Emibiri 7 - Nouveau Testament et Psaumes en Ndandi Version 1962

Setefano emuliro wabakulu

¹ Nomuhereri mukulu mwamubulya, ati, Emyatsi eyi ne kwenene kwehi?

² Naye mwabuga ati, Abagala betunabotata muhulikirire: OMungu wolukengerwa mwabutukira tata wetu Abrahamu, omugulu abya eMesopotamia, abya isiariikala eHarani,

³ mwamubwira, ati, Ulwe omo kihugo kyawe, nomo kihanda kyawe, wase omo kihugo ekyo nasyaku kangya.

⁴ Neryo mwalwa omo kihugo kyeKaldea, mwikala eHarani: nerilwa eyo, ise aberebihola Mungu mwamuhumirya omo kihugo kino aho inywe mwikere lino:

⁵ neryo mwatamuha omwandu mukyo, kutse naherihira ekisandu kiwe: kandi mwalaga erimuhakyo iniabya mwenyekyo, noko lubuto luwe isiariabuta mwana.

⁶ NoMungu mwabuga ati, olubuto luwe lukandisyalendera omo kihugo kigeni, ibakandisyahirabo mo muliki nerikolabo nabi emituta amagana ani.

⁷ Nekihanda ekyo ekikandisyahirabo mo muliki Mungu ati, nasyatswerakyo: nenyuma waho basyalwamo basyanyikolera hano.

⁸ Neryo mwamuha erilagana ryeribania: nAbrahamu mwabuta Isaka, mwamubania omo kiro kyomunani; na Isaka mwabuta Yakobo, na Yakobo mwabuta abosokulu erikumi na babiri.

⁹ Nabo sokulu busana nobuha uku Yosefu mobamugulya eMisiri: noMungu mwabya naye,

¹⁰ nerimulamya omo malige wuwe gosi, kandi mwamuha erisimwa na menge embere syaFarao omwami weMisiri; kandi mwamuyira omutabali mukulu endata weMisiri nenyumba yiwe yosi.

¹¹ Neryo enzala moya hika eMisiri neKanana nobulige bunene: na botata wetu mobatabana ekyerirya.

¹² Nikwa omugulu Yakobo owa kohari akaryo eMisiri, mwatuma abotata wetu engendo yerimbere.

¹³ Noko ngendo yakabiri Yosefu mwaminyikala ku bagala babo; nekitunga kyaYosefu mukyaminyikala ku Farao.

¹⁴ Na Yosefu mwatumira kwise mwabirikira Yakobo ise wuwe, nekitunga kiwe, abandu makumi arinda nabatano.

¹⁵ Na Yakobo mwa ndagarira eMisiri; mwahola, iye nabotata wetu;

¹⁶ neryo mo babya bakahekerwa eSekemu mobahirwa omwisinda Abrahamu agula omo buguli bwesyofranka syekitsipa ku bagala baHamori eSekemu.

¹⁷ Nikwa endambi yerilaga yasonda erihika eyo Mungu alahiriraya Abrahamu, abandu mobakanya mobabya bangi eMisiri,

¹⁸ erihika aho ogundi mwami asyasingira eMisiri, oyu tasi Yosefu.

¹⁹ Iye mwayira menge weriherya kitunga kyetu, mwayira abotata wetu bo nabi, ati baguse abana babo bahole.

²⁰ Noko mugulu oyo Musa mwabutwa ini mubuya kundu; mobamulembera omu nyumba yise emikera isatu:

²¹ abere abiguswa, mwali waFarao mwamwimya, mwa mulembera eribya mugala wuwe.

²² Na Musa mwakangiriribwa omo menge gosi wabanyaMisiri; mwayira maka omo binywa biwe nemibiri.

²³ Nikwa emituta yiwe yasonda eribya makumi ani, olukando molwingira omo mutima wuwe lweriyalola ku balikyabo abana beIsraeli.

²⁴ Nerilangira oko muguma akaga libwa buyira, mwamwimira, mwakisya oyo wabya akagalibwa, mwaswirya munyaMisiri:

²⁵ iniakaganiraya ati balikyabobangaminya ko Mungu akatongolayabo omo byala biwe; nikwa mobataminya batya.

²⁶ Nengyakya mwahuluka kubo ibakalwa, mwalenga erisanganiabo, ati, Bakama, mubutirwe haguma; busana naki mukakolana nabi kwehi?

²⁷ Nikwa oyo wakola muli kyabo yo nabi mwamukuna, ati, Nindi wakuyira mo murongani nomutsweri okwitwi kwehi?

²⁸ Wanzire erinyita ngoko wita omunyaMisiri muligolo kwehi?

²⁹ Musa abere abiowa eKinywa eki mwatibita mwabya mugendigendi omu kihugo kyeMidiana, mwabutirayo abagala babiri.

³⁰ Nomugulu emituta makumi ani yabere yabihwa, omulaika mwamubutukira omu kirimi kyomuliro omo kisaka omo mbwarara yoko kitwa kyaSinai.

³¹ Na Musa abere alebyago, mwasweka erilola kugo: nomugulu asegera eriyitegererya, omulenge woMukama mwasa, ati,

³² Ingye ndi Mungu wabotata wawe, Mungu wa Abrahamu, na Isaka, na Yakobo. Musa mwatitimana, mubaha erilangira.

³³ NoMukama mwabuga naye, ati, Lusaya esyo ngendero oko bisandu byawe: kusangwa aho uhangene ni kitaka kibuyirire.

³⁴ Nabirilangira kwenene amalige wabandu bage abari Misiri, nabiriowa erisimba ryabo, kandi nabirikima eri tongolyabo: na lino wase, ngakutuma eMisiri.

³⁵ Musa oyo bagana bati, Nindi wamakuyira mo murongani no mutsweri kwehi? Mungu atuma eribya murongani nomutongolya omu byala byomulaika oyo wamubutukira omo kisaka.

³⁶ Omundu oyo mwasondolobo, iniamabikola ebyeriswekera nebiminyikalo omo kihugo kyeMisiri, omo ngetsi yengula, nomo mbwarara emituta makumi ani.

³⁷ Oyo ni Musa, oyo wabuga na bana baIsraeli, ati, Mungu asyabahanganirya omuminyereri akalwa omukati-kati ka balikenyu, oyu ringa ngye.

³⁸ Oyo ni ye oyo wabya omo kanisa omo mbwarara haguma nomulaika oyo wabuga naye oko kitwa kyaSinai, haguma nabotata wetu: oyo wangirira amahano wengebe nerituhago:

³⁹ yoyo abotata wetu bagana eriowa, yobakuna erilwa kubo mobasuba eMisiri omo mitima yabo,

⁴⁰ mobabwira Haroni, bati, Utukokoteraye emiungu eyasyatusondolera: kusangwa Musa oyu watusondo lera erilwa omo kihugo kyeMisiri, sitwasi kwabere.

⁴¹ Moba kokotya enyana yende oko biro ebyo, mobaleta obuhere oko lusumba olo, mobatsema omo mubiri webyala byabo.

⁴² Nikwa Mungu mwabinduka, mwahabo erikolera emilondo yomokya nya; ngoko kisakiri omu kitabu kya baminyereri, kiti, Enyumba ya Israeli Momwanyiherera esyonyama esikerire namahere Emituta amakumi ani omo mbwarara kwehi?

⁴³ Momwaheka ehema ya Moloki, Nengununu yomungu Pafoni, Nesisumba esyomwabumba erikukamira Nage nasyabahumirya eyisirya yeBabeli hali.

⁴⁴ Abotata wetu babya bawite ehema yeritulago omo mbwarara, ngoko ategeka oyo wabuga na Musa ati akokotayeyo, ngomu sindo alolako.

⁴⁵ Abotata wetu nabo mobaletayo haguma na Yosua bamabihiga eBihanda ebyo Mungu akuna eyihya embere wabotata wetu erihika oko mugulu wa Dawidi,

⁴⁶ oyu wabana erisimwa omo meso woMungu, neryo mwabulya eribanira Mungu wa Yakobo aheriikala.

⁴⁷ Nikwa Solomono mwabya iyo wahimba enyumba busana naye.

⁴⁸ Nikwa owendata kutsibu siarikala mu manyumba akahimbawa mo byala; ngoko muminyereri akabuga, ati,

⁴⁹ Elubula ni kitumbi kyage kyobwami, Ne kihugo ni kitumbi kyebisandu byage, Enyumba yahi mwasyambimbira, OMukama akabuga, Kutse aheriluhukira hage ni hahi kwehi?

⁵⁰ Ebyala byage byobitakola ebi byosi kwehi?

⁵¹ Inywe bandu bebikya bibasire, bomutima namatwi bita bwene, ebiro byosi mukalwa neKirimu Kibuyirire: ngoko abotata wenyu bakola, nenyu mukakola mutya.

⁵² Nindi oko baminyereri oyo abotata wenyu batendireraya kwehi? Kandi mobita abatsuka eritulago oweriasa ryoyo Tunganene, oyo mwahotela neriita,

⁵³ inywe mwangirira amahano owaletawa nabalaika, nenyu momutateyago.

Erikwa rya Setefano omo mabwe

⁵⁴ Nikwa omugulu bowa emyatsi eyi mobahitana, moba mukegetera ameno wabo.

⁵⁵ Nikwa iye iniuswire neKirimu Kibuyirire, mwasamarira omo lubula mwalangira olukengerwa lwoMungu, na Yesu inanimene oko byala byamali byo Mungu;

⁵⁶ mwabuga, ati, Lebaya, namalebya olubula ilunakingwire, noMugala womundu ahangene oko byala byamali byo Mungu.

⁵⁷ Nikwa mobabuya olukanda nerisumba mirenge mobaliba matwi mobamugulukira igumaguma.

⁵⁸ Neryo mobamugusa eyihya oko muyi mobamwita omo mabwe; nabalangiri mobahira esyongimba syabo oko bisandu byomulwana oyu kahulawa mo Saulo.

⁵⁹ Nomugulu bita Setefano omo mabwe, mwasaba, ati, Mukama Yesu, angirira ekirimu kyage.

⁶⁰ Neryo mwaku kama mwabuga nomulenge munene, ati, Mukama, suganzire kubo kwe kibi eki. Abere abibuga eki mwagotsera.