Eribisurirwa 14 - Nouveau Testament et Psaumes en Ndandi Version 1962

Ekyana kyembuli nolwimbo luhyaluhya

¹ Neryo monalangira, talebaya, eKyana kyembuli mokya hangana oko kitwa kya Sioni, ihahangene haguma nakyo abandu elfu erigana namakumi ani nani ibawite erina riwe nerina ryise risakire omo masu wabo.

² Monowa omulenge akalwa elubula ngerihuha ryamagetsi mangi kandi ngomulenge womulumo munene; omulenge nowa abya ngomulenge waba wati bakawata esyonanga syabo,

³ ibakimba olwimbo luhya luhya embere wekitumbi kyobwami nembere yebihangikire bine nembere wabakulu. Sihari mundu wangiga olwimbo olo bana maelfu erigana namukumi ani nani abatongolibawa omo kihugo.

⁴ Aba babatayitsandaya haguma na bakali, kusangwa ni bakondo; aba banabo bakakwama eKyana kyembuli ehosi kikaya; aba babiritongolibwa omukati-kati kabandu ngebiguma byerimbere busana noMungu neKyana kyembuli,

⁵ neribiha moritabanika omo buno bwabo, kusangwa sibari ko bulema.

Engulu yeritswera

⁶ Neryo monalangira ogundi omulaika akaguluka omo kyanya, iniawite oko ngulu yakera nakera eritulirago abikere omo kihugo, oko buri kihanda noburi kitunga noburi mubuge noburi bandu;

⁷ kandi mwabuga nomulenge munene ati, Mubahe Mungu mumuhe olukengerwa, kusangwa endambi yeritswera riwe yamabihika; mukukamire oyo wahangika olubula ne kihugo, nengetsi nesisoko syamagetsi.

⁸ Nogundi mulaika, owakabiri, mwakwama ati, Aterire, aterire, Babeli munene, oyo waleka ebihanda byosi ibyapulya ebinyo byesyongumbu syerisingira ryago.

⁹ Nogundi mulaika, owakasatu, mwakwama, mwabuga nomulenge munene ati, Omundu amakukamira enyama eyo nolusumba lwayo, amanirwa kwekiminyikalo kyayo omo busu buwe kutse oko byala,

¹⁰ asyapulya nibya oko binyo byeri hitana ryoMungu, ebyabiriutwa omo lutehi lweriagalirwa riwe ebitatulungene omo bindi, kandi asyagalwa nomuliro nobu singo embere wabalaika ababuyirire nembere weKyana kye mbuli.

¹¹ Omuki weriagalwa ryabo rikahetuka kera na kera; isibeluhuka omwitungi nomo kiro, abakakukamira enyama eyo nolusumba lwayo, noburi mundu oyu kimaya ekiminyikalo kyerina ryayo.

¹² Hano ho hari Erisika ryababuyirire, abakabika ebihano byoMungu nerikirirya rya Yesu.

¹³ Monowa omulenge akalwa elubula ati, Usake eki: Omu yisa ari nabaholi bakahola omwisi woMukama eritsuka lino. EKirimu kiti, Omuyisa kundu, ibatoka eriluhuka oko mibiri yabo, nemibiri yabo ikakwamabo!

Erigesa rye kihugo

¹⁴ Neryo monalangira, talebaya, ekitu kyerokyero, noyu sosire omugala womundu inianikere oko kitu ekyo, iniambite embita ye zahabu oko mutwe wuwe, iniawite oko mutemi omo byala biwe.

¹⁵ Nogundi mulaika mwalwa omo hekalu, akabiri kira nomulenge munene kwoyo wikere oko kitu ati, Hira mutemi wawe, ugese, kusangwa endambi yerigesa yamahika, kusangwa erihulula rye kihugo ryamera kundu.

¹⁶ Neryo oyu wikere oko kitu mwatema e kihugo nomutemi wuwe, ne kihugo mokyageswa.

¹⁷ Nogundi mulaika mwalwa omo hekalu omo lubula, naye iniawite omutemi atalirye.

¹⁸ Neryo ogundi mulaika mwalwa aheriherera, omulaika oyu wite obutoki busana nomuliro, naye mwabirikira nomulenge munene kwoyo wite omutemi owatalirye ati, Uhire omutemi wawe, utwe ebiguma byebinyo bye kihugo, kusangwa ebiguma ebyo byerire.

¹⁹ Neryo omu laika mwatema e kihugo nomutemi wuwe mwakumakuma ebiguma bye kihugo, mwagusabyo omo muhe munene werihi tana ryoMungu;

²⁰ Nomuhe mwakamirwamo ekyaswa kyomuyi, nomusasi mwasenda erilwa mo muhe, erihika oko mikoba eyomobikya byesyofarasi, ngolugendo lwa kilometres amagana asatu namakumi abiri.