Eribisurirwa 1 - Nouveau Testament et Psaumes en Ndandi Version 1962

Eribisula ryaYesu Kristo

¹ Eribisurirwa rya Yesu eryo Mungu amuha erikangya oko bagombe buwe emyatsi eyitolere erisyabyaho luba; kandi mwaminyikalyayo akatuma omulaika wuwe oko mugombe wuwe Yoane;

² oyo watula omwatsi oko kinywa kyoMungu neritulago rya Yesu Kristo, busana nebyosi alangira.

³ Ari nomuyisa oyu kasoma anemosumba omulenge ebinywa byo buminyereri, nomuyisa ari na bakowa, na bakabika ebisakire mubyo; kusangwa endambi iri hakuhi.

Alfa na Omega

⁴ Ingye Yoane oko syokanisa sirinda esiri eAsia: Olukogo lubye kwinywe nobuholo bikalwa kwoyuriho kandi anabyaho nakandi oyu kandisyasa, bikalwa noko birimu birinda ebiri emuliro wekitumbi kiwe kyobwami,

⁵ kandi bikalwa ku Yesu Kristo omutuli womwatsi oyu tebirirawa, akambere koko baholi, nomutabali wabami bomo kihugo. Kwoyo watwanza noyo watubohola oko bibi byetu omo musasi wuwe

⁶ mwatuyira mo bwami, abahereri oko Mungu wuwe nIse; olukengerwa neritabala bibye biwe na kera na kera. Bibye bitya.

⁷ Talangira, akasa omo bitu, noburi riso ryasya mulebya, noburi mundu oyo wamutsimita; kandi nebihanda byosi byamuna kihugo byasyasusumana busana naye. Ritya. Bibye bitya.

⁸ Ingye ndi Alfa na Omega, eritsuka nenduli, oMukama Mungu atya, oyuriho, kandi oyu wabyaho, noyu kandisyasa, oWamaka gosi.

Eriminyikala rya Yesu uku Yoane ePatemo

⁹ Ingye Yoane, mugala wenyu, oyu kasangira nenyu amalige nobwami nerisika eriteluha, omwisi wa Yesu, nabya oko kitsira ekikahulawa mo Patemo busana nekinywa kyoMungu neritulago rya Yesu.

¹⁰ Oko kiro kyoMukama nabya omo kirimu, kandi monowa enyuma kwingye omulenge munene ngengubi

¹¹ ati, Usake omo kitabu ekyo ukalangira utumekyo oko syokanisa sirinda, esiri Efeso na Smurna, na Pergamo, na Tuatera, na Sardi, na Filadelfia, na Laodikia.

¹² Neryo monakeba erilangira omulenge owabuga nage, nerikeba monalangira ebikahamba esiseke sirinda byezahabu,

¹³ nomokatikati kebikahamba esiseke monalangira oyu sosire omugala wo mundu, iniambite olukimba luri nobupa omo kikuba kiwe;

¹⁴ omutwe wuwe nesyonswiri siwe ibihenirye ngobweya bwembuli obuhenirye, obweru-bweru ngenzururu; ameso wuwe abya ngebirimi byomuliro,

¹⁵ nebisandu biwe byabya ngo muringa owenduku, owabirieribwa omo muliro womo luhitsa, nomulenge wuwe abya ngo mulenge wamagetsi mangi;

¹⁶ neryo mwahamba omo byala biwe byamali esyo ngununu sirinda, nomuyari owatwire owamoya biri mwalwa omo buno buwe, nobusu buwe bwabya ngeryuba erikakoleraya na maka waryo gosi.

Esyongununu nesiseke sirinda

¹⁷ Nabere namulolako, monagwa ahisi oko bisandu biwe ngoyu holire. Nikwa mwambira kwebyala biwe byamali, ati, sigubahe, Ingye ndi werimbere nowenyuma,

¹⁸ kandi oyuriho; Nabya nyiholire, lebaya nyiriho nakera nakera, kandi ngwite ebibohori byoLuholo nebyeKurimu.

¹⁹ Lino usake ekyo ukalangira, ekiriho lino nebyasyakwama enyuma kwaho.

²⁰ Nikwa busana nekibisamire kyesyongununu sirinda esyo walangira omo byala byage byamali, nebikahamba esiseke sirinda byazahabu, esyongununu sirinda ni bamalaika besyo kanisa sirinda nebikahamba esiseke birinda syo kanisa sirinda.