Emibiri 9 - Nouveau Testament et Psaumes en Ndandi Version 1962

Olugendo lwaSaula eDamasiki

¹ Nikwa Saula, iniakinahumulikana eriubahya neriita biga boMukama, mwaya oko muhereri mukulu;

² mwamusaba esyobarua oko manyumba awerihindanamo aweDamasiki ati, amalangira abeNzira eyo, abalume kutse abakali, inialetabo eYerusalema ibanabohire.

³ Neryo abere akagenda asonda erihika eDamasiki, neryo-neryo ekyakakala erilwa elubula mokyamukoleryako.

⁴ Neryo mwagwa ahisi mowa omulenge akabuga naye, ati, Saula, Saula, busana naki ukanyendereraya kwehi?

⁵ Naye ati, Kuwendi Mukama kwehi? Naye, ati, Indi Yesu, oyu kendereraya;

⁶ nikwa hangana wingire omo muyi, wasyabwirwa ebyo utolere erikola.

⁷ Nabalume abagendanaya naye mobahangana bukutu, ibakowa omulenge, nikwa sibeta langira mundu.

⁸ Neryo Saula mwalwa oko kitaka; abere alibula meso, mwatalola kuki; mobamusondolya omo byala mobamutwala eDamasiki.

⁹ Noko biro bisatu mwabya butsira erilangira, kutse erirya kutse eripulya.

Saula na Anania

¹⁰ Neryo habya omwiga eDamasiki oyu wahulawa mo Anania. OMukama mwabuga naye omunzoli, ati, Anania. Naye ati, Lebaya, Nandi hano Mukama.

¹¹ NoMukama mwa buga naye, ati, Hangana, ugende omu nzira ikahulawa mwi Tunganene, usondere omu nyumba ya Yuda omundu weTarso akahulawa mo Saula; kusangwa lebaya, anemosaba,

¹² iniabi rilola oko mundu oyu kahulawa mo Anania akingira nerimuhira kwe byala neribuga abane kandi erilangira.

¹³ Nikwa Anania mwasubirya, ati, Mukama, nabiriowa engulu yomundu oyu uku bangi, ngoko abirikola ababuyirire bo nabi nyingi eYerusalema;

¹⁴ na hano awite ehamuli ikalwa oko bahereri bakulu eriboha abosi abakabirikira oko rina ryawe.

¹⁵ Nikwa Mukama mwabuga naye ati, Genda, ku sangwa mundu oyu ni kindu kyeriyisoga kyage eriheka erina ryage embere weBihanda nabami nabana baIsraeli;

¹⁶ ku sangwa nasyamukangya ngoko asyagalwa busana nerina ryage.

¹⁷ Neryo Anania mwalwaho mwingira omo nyumba, mwa muhira kwebyala biwe, ati, Saula, muli kyetu, oMukama Yesu oyo wakubutukira omo nzira wasiramo, abirinyituma ati utoke kandi eribana erilangira ryawe nerisulibwa neKirimu Kibuyi rire.

¹⁸ Neryo-neryo ebindu biringe syonguku mobyatoga oko meso neryo mwaswabana erilangira. Neryo mwahangana mwa batisibwa:

¹⁹ neryo mwarya karyo mwabana maka. Mwikala nabiga ebiro bike eDamasiki.

²⁰ Neryo-neryo omo manyumba werihindana mwatula engulu ya Yesu, ati, Oyu ni Mugala woMungu.

²¹ Nabosi bamowa mobasweka, bati, Oyu si yo mundu waheraya abahula erina eri eYerusalema kwehi? abiriasa eno busana nomwatsi oyu eritwalabo ibanabohire embere syabahereri bakulu.

²² Nikwa Saula mwalabyaho eribya namaka, mwasinga baYuda ababya bikere eDamasiki erikangyabo ko Yesu yona Kristo.

Embita yabaYuda eriita Saulo

²³ Habere hahwa biro bingi abaYuda mobaya mbita yeri mwita,

²⁴ nikwa embita yabo moyaminyikala uku Saula. Mobategerya oko malimbo omwitungi nomo kiro, busana nerimwita;

²⁵ nikwa abiga biwe mobamutwala omo kiro mobamwandagalya omo kitiri oko luhimbo.

²⁶ Neryo abere ahika eYerusalema, mwalenga eriyihira oko biga; nabosi mubamubaha, mobatikirirya kwari mwiga.

²⁷ Nikwa Barunaba mwamwimya mwamuleta oko bakwenda, mwakaniryabo ngoko alola oko Mukama omo nzira, kandi kwabuga naye, kandi ngoko atula engulu omo rina rya Yesu butsira eriubaha oko Damasiki.

²⁸ Nibya mwabya nabo eYerusalema iniakasiba nabo eriingira nerihuluka,

²⁹ eritula engulu yowene omo rina rya Yesu butsira eriubaha; mwabuga nerikuba obuhaka nabaYuda ababya baGiriki; nikwa moba sonda erimwita.

³⁰ Nikwa balikyetu babere baminya, moba mutwala eKaisaria, mobamutuma eTarso.

³¹ Nekanisa eYudea ehosi neGalilaya ne Samaria moyabya nobuholo moyahimbwa; nerilendera omubaha ryoMukama nomwisibikya ryeKirimu Kibuyirire moyatomekerwako.

Petero eLuda neYopa

³² Nikwa Petero mwalendera ehosihosi omukati-kati kabo bosi, mwandagalira oko babuyirire ababya bikere eLuda.

³³ Neyo mweya mundu oyu kahulawa mo Ainea, oyo wabya inialwere omo ngingo yiwe emituta munane abya abasire.

³⁴ Petero mwabuga naye, ati, Ainea, Yesu Kristo akakulamaya; hangana usese engingo yawe. Nendambi eyo mwahangana.

³⁵ Nabosi babya bikere eLuda ne Saroni mobamulolako, mobabindukira oMukama.

Tabita mwalubukibwa

³⁶ Nikwa habya omwiga muguma eYopa, erina riwe Tabita, eribindula ambu Dorika, kutse Saswe: omukali oyo abya uswire nemibiri yowene yolwanzo.

³⁷ Oko biro ebyo mwalwala, mwahola; babere babimukosa, mobamuhira omwendata.

³⁸ Kusangwa Luda yabya hakuhi na Yopa, abiga mobowa ko Petero ariyo, mobamutumako abandu babiri erimugonga-gonga bati, Wase kwitwe, sulindirire.

³⁹ Neryo Petero mwahangana mwagenda nabo. Neryo abere ahikayo, mobamutwala omo nyumba mwendata. Nabakwakali bosi mobimana hakuhi naye ibanemurira nerimukangya esyokanzo nesyongimba esyo Dorika akakokotaya akine nabo.

⁴⁰ Nikwa mwahirabo bosi eyihya mwakukama mwasaba; neryo mwabindukira kinda ati, Tabita, hangana. Naye mwalibula meso, neryo abere alangira Petero mwayikukuma mwikala.

⁴¹ Neryo mwamuha ebyala biwe mwamuhangania; abere abibirikira ababuyirire na bakwakali mwamukangyabo inianeho.

⁴² Nekyo mokyaminyikala eYopa hosi, nabangi mobikirirya oMukama.

⁴³ Naye mwikala eYopa biro bingi omwa Simoni, mubambi.