Eribisurirwa 5 - Nouveau Testament et Psaumes en Ndandi Version 1962

Ekitabu ekibohire nebibohi birinda

¹ Kandi monalangira omo byala byamali byoyo wabya wikere oko kitumbi kyobwami ekitabu kisakire emuliro nenyuma, ikibohire nebibohi birinda;

² kandi monalangira omulaika owamaka akatulago nomulenge munene ati, Ni ndi utolere erisanzula ekitabu neritula ebibohi byakyo kwehi?

³ Neryo sihabya owomo lubula kutse womo kihugo kutse eyikwa oko kihugo oyo wangatoka erisanzula ekitabu kutse erisamarirakyo,

⁴ neryo monarira kutsibu kusangwa isihetabanika oyu tolere erisanzula ekitabu ekyo kutse erisamarirakyo.

⁵ Nomuguma woko bakulu mwambwira ati, Surire; langira Endale yomo kitunga kyaYuda, oMurihi waDawidi, abirikinda, angatoka erisanzula ekitabu nebibohi byakyo birinda.

⁶ Neryo monalangira eKyana kyembuli nga kyabirikerwa ikimene omukati-kati kekitumbi kyobwami nebihangikire ebi riho bini naho katikati kabakulu nibya ikiwite amahembe arinda nameso arinda, byo birimu birinda byoMungu ebya tumawa omo kihugo kyosi;

⁷ naye mwayimya ekitabu omo byala byoyo wikere oko kitumbi kyobwami.

⁸ Abere abiimya ekitabu, ebihangikirwe ebiriho bini nabakulu makumi abiri na bani mobagwa emuliro weKyana kyembuli, oburi muguma wakubo inianahambire enanga, haguma nebisya byezahabu ibyuswire mo uvumba ryerisaba ryababuyirire;

⁹ nabo mobimba olwimbo luhyaluhya bati, Uwe utolere eriimya ekitabu neribohola ebibohi byakyo, Kusangwa mowakerwa kandi mowagula abandu omo musasi wawe busana noMungu Erilwa oko buri kitunga noburi mubuge noburi bandu noburi kihanda,

¹⁰ Wabiriyirabo mo bwami nabahereri oko Mungu wetu, Nabo basyatabala omo kihugo.

Eripipa ekyana kyembuli

¹¹ Neryo monalangira, monowa omulenge wabalaika bangi ibatimbire oko kitumbi kyobwami nebihangikirwe ebiriho nabakulu, eriganza ryabo ni elfu ikumi ngendo elfu ikumi nelfu ngendo elfu,

¹² bakabuga nomulenge munene bati, Ekyana kyembuli ekyakerawa, yutolere eriimya obutoki nebindu namenge nakagala nerisikibwa nolukengerwa nomuyisa!

¹³ Kandi monowa oburi ekyahangikawa omo lubula nomo kihugo neyikwa oko kihugo nomo ngetsi, nebirimo byosi, mobyabuga biti, Omuyisa neripipwa nolukengerwa namaka bibye ukwoyo wikere oko kitumbi kyobwami ne Kyana kye mbuli nakera nakera!

¹⁴ Nebihangikire ebiriho bini mobyabuga biti, Bibye bitya, nabakulu mobagwa ahisi mobamukukamira.