Eribisurirwa 2 - Nouveau Testament et Psaumes en Ndandi Version 1962

Barua oko kanisa yEfeso

¹ Usake oko mulaika wekanisa yEfeso uti: Ni binywa byoyu hambire esyongununu sirinda omo byala biwe byamali, oyu kalendera omukati-kati kebikahamba esiseke birinda byezahabu biti,

² Nyinasi emibiri yawe, nenduhi yawe nerisika riteluha ryawe, nakandi ngoko suribegerana na bandu babi nikwa wabirilenga abakayahula mo bakwenda nikwa isibo, wabiri banabo mo babihi;

³ nyinasi ko ukasika butsira eriluha ini ukayitsinga busana nerina ryage, isuritaluha.

⁴ Nikwa ngwite eki ukuwe, nyiti wabirileka olwanzo wabya nalo erimbere.

⁵ Wibuke aho uriayihinda, ubinduke ukole emibiri wakola erimbere. Kitebya kitya, nasyakuhikako inalusya ekikahamba oluseke kyawe omo mwanya wakyo, wamatindabinduka.

⁶ Nikwa unawite eki ngakusimira, ukakwa ekiniga emibiri ya baNikolayi, nage ngakwayo ekiniga.

⁷ Oyu wite okutu owe ebye Kirimu kikabwira esyokanisa. Oyu kakinda nasyamuha erirya oko biguma ebyomuti wengebe, owari omo paradiso yoMungu.

Barua oko kanisa ye Smurna

⁸ Noko mulaika wekanisa eyiri eSmurna usake uti: Ebinywa byowembere kandi ni wenyuma, oyu wabya aholire na lino abiriswabyaho, ati,

⁹ Nyinasi amalige wawe nobwera bwawe (nikwa uri webindu) neritsumwa nabakayahula mo baYuda nibya isibo, nikwa ini nyumba yerihindana ya Satani.

¹⁰ Subahe ebyo ebiri hakuhi erikwagalya. Lebaya, Satani iri hakuhi nerihira abandi bakwi nywe omo muliki, mulengaweko, mwasyabuga ebiro ikumi omwagalwa. Ubye butsira erisiganirya erihika oko luholo, nage nasyakuha embita yengebe.

¹¹ Oyu wite okutu owe ekyo eKirimu kikabuga nesyokanisa. Oyu kakinda siendisyagalwa noluholo lwakabiri.

Barua oko kanisa yePergamo

¹² Usake oko mulaika wekanisa eyiri Pergamo uti: Oyu wite omuyari owatwire owamuyi abiri akabuga ebinywa ati,

¹³ Nyasi aho wikere, ahari ekitumbi kyobwami kyeSatani; uhambire ndeke erina ryage mutagana erikirirya ryage omo biro bya Antipa omutuli womwatsi wage, mundu wage oyu tesiganiraya, oyu witirawa ewenyu, aho Satani ikere.

¹⁴ Nikwa ngwite emyatsi mike ukuwe yo ngapona: kusangwa uwite abandi eyo abakahamba erikangirirya ryaBalama, oyo wakangi riraya Balaka erihira ekyeritwikalya emuliro wabana baIsraeli, barye akaryo akahererawa oko sisumba nerisingira.

¹⁵ Ritya nawe unawite abandi abakahamba erikangirirya ryabaNikolayi.

¹⁶ Nibya ubinduke. Kitebya kitya nasyakuhikako luba nerilwa nabo omo muyari womo buno bwage.

¹⁷ Oyu wite okutu owe ebyo eKirimu kikabuga nesyokanisa. Oyu kakinda nasyamuha Mana owabisire, nasyamuha eribwe erikangabenie, erisakire kwerina rihyarihya eritasibwe nomundu iyono oyu rimayaryo.

Barua oko kanisa yeTuatera

¹⁸ Noko mulaika wekanisa eyiri Tuatera usake uti: oMugala woMungu, oyu wite ameso asosire ebirimi byomuliro, nebisandu biwe biringene nomulinge wenduku, akabuga ebinywa ebi ati:

¹⁹ Nyinasi emibiri yawe, nolwanzo lwawe nerikirirya nomu biri nerisika riteluha, nakandi emibiri yawe yenyuma ilengire eyerimbere.

²⁰ Nikwa ngwite ekyo ngapona ukuwe, ukaliga omukali Yezebeli, oyu kayahula mo muminyereri wobukali akakangiriraya neriteba abagombe bage erikola erisingira nerirya akaryo akakahererawa oko sisumba.

²¹ Monamuha omugulu weribinduka, nikwa aganire eribinduka okwisingira riwe.

²² Lebaya, nasyamugusa oko ngingo yerilwala, naba kateta haguma naye nasyagusabo omo malige manene, bama tindabinduka oko mibiri yiwe;

²³ nabana biwe nasitabo no luholo. Ne syokanisa syosi syasyaminya ko ndi ye oyu kalenga oburingikania nomutima, kandi nasyabaha oburi mundu okwi nywe nge mibiri yenyu itolere.

²⁴ Nikwa kwinywe abakisiya eTuatera, abate okwikangirirya eri, abatasi emyatsi yemitobero ya Satani ngoko bakanabuga, ngabuga nenyu nyiti, sihari gundi muheke nasyabahekya;

²⁵ gonoyu muhambe ndeke ebyo muwiteko, erihika aho nasyasira.

²⁶ Oyu kakinda noyu kabika emibiri yage akahika oko nduli, nasyamuha obukama oko bihanda,

²⁷ asyatabala kubo nomutso wekyuma, asyatulangabo ngesyonyungu syekitaka sikatulangawa mo bihandebihande, ngoko nage nabirihabwa amaka na Tata wage;

²⁸ kandi nasyamuha engununu yomo ngyakyangyakya.

²⁹ Oyu wite okutu, owe ebyo eKirimu kikabuga nesyokanisa.