Emibiri 28 - Nouveau Testament et Psaumes en Ndandi Version 1962

Ekitsira kyeMelita

¹ Neryo twabere twabibala, motwaminya kwekitsira ekyo kikahulawa mo Melita.

² Esyombutirwa syayo mobatuyira ndeke, mobatwakirya omuliro mobatukokya itwe bosi kusangwa habya embeho nembula ikatsuka eriwa.

³ Paulo mwakumakuma obulo bwe syungwi mwahirasyo oko muliro, nenzoka moyalwa musyo busana nekihuhira moyayiringira oko byala biwe.

⁴ Esyondu lani syayo babere balangira enzoka eyo ininalerembire oko byala biwe, mobabwirana bati, Ni kundu omundu oyu ni mwiti. Nomwanabiribala engetsi, Eritunganene siryetaleka akabyaho.

⁵ Naye mwakungutirayo omo muliro mwatakwaki.

⁶ Nabo mobalindirira baringikania bati, akandibimba kutse akandigwa ahisi iniamabihola; nikwa bamabilindirira endambi nyiri isibetalangira ekyamakwa, mobahindula bati ni mungu.

⁷ Neryo hakuhi naho habya amarima womukulu wekitsira oyo kahulawa mo Publio; iye mwatukokya mwatuwatikya ndeke ebiro bisatu.

⁸ Neryo ise wa Publio abya alwere erihuhana nesyonzoka esyabiritwa omo nda; Paulo mwayamubana mwa saba, nerimuhira kwebyala mwamulamya.

⁹ Omwatsi oyo abere abya atya abandi ababya balwere oko kitsira ekyo mobasa mobalamibwa.

¹⁰ Mobatuha erisikya rinene, twabere twaya omobwato, mobahira omo bwato ebituri bwaga.

Erihika eRoma

¹¹ Enyuma wemikera isatu motwaya omo bwato bweAle sanduria obwabyaho oko mikere eyeritsuku, ibuwite ekiminyi kalo kya Bahasa boBulume.

¹² Nerihika Sirakuse, motwikalaho ebiro bisatu.

¹³ Nerilwa eyo motwatimba motwahika eRegio; neryo habere hakya ekiro kiguma erihunga ryelutambi morya buhirira, noko kiro kyebibiri motwahika ePuteoli.

¹⁴ Eyo motweya abandi balikyetu, mobatulembalemba bati tubye nabo biro birinda. Neryo ritya motwahika eRoma.

¹⁵ Na balikyetu beyo, omugulu bowa engulu yetu mobasyahindana netu Omwiguriro ryaApio na Manyumba Asatu wa Bageni, Paulo abere alangirabo iniaha wasingya oko Mungu, nomutima mwasika.

¹⁶ Twabere twahika eRoma, Paulo mwahabwa ehamuli yeriyigenderya, haguma nomusoda ukamutegaya.

Paulo na baYuda beRoma

¹⁷ Nenyuma webiro bisatu mwabirikira haguma abakulu baYuda; babere babihindana, mwabwirabo ati, Balikyetu, nomondanetakola kibi oko bandu betu kutse oko mitsye yabo tata wetu, nikwa monahirwa omo byala byabaRoma inyinabo hire erilwa eYerusalema.

¹⁸ Nabo babere babinyibulya ibasonda erinyilwika, kusangwa sihari ekyanganyitisya.

¹⁹ Ni kwa abaYuda babere bagana, monasonda eriyabulya Kaisari atswere olubanza lwage—isingwite ekyerihandikirira ekihanda kyage.

²⁰ Busana nomwatsi oyu nabiribatumirako erikania nenyu, kusangwa busana namaha wa Israeli nyibohire omo buhulula obu.

²¹ Nabo mobamubwira bati, Sitwetabana esyobarua busana nawe sikalwa eYudea, kandi sihali mulikyetu ukatubwira engulu nyibi ukuwe, kutse eribuga nabi busana nawe.

²² Nikwa twanzire eriowa kuwe ebyo ukaganiraya; kusangwa erisabira eri tunasi bakahulayayo mo nabi ehosi.

²³ Babere babilagana naye ekiro, abangi mobamweya omo nyumba eyo abya akagotseramo. Naye mwakaniryabo eritsuka omo ngyakyangyakya erihika okwigolo, iniakatula omwatsi wobwami bwoMungu nerilenga erisingabo busana na Yesu omo bihano bya Musa nomo baminyereri.

²⁴ Abandi moba singwa nebyo abuga, nabandi mobatikirirya.

²⁵ Neryo, moba gabana, mobagenda, Paulo amabibuga ekiguma: ati, EKirimu Kibuyirire mokyabuga ndeke omo buno bwomuminyereri Isaya: oko botata wenyu kiti:

²⁶ Ugende oko bandu aba, ubuge uti, Mwasyowa kwenene nikwa simwendisyaganirya na kera, Mwasyalangira kwenene nikwa simwendisyaminya na kera.

²⁷ Kusangwa omutima wabandu aba abirikala, Namatwi wabo abirilibana okwowa, Nameso wabo babirilibago; Isibangalangira mo meso wabo, Neriowa omo matwi wabo, Neriminya omo mutima wabo, Nerinyibindukira ngalamyabo.

²⁸ Riminyikale kwinywe kwerilamya eri ryoMungu ryabiri tumwa oko Bihanda; nabo basyowa.

²⁹ Abere abibuga ebinywa ebi, abaYuda mobagenda, bakakubisania obuhaka.

³⁰ Naye mwikalayo emituta ibiri akayirihira enyumba yiwe, nerikokya abosi bamuhikako,

³¹ akatula engulu yobwami bwoMungu nerikangirirya omwatsi woMukama Yesu Kristo butsira eriubaha isihari oyu kamukakirya.