Eribisurirwa 21 - Nouveau Testament et Psaumes en Ndandi Version 1962

Elubula luhya ne kihugo kihya

¹ Neryo monalangira olubula luhyaluhya ne kihugo kihya kihya; kusangwa olubula lwerimbere ne kihugo kyerimbere byamabilaba, nengetsi isikiri kandi.

² Nage monalangira omuyi abuyirire, Yerusalema nyihyanyihya, ikandagala ikalwa elubula oko Mungu iyabirikokotibwa ngomuheruki kwakambalibawa busana niba wuwe;

³ monowa omulenge munene akalwa oko kitumbi kyobwami ati, Lebaya, aheriikala hoMungu hari haguma nabandu, asikala nabo, nabo basyabya abandu buwe, noMungu iyowene asyabya nabo,

⁴ asyabya Mungu wabo; asyasangula emisonia yosi oko meso wabo, kandi oluholo silwendisyabyaho kandi, kutse eririra kutse erisusumana kutse eriagalwa sibyendisyabyaho kandi, kusangwa emyatsi yerimbere yabirilaba.

⁵ Noyu wikere oko kitumbi kyobwami mwabuga ati, Lebaya, Ngayira emyatsi yosi mo mihyamihya. Kandi ati, Usake ebi, kusangwa ebinywa ebi ni byeriikiriribwa nebyekwenene.

⁶ Kandi mwabuga nage ati, Byamabikolwa! Indi Alfa na Omega, Eritsuka nenduli. Oyu kwire enyota nasyamuha ama getsi butsira erigula akalwa omo ngununuko yamagetsi wengebe.

⁷ Oyu kakinda asyabya nomwandu oyu, nasyabya Mungu wuwe naye asyabya mugala wage.

⁸ Nikwa abakubaha nabatikirirye, nabatsandire, nabiti, nabasingiri, nabakumu, nabakasaba esi sumba, nababihi bosi, omwanya wabo asyabya omo ngetsi eyikaka nomuliro namasingo, lo luholo lwakabiri.

Yerusalema nyihya

⁹ Neryo muguma woko balaika barinda ababya bawite ebisya birinda ebyoswire amalige arinda owenduli mwasa mwabuga nage ati, Wase ngandikukangya omuheruki, omukali weKyana kyembuli.

¹⁰ Neryo mwanyiheka omo kirimu oko kitwa kinene, kirikiri, mwanyikangya omuyi abuyirire Yerusalema akandagala erilwa elubula oko Mungu,

¹¹ iniawite olukengerwa lwoMungu, erikanga ryago riringene neribwe ryobuguri bunene eritebanika lityalitya, nga yaspi, nge ribwe erikalabangana mwameso.

¹² Abya awite ekiyite kinene, kiri, namalimbo ikumi nabiri, noko malimbo abalaika ikumi nababiri, kandi ihasakire amena webihanda erikumi nebibiri byabagala baIsraeli;

¹³ eyo eryuba rikahuluka amalimbo asatu, nelutambi amalimbo asatu, noko lundi lutambi amalimbo asatu, neyo eryuba rikalengera amalimbo asatu.

¹⁴ Nekiyite kyomuyi oyo kyabya nemikuro ikumi nibiri iyisakire kwamena ikumi nabiri wabakwenda ikumi nababiri beKyana kyembuli.

¹⁵ Noyu wakanaya nage abya awite olulengero lwomutso wezahabu werilenga omuyi namalimbo wago nebiyite.

¹⁶ Omuyi oyo iniaringirirene oko mbande syosi, oburiburi bwago iburingirirene nobugali bwago; naye mwalenga omuyi nomutso wuwe, kilometres elfu ibiri namagana ani; obuli bwago nobugali noburi bwendata ibiringirene.

¹⁷ Nibya mwalenga ekiyite kyago, ebikango erigana namakumi ani nebini omo lulengo lwomundu, lo lwomulaika.

¹⁸ Ekiyite kyayitawa omo yaspi, nikwa omuyi abya wezahabu nyibuya, ahenirye ngekiyo.

¹⁹ Nemikuro yekiyite kyomuyi yabya ibambire kwamabwe misindo yosi wobuguri bunene; owerimbere abya wa yaspi; owakabiri wa safira; owakasatu wa kaledoni, owakani wa zumaridi;

²⁰ owakatanu wa sadoniki; owendatu wa sardio; owakarinda wa krisolito; owa munani wa berilo; owa mwenda watopazio; oweikumi wa krisopuraso; oweikumi nomuguma wa waikinto; owa erikumi nibiri wa amazisito.

²¹ Namalimbo ikumi nabiri abya esyolulu ikumi nibiri, oburi irimbo ryakoko tibawa omo lulu nguma, nenzira yomuyi yabya yezahabu nyibuyabuya, ngekiyo ekikalabangana mwa meso.

²² Nage mondalangira ehekalu omo muyi oyo, kusangwa oMukama Mungu owaMaka gosi neKyana kyembuli ibo hekalu yago.

²³ Nomuyi oyo siari nobwaga bweryuba kutse omukera erikolerya kugo, kusangwa olukengerwa lwoMungu ni kya kakala kyago, noluseke lwago ni Kyana kyembuli.

²⁴ Nebi­handa byasyalendera omo kyakakala kyago; nabami be kihugo basyaleta olukengerwa lwabo mugo,

²⁵ namalimbo wago siendsyakingwa na kera na kera omwitungi—neyo sibwendisya hombera;

²⁶ nabo basyaleta olukengerwa nerisikya ryebihanda mugo.

²⁷ Nikwa sihendisingira mugo ekindu kibi, kutse oyo kakola ebitsandire kutse amabihi, nikwa banabasakirwe omo kitabu kyengebe kyeKyana kyembuli.