Esyonyimbo 102 - Nouveau Testament et Psaumes en Ndandi Version 1962

Erisaba ryoyu kagalawa

¹ Uwe MUKAMA gowe erisaba ryage, —Erilaka ryage rikuhikekeo.

² Sunyibise obusu bwawe omokiro kyeriagalwa ryage; Unyitegere okutu; Ekiro ngabirikira unyisubiraye luba.

³ Kusangwa ebiro byage bikalaba ngomuki, Namakuha wage akaka ngolumole.

⁴ Omutima wage aswirirye ngebiti, umire; Kusangwa ngibirirawa erirya obundu bwage.

⁵ Busana nomulenge werisimba ryage Amakuha wage akamatana nomubiri wage.

⁶ Indi nge kirobi kyomo mbwarara, Nabiribya nge kibukulu omo bisaka.

⁷ Ngategaya, nabiribya nga kaswiri Akari ko lutwe lwenyumba ikokene.

⁸ Esyonzigu syage sikanzuma omo kiro kyosi; Abakanyihitanako bakatsuma ibanyahula.

⁹ Kusangwa nabirirya eribu ngobundu, Neritulungania eripulya ryage nemisonia,

¹⁰ Busana nerihitana ryawe neriagalirwa ryawe Kusangwa wabirinyitetemba nerinyigusa.

¹¹ Ebiro byage biringe nge kitsutsu ekikakima; Nabiriuma ngebiti.

¹² Nikwa uwe, MUKAMA, wikere oko kitumbi kyobwamikera na kera; Neriyibuka ryawe oko syondengo syosi.

¹³ Wasyahangana, neriganyira Sayuni; Kusangwa ni mugulu werimukwa olukogo, Ega, omugulu ahulawa abirihika.

¹⁴ Kusangwa abagombe bawe bakatsemera amabwe wago, Babiriganyira olututu lwago.

¹⁵ Ritya ebihanda byasyubaha erina ryoMUKAMA, Nabami bosi be kihugo basyubaha olukengerwa lwawe.

¹⁶ Kusangwa MUKAMA abirihimba Sayuni; Abirihuluka omo lukengerwa luwe.

¹⁷ Abirilebya erisaba ryabera, Siaritapona erisaba ryabo.

¹⁸ Ebi byasyasakwa busana nolulengo olwasyasa; Na bandu basyahangikwa basyapipa oMUKAMA.

¹⁹ Kusangwa abirisamarira ahisi iniane elubula endata ahabuyirire huwe; OMUKAMA abirisamarira e kihugo iniane elubula;

²⁰ Eriowa erisigikalira ryogomuliki; Eribohola ababirihirwa okwihola;

²¹ Abandu batoke erikangania erina ryoMUKAMA omoSayuni; Neripipa riwe omo Yerusalema;

²² Omugulu bandu bahindene haguma, Namami, erikolera MUKAMA.

²³ Akakehaya akagala kage omo nzira; Akakuhihaya ebiro byage.

²⁴ Monabuga nyiti, oMungu wage, sundusaye omo biro byage: Emituta yawe ikabyaho omo syondengo syosi.

²⁵ Kera mowahira ekibanza kye kihugo; Nolubula ni mubiri webyala byawe.

²⁶ Byasyahera, nikwa uwe wasyasigalaho; Ega, ebyosi byasyakula ngolukimba; Wasyabindulabyo ngolukimba, byasyahindulwa:

²⁷ Nikwa uwe ikune utya, Nemituta yawe siwite enduli,

²⁸ Abana babagombe bawe basyabyaho nerisika, Nolubuto lwabo lwasyasikibwa embere syawe.