Eribisurirwa 22 - Nouveau Testament et Psaumes en Ndandi Version 1962

Olusi nomuti byengebe

¹ Neryo mwanyikangya olusi lwamagetsi wengebe, olu kangabenie ngekiyo, olukasenda lukalwa oko kitumbi kyobwami kyoMungu neKyana kyembuli

² lukalaba omo katikati kenzira yomuyi; kandi, oko misirya ibiri yolusi hari omuti wengebe nemisindo yebiguma ikumi na bibiri, akaheta kwebiguma oburi mukera; nebikoma byomuti oyo byabya busana nerilamya ebihanda.

³ Sihendisyaswabya kandi ekindu ekitakire, nikwa ekitumbi kyoMungu kyobwami nekyeKyana kyembuli kyasyabya mugo, nabagombe buwe basyamukuka mira;

⁴ basyalola oko busu buwe, nerina riwe ryasyabua oko masu wabo.

⁵ Kandi sibwendisyahombera; neryo sibari nobwaga bwekyakakala kyoluseke kutse eryuba, kusangwa oMukama Mungu asyabya kyakakala kyabo, basyasinga kera na kera.

⁶ Neryo mwabuga nage ati, Ebinywa ebi ni byerikiriribwa nebyekwenene. NoMukama Mungu webirimu byabaminyereri, abirituma omulaika wuwe erikangya abagombe buwe ebitolere erihika luba.

⁷ Kandi lebaya, ngasa luba. Omuyisa ari nabakabika ebinywa byeriminyerera ryekitabu eki.

⁸ Ingye Yoane oyo wowa nerilangira emyatsi eyi. Neryo nabere nabiowa nerilangirayo, monagwa ahisi erikukamira oko bisandu byomulaika oyo wanyikangayayo;

⁹ nikwa mwabuga nage ati, Siwangakola utya! ingye ndi mugombe mulikyenyu noko bagala benyu baminyereri, noko bakabika ebinywa byekitabu eki. OMungu iyo wakukamira.

¹⁰ Neryo mwabuga nage ati, Subohe ebinywa byeriminyerera ryekitabu eki, kusangwa endambi iri hakuhi.

¹¹ Omukola nabi akwamirire erikola nabi, nabatisirire babye batisirire, naba tunganene bakwamirire erikola ebitunganene, nababuyirire bakwamirire eribya babuyirire.

Kristo akasa luba

¹² Lebaya, ngasa luba, ngaleta ebihembo, eririha oburi mundu busana nekyo abirikola.

¹³ Ingye indi Alfa na Omega, owerimbere nowenyuma, eritsuka nenduli.

¹⁴ Omuyisa ari kwabo abakeraya esyokanzu syabo, ibatoka eribya nehamuli yokomuti wengebe ibatoka eriingira omo muyi erilaba omo marimbo.

¹⁵ Eyihya iri syombwa nabakumu nabasingiri nabiti nabakasaba esisumba, noburi mundu oyu kanza eribiha nerikola amabihi.

¹⁶ Ingye Yesu nabiribatumira omulaika wage neritulago eri busana nesyokanisa, Ingye ndi ndina nolubuto byaDawidi, engununu yengyakya eyikakanga.

¹⁷ EKirimu noMuheruki bati, Mwase. Noyu kowa naye akabuga ati, Mwase. Noyu kwire enyota ase, noyu kasonda imaye amagetsi wengebe butsira obuguri.

Simutomekere kutse erilusya eKinywa

¹⁸ Ngasagisaya oburi mundu oyu kowa ebinywa byerimi nyerera ryekitabu eki; omundu amatomeka kubyo, Mungu asyamutomekako amalige owakahulawa omo kitabu eki,

¹⁹ nomundu amalusya oko binywa byekitabu kyeriminyerera eri, Mungu asyamulusya okwisangira oko muti wengebe noko muyi abuyirire, ebikahulawa omo kitabu eki.

²⁰ Oyo katulago oko myatsi eyi ati, Kwenene ngasa luba. Bibye bitya. Wase, oMukama Yesu!

²¹ Olukogo lwoMukama Yesu lubye nababuyirire bosi. Bibye bitya.