

¹³ Mobalendera oko bihanda bihanda, Erilwa oko bwami buguma oko bandi bandu.

¹⁴ Mwataliga omundu erikolabo nabi; Ega, mwakunga abami busana nabo, ati,

¹⁵ Simutule oko abo nabirihakabya maguta, Simwagalaye abaminyereri bage.

¹⁶ Mwabirikira enzala oko kihugo; Mwabuna oburi mutso owabya karyo.

¹⁷ Mwatuma omundu embere syabo; Yosefu, oyo wagulibawa ngo mukobe:

¹⁸ Ebisandu biwe mobagalyabyo omo mahulula: Mwahirwa omo mahulula we byuma,

¹⁹ Erihika oko ndambi eKinywa kiwe kyabererera, eKinywa kyoMUKAMA mokyamulengako.

²⁰ Omwami mwatuma nerimubohola; Neryo omurongani wabandu, mwamuleka eriyigenderya.

²¹ Mwamuyira mo mukama wenyumba yiwe, Nomubiki wobusoki buwe bosi;

²² Eriboha abasoki buwe ngokwa anzire, Nerikangirirya abakulu buwe amenge.

²³ Israeli mwahika eMisiri; Na Yakobo mwabya omugendi omo kihugo kya Hamu.

²⁴ Mwakanya abandu buwe kutsibu, Mwayirabo mo bamaka kwilaba esyonzigu syabo.

²⁵ Mwabindula omutima wabo erikwa abiwe bekiniga, Neriteba abagombe biwe.

²⁶ Mwatuma Musa omugombe wuwe, Na Arona oyu ayisoga.

²⁷ Mobahira omukati-kati kabo ebinywa byebiminyikalo biwe, Nebyeriswekera omo kihugo kyaHamu.

²⁸ Mwatuma omwirimya, mwayirago eriita; Mobatagana ebinywa biwe.

²⁹ Mwahindula amagetsi wabo omo musasi, Mwita esiswi syabo mo magetsi.

³⁰ E kihugo kyabo mokyusula ebikere Omo manyumba wa bami babo.

³¹ Mwabuga, namarumbu wesisuki mwasa, Nesyonda omo mitano yabo yosi.

³² Mwahabo amatwa busana nembula, Nomuliro weriaka omo kihugo kyabo.

³³ Mwahunza emiliki yebinyu yabo nemiti yemitini yabo, Mwabuna emiti yomo mitano yabo.

³⁴ Mwabuga, nesyongike mosyasa, Namatuta, ogutaganzika,

³⁵ Mosyarya ebiti byosi omo kihugo kyabo, Mosyarya ebiguma byekitaka kyabo.

³⁶ Mwaswirya ehimbere hyosi hyomo kihugo kyabo, Abakulu bamaka wabo gosi.

³⁷ Mwahulukyabo nebitsipa na zahabu; Isihabya mundu no muguma molo omukati-kati kebihanda biwe.

³⁸ Misiri moyatsema omugulu bagenda; Kusangwa obuba bwabo ibwamahika kubo.

³⁹ Mwasanzula ekitu erisukurirya, Nomuliro erikolerya omo kiro.

⁴⁰ Mobabulya, mwaleta esyongware, Mugutyabo amandu welubula.

⁴¹ Mwalibula eribwe, namagetsi mwakununuka; Mwasendera ahumire mo lusi.

⁴² Kusangwa mwibuka eKinywa kiwe kibuyirire, Na Abrahamu omugombe wuwe.

⁴³ Mwahulukya abandu buwe nobutseme, Nabayisogawa buwe neriimba.

⁴⁴ Mwahabo ebihugo byebihanda; Mobimya mo byabo ebyo ebihanda byaluhira:

⁴⁵ Ibatoka eriteya ebihano biwe, Ibakwamirira eryategeka. Mupipe oMUKAMA.