Emibiri 4 - Nouveau Testament et Psaumes en Ndandi Version 1962

Petero na Yoane embere syabakulu

¹ A Nomugulu babuga na bandu, abahereri nomukulu wehekalu nabaSadukayo mobasa aho bari,

² ibamabyagarirwa kubo kusangwa bakangiriraya abandu, neritulago kwerilubuka rya baholi riri omwisi wa Yesu.

³ Neryo mobatsimbabo, moba hirabo omo muliki erihika omungyakya: kusangwa bwabya igologolo.

⁴ Nikwa bangi bukwabo abowa mobikirirya; neriganza ryabalume ryabya nga elfu tanu.

⁵ Neryo engyakya, abarongani babo, nabakulu nabasaki mobahindana eYerusalema;

⁶ na Ana muhereri mukulu, na Kayafa, na Yoane, na Alesandura, nabo mo kihanda kyosi kyomuhereri mukulu.

⁷ Neryo babere babihirabo omukati kati, mobabulyabo, bati, Mo kagala kahi, kutse omo rina ryahi, byamabaha erikola eki kwehi?

⁸ Neryo Petero iniuswire ne Kirimu Kibuyirire, mwabwirabo, ati, Inywe barongani ba bandu, na bakulu,

⁹ twamabulibwa munabwire busana nomu biri owene akolawa oko kirema, nga ni musindo wahi omundu oyu alamibawamo;

¹⁰ muminye inywe bosi, nabandu bosi beIsraeli, omo rina rya Yesu Kristo we Nazareti, oyo mwa bamba oko muti, oyo Mungu alubukaya oko baholi, omwisi wuwe omundu oyu akahangana hano emuliro wenyu iniama lama.

¹¹ Iye nibwe eryaponawa ninywe bahimbi, eryayirawa mo mutwe wengonde.

¹² Nerilama siriri mugundi: nibya sihari rindi rina eyikwa oko butuku, erikahabawa abandu eritolere itwangalamibwamo.

¹³ Neryo omugulu balangira obutubaha bwa Petero na Yoane, kandi mobaminya ko batakangiriribawa, kandi kobate bamenge, mobasweka; mobibukabo kobabya haguma na Yesu.

¹⁴ Nerilangira omundu oyo walamibawa inianimene haguma nabo, mobataluka eribuga kinywa.

¹⁵ Nikwa omugulu babere abibitegekabo eriya eyihya okwibugiro, mobakania omukati kati kabo,

¹⁶ bati, Twasyakolaki oko bandu aba kwehi? kusangwa kwenene ekitikotiko kiminyikere kyabirikolwa nabo, kiminyikere oko bosi bikere eYerusalema; sitwenditoka eriga nakyo.

¹⁷ Nikwa sikitsungane kwilaba aho omukati-kati kabandu, tubahirirayebo, sibaswebuga nomundu omo rina eri.

¹⁸ Neryo mobaswabirikirabo, mobategekabo bati sibabuge kutse erikangirirya omo rina rya Yesu.

¹⁹ Nikwa Petero na Yoane mobasubiryabo, bati, Ryamabya ryowene omo meso woMungu eribowa kwilaba Mungu, inywe mutswere:

²⁰ ku­sangwa sitwangatoka eribuga bye nebyo twabirilolako nebyo twabiriowa.

²¹ Nabo babere babisubahiriryabo, mobalekabo erigenda, ibakabula ko bangasuyirabo, busana nabandu; ku­sangwa bandu bosi mobapipa Mungu, busana nekyakolawa.

²² Kusangwa emituta yomundu oyo akolerawa ekitikotiko eki kyerimulamya yabya kwilaba mituta makumi ani.

Erisaba

²³ Neryo bamabilwikwa, mobasa oko ndeko yabo, mobatula ebyosi abahereri bakulu na bakulu babuga nabo.

²⁴ Neryo babere bowabyo, mobasumba omulenge wabo oko Mungu nomutima muguma, bati, Uwe, Mukama, mowakola olubula ne kihugo nengetsi, nebyosi ko birimo:

²⁵ mowabuga omobuno bwatata wetu Dawidi omugombe wawe, busana ne Kirimu Kibuyirire, uti, Busana naki ebihanda byahitana, Nabandu mobaganirya emyatsi buyira kwehi?

²⁶ Abami be kihugo mobasika, Nabarongani mobahindana haguma, Eriya embita yerilwa noMukama na Kristo wuwe:

²⁷ kusangwa kwenene omo muyi oyu Herode na Pontio Pilato, neBihanda nabandu baIsraeli mobahindana haguma erilwa noMwana wawe oyu buyirire, oyo wahakabaya,

²⁸ erikola ebyo ebyala byawe nerihana ryawe ryategeka erimbere eribererera.

²⁹ Na lino, Mukama, usamarira eryubahirirya ryabo: uhe abagombe bawe babuge eKinywa kyawe neritindiubaha ryosi,

³⁰ unemokakya okuboko kwawe erilamya; nebitikotiko nebye riswekera bikolawe omo rina ryoMwana wawe Yesu oyu buyirire.

³¹ Neryo babere babisaba, aho bahindene mohatsuka sukanibwa; nabosi nobusulibwa neKirimu Kibuyirire, moba buga eKinywa kyoMungu neritindiubaha.

³² Nendeko yabikiriraya moyabya nomutima muguma neki rimu kiguma: isihari muguma wakubo oyo wabuga ati bindu biwe ni biwe iyowene; nikwa mobasangira ebyosi.

³³ Naba kwenda mobatulago namaka manene owerilubuka ryoMukama Yesu: nolukogo lunene molwabya oko bosi.

³⁴ Kandi moha taswabya muguma wa kubo ukabula kindu: kusangwa abosi ababya bawite bitaka kutse amanyumba mobagulyabyo, moba leta obuguri bwebindu ebyaguribawa,

³⁵ mobahirabo oko bisandu byabakwenda: mobyagabirwa oko buri mundu ngoko bimutolere.

³⁶ Yosefu oyo wahulawa nabakwenda mo Baranaba (riringene neribindula, ambu, Mugala werisibikya) omuLawi, omundu wekihanda kya Kipuro,

³⁷ iniawite eririma mwaguryaryo, mwaleta obuguri bwaryo mwahirabo oko bisandu byabakwenda.