Eribisurirwa 3 - Nouveau Testament et Psaumes en Ndandi Version 1962

Ebarua oko kanisa ye Sardi

¹ Noko mulaika wekanisa eyiri Sardi usake ebinywa byoyu wite ebirimu birinda byoMungu nesyongununu sirinda. Nyasi emibiri yawe; uwite erina nguriho, nibya iniuholire.

² Ubuke, usikaye ebikisiya nebiri hakuhi nerihola, kusangwa sinditabana emibiri yawe eyihikene omo meso woMungu wage.

³ Uyibuke ekyo wimaya nekyo wowa; ubikebyo ndeke, ubinduke. Wamatindateya, nasyasa ngomurahi, isiwendisya minya endambi nasyakuhikako.

⁴ Nikwa mukinawite amena make eSardi, abandu abatatsandirye esyongimba syabo; nabo basyalendera nage omo sihenirye, kusangwa batolere.

⁵ Oyo kakinda asyambalibwa atya esyongimba sihenirye, nage sinai endisyasangula erina riwe omo kitabu kyengebe; Nasyakangya erina riwe embere wa Tata wage nembere ya balaika buwe.

⁶ Oyu wite okutu owe ekyo eKirimu kikabuga nesyokanisa.

Ebarua oko kanisa yeFiladelfia

⁷ Noko mulaika wekanisa eyiri Filadelfia usake ebinywa byoyu ubuyirire, nowekwenene, oyu wite ekiboholi kya Dawidi, oyu kakingula isihari wangaswakinga, noyu kakinga sihari wangaswakingula.

⁸ Nyasi emibiri yawe. Lebaya, nabirihira emuliro wawe oluyi lukingwire, sihari wangatoka erikingalo; Nyinasi uwite amaka make, nikwa wabiribika ndeke eKinywa kyage suritagana erina ryage.

⁹ Lebaya namakuha abenyumba yerihindana ya Satani abakayahula mo baYuda nibya sibo, nikwa bakabiha— lebaya nasyaletabo neriunamyabo embere syebisandu byawe, ibaminya ko nyikwanzire.

¹⁰ Kusangwa wabiribika ndeke eKinywa kyerisika eriteluha ryage, nasyakubika ndeke oko ndambi eyerilengwako eyikasa omo kihugo kyosi, nerilenga abikere omo kihugo.

¹¹ Nasyasa luba; uhambe ndeke ebyo uwiteko, sihabye omundu ukahunga embita yawe.

¹² Oyu kakinda, nasyamuyira mo nduyi omo hekalu ya Mungu wage; isiendisyalwamo nakera nakera, nasyamusaka kwerina ryo Mungu wage, nerina ryomuyi woMungu wage, ye Yerusalema nyihyanyihya eyikandisyandagala ikalwa elubula oko Mungu wage, nerina ryage rihyarihya.

¹³ Oyu wite okutu, owe ekyo eKirimu kikabuga nesyokanisa.

Ebarua oko kanisa yeLaodikia

¹⁴ Noko mulaika wekanisa eyiri Laodikia usake ebinywa bya Iye Amina, omulangiri oyu tesiganiraya owekwenene, eritsuka ryerihangika ryoMungu.

¹⁵ Nyinasi emibiri yawe; siwuhuhirire kutse suhuhene. Kumbe wuhuhirire kutse kumbe uhuhene!

¹⁶ Ritya kusangwa uri kangekange, isiwuhuhirire kutse isuhuhene, nasyakugumula omo buno bwage.

¹⁷ Kusangwa ukabuga uti, ngwite ebindu, ebindu byage byabirikanya, sihari kyo nyiburire; isiwasi kuri muhanya, oweriganyirwa, kandi kuri mwera, nendimatime, nendumbu.

¹⁸ Neryo ngakuhana ungureko ezahabu yabiri eribwa omo muliro, iwatoka eribya owebindu, nesyongimba sihenirye, eriambalasyo, esisoni syendumbu yawe sisiminyikale, nobubalya bwerisigisa oko ameso wawe, iwatoka erilangira.

¹⁹ Abo nganza, ngakungabo neriswiryabo; nikwa lero ubye nomuhwa, ubinduke.

²⁰ Lebaya, nyimene oko luyi ngakongota; omundu amowa omulenge wage akakingula oluyi, nasingira ewuwe twasyarira haguma.

²¹ Oyu kakinda nasyamuha eriikala haguma nage oko kitumbi kyage kyobwami, ngoko nage nabirikinda monikala haguma na Tata wage oko kitumbi kiwe kyobwami.

²² Oyu wite okutu, owe ekyo eKirimu kikabuga nesyokanisa.