Eribisurirwa 13 - Nouveau Testament et Psaumes en Ndandi Version 1962

Enyama ikalwa omo ngetsi

¹ Monalangira enyama ikahuluka erilwa omo ngetsi, iniwite amahembe ikumi nemitwe irinda, nesyombita ikumi oko mahembe wayo nerina ryeritsuma oko mitwe yayo.

² Nenyama eyo nalangira yabya ngesoro, ebisandu byayo byabya ngebye dubu, nobuno bwayo ngo bwendale. Nekiyoka ekyo mokyahayo akagala kakyo nekitumbi kyakyo kyobwami nehamuli nene.

³ Omutwe muguma wayo abya ngakwire ekironda kyeriholyayo, nikwa ekironda kyeriholyayo mokyabala, ne kihugo kyosi mo kyakwama enyama eyo nerisweka.

⁴ Abandu mobakukamira ekiyoka ekyo, kusangwa mokyaha enyama eyo ehamuli yakyo, mobakukamira enyama eyo, bati Nindi aringene nenyama eyo, kandi nindi wangalwa nayo kwehi?

⁵ Nenyama eyo moyahabwa obuno bukabuga ebyepono nebyeritsuma, kandi moyahabwa ehamuli yerikola emibiri yayo emikera amakumi ani nibiri;

⁶ moyakumbula obuno bwayo eritsuma Mungu, neritsuma erina riwe neheriikala riwe, nabikere elubula.

⁷ Kandi moyahabwa ehamuli yerilwa naba buyirire nerikindabo. Kandi moyahabwa ehamuli oko buri kihanda nabandu nemibuge nekitunga,

⁸ nabosi abikere omo kihugo basyakukamirayo, oburi mundu oyo tawite erina riwe erisakire embere wekibanza kye kihugo omo kitabu kyengebe kyeKyana kyembuli ekyakerawa.

⁹ Omundu amabya awite okutu, owe:

¹⁰ Omundu amahambwa eritwalwa mo muliki, akaya mo muUki; Omundu amita omo muyari, naye atolere eriitwa omo muyari. Eri ni birikara busana nerisika nerikirirya ryababuyirire.

Enyama ya kabiri 666

¹¹ Nibya monalangira eyindi enyama eyahangana erilwa omo kihugo; yabya iwite amahembe abiri ngekyana kyembuli kandi moyabuga ngekiyoka.

¹² Ikakola nehamuli yosi yenyama yerimbere omo meso wayo, ikaleka e kihugo nabikeremo ibaku kamira enyama yerimbere eyalama ekironda kyeriholya.

¹³ Ikakola ebitikotiko binene, nibya ikandagalaya omuliro erilwa elubula akagwa omo kihugo oko meso wabandu;

¹⁴ ikateba abandu abikere omo kihugo busana nebitikotiko ebyo yahabawa erikola embere wenyama eyo, ikabwirabo iti bakokotaye olusumba busana nenyama eyahutala ekironda kyomuyari moyabyaho;

¹⁵ moyahabwa eriha omuka omo lusumba olo lwenyama iti lubuge, kandi moyaleka abosi abagana erikukamira olusumba lwenyama eyo ibitwa.

¹⁶ Kandi ikaleka abosi abakebake nabanenebanene, abebindu nabera, abakayigenderaya nabakobe, basakawe oko byala byamali kutse omo busu,

¹⁷ kyaleka hatabya omundu akatoka erigula kutse erigulya ate nekiminyikalo, rye ni rina ryenyama eyo kutse eriganza ryerina ryayo.

¹⁸ Eki kikasonda amenge: Oyu awite amenge aganze eriganza eryo ryenyama eyo, kusangwa ni ganza ryomundu, eriganza ryayo ni magana ndatu namakumi ndatu nendatu.