Eribisurirwa 12 - Nouveau Testament et Psaumes en Ndandi Version 1962

Omukali nenzoka

¹ Nekitikotiko kinene mokyahuluka elubula, omukali ini ambite eryuba, omukera iniane omwisi syebisandu biwe, noko mutwe wuwe habya embita yesyongununu erikumi nemibiri;

² naye abya mukule, neryo mwalaka nerikunda, iniakagalawa akabuta.

³ Nekindi kitikotiko mokyahuluka elubula; talebaya, ekiyoka kinene kyengula, ikiwite emitwe irinda namahembe ikumi, nesyombita sirinda oko mitwe yakyo.

⁴ Omukira wakyo mwakumula ekiguma kyebisatu kyesyongunu syomo lubula, mwagusasyo omo kihugo. Nekiyoka ekyo mokyahangana emuliro womukali oyu kasonda eributa omwana, ikyatoka erirya omwana wuwe abimubuta;

⁵ naye mwabuta mwana wobulume oyo wasyasinga oko bihanda nomutso we kyuma, nikwa omwana wuwe mwabatulwa endata oko Mungu noko kitumbi kiwe kyobwami,

⁶ nomukali oyo mwasagira omo mbwarara, eyo awite ahakokoteribawa noMungu, ahasyaherwa akaryo ebiro elfu nguma namagana abiri namakumi endatu.

Erikindwa ryenzoka yakera

⁷ Neryo amalwa mwahuluka elubula, Mikaeli nabalaika buwe bakalwa nekiyoka; nekiyoka ekyo nabalaika bakyo mobalwa,

⁸ nikwa mobakindwa mohata swabanika omwanya busana nabo elubula.

⁹ Nekiyoka kinene ekyo mokyaguswa ahisi, ekiyoka kyakera, kikahulawa mo Diabolo, na Satani, omutebya weki hugo kyosi—mokyaguswa ahisi omo kihugo, nabalaika bakyo mobaguswa ahisi haguma nakyo.

¹⁰ Nage monowa omulenge munene omo lubula, ati, Lino erilama namaka nobwami bwoMungu wetu nehamuli ya Kristo wuwe byabirihika, kusangwa omutsongeri wabagala betu amabiguswa ahisi, oyu katsongerabo omwitungi nomo kiro embere syoMungu wetu.

¹¹ Babirimukinda omo musasi weKyana kyembuli nekinywa kyeritulago ryabo, kusangwa mobatalanda oko ngebe yabo erihika okwihola.

¹² Neryo uwe lubula ninywe mwikeremo mutseme! Nikwa obulige kwinywe, uwe kihugo nengetsi, kusangwa Diabolo abiribandagalirako iniari nerihitana rinene, kusangwa anasi mugulu wuwe ni mukuhi!

Obutsibu bwekiyoka

¹³ Nekiyoka ekyo kyabere kyalangira kyaguswa omo kihugo, mokyatibita oko mukali oyo wabuta omwana wobulume.

¹⁴ Nikwa omukali mwahabwa ebipupa bibiri byerisamba inene iniatoka erigulukira omo mbwarara erilwa oko kiyoka ekyo, ahakandiherwa karyo omugulu nemigulu nakahindi komugulu.

¹⁵ Nekiyoka ekyo mokyuta amagetsi owaringene nolusi erilwa omo buno bwakyo omukali oyo asendibawe omwigunga eryo.

¹⁶ Nikwa e kihugo mokyawatikya omukali, ne kihugo mokya tanda obuno bwakyo mokyamera olusi olo ekiyoka kyutula omo buno bwakyo.

¹⁷ Nekiyoka mokyahitana oko mukali, mokya yalwa nolubuto luwe abakisiya, abakabika ebihano byoMungu nabakaheka eritulago rya Yesu.

¹⁸ Naye mwahangana oko misege yengetsi.