Emibiri 27 - Nouveau Testament et Psaumes en Ndandi Version 1962

Olugendo lweriya eRoma

¹ Omugulu bamabisoha bati tukasokera eItalia, mobaha Paulo nabandi bomuliki oko mukulu wabasoda yokahu lawa mo Yulia womulondo wabasoda baAugusto.

² Motwingira omo bwato bweAdaramiti, obwasonda eriya oko miyi iri kongetsi eAsia, motwagenda tutya ituri haguma na Aristarko omunyaMakedonia weTesolonika.

³ Nomungyakya motwahika Sidona; Yulia mwayira Paulo yondeke, mwamuha eriyabana abira buwe neriwatikibwa.

⁴ Nerigenda kandi omo bwato motwalaba eyikwa koKipuro, kusangwa erihunga iryamasira embere kwitwe eritukakirya.

⁵ Twabere twabisoka engetsi eyihererenie na Kilikia na Pamfulia, motwahika Mira omuyi wa Likia.

⁶ Eyo omukulu wabasoda mweya obwato bwe Alesanduria obukaya eItalia, mwatuhira mubo.

⁷ Motwagenda mubo mobolobolo biro bingi, motwahika hakuhi neKinido na malige, kusangwa erihunga moritaliga tukagenda, motwalaba eyikwa kwe Krete, emuliro weSalmone.

⁸ Nerilaba namalige motwahika aho hakahulawa mo Habonderere Ndeke, hakuhi nomuyi owakahulawa mo Lasea.

Eritulika ryobwato

⁹ Neryo endambi nyiri yamabitala busa, nolugendo ilwangita kusangwa ebiro byeritsira akaryo byamabilaba, Paulo mwa hanabo, ati,

¹⁰ Abakama, namalebya olugendo lukasyabya nama gali neritalya ringi, erite ryobwato nebindu bisa, nikwa eryengebe yetu nibya.

¹¹ Nikwa omukulu wabasoda mowa omusondoli wobwato nomwenye bwato kwilaba ebyo Paulo abuga.

¹² Neryo kusangwa aho bwato bukahangana sihabya huwene eriikalaho omo mikera yeritsuku, abangi bakubo mo bahana bati balweho mbino banganatoka erihika eFoiniki ahabonderere bwekiharo kyengetsi eKrete, ahakalola omukati kati kendata nelutambi nomokatikati keyikwa nelutambi, nerisibaho oko mikera yeritsuku.

¹³ Neryo omugulu erihunga ryelutambi lweyikwa ryabuhirira bolobolo, mobaganirya bati bamabana ekyo bakasonda, mobasumba engomo mobalaba hakuhi na Krete, oko mukokoro.

¹⁴ Neryo enyuma wakatambi kake erihunga rinene ryakanyabungu, erikahulawa mo Eurakilo moryaswirya obwato;

¹⁵ nomugulu erihunga ryaheka obwato mobutatoka erilwa nekihunga motwalekabo moryatuheka.

¹⁶ Nerilaba hakuhi nakatsira akakahulawa mo Kauda, motwa boha obwato nobulige;

¹⁷ neryo babere babisumbabo moba boha obwato mobalabya emikoba omwisi; neryo ibakubaha bati bakandihatira oko misege ya Sirti, mobakimya esyongimba, mobakunwa batya.

¹⁸ Twabere tukahehibwa kutsibu neki hunga, engyakya mobatsuka erigusa ebindu omo ngetsi;

¹⁹ noko kiro kyebisatu motwagusa esyongimba syobwato omo ngetsi omobyala byetu.

²⁰ Nomugulu eryuba nesyongununu mobitaswahuluka oko biro bingi, nerigunga inene irineho ritya, motutaswayihira ko maha weribyaho.

²¹ Neryo bamabibya butsira karyo ebiro bingi, Paulo mwa hangana emuliro wabo, ati, Inywe balume, kumbe mwarinyowa, ngasimwetalwa eKrete omo bwato nerilola oko malige neritalya eri.

²² Na lino ngababwira nyiti musikaye emitima; kusangwa sihali oyu kandihola, bono bwato.

²³ Kusangwa omo kiro eki, omulaika woMungu oyo indi mundu wuwe ngamukukamira nibya mwahangana hakuhi nage,

²⁴ mwambwira ati, Sigubahe Paulo; utolere erihangana emuliro wa Kaisari: lebaya, Mungu abirikuha abosi abakagendanaya nawe omu bwato.

²⁵ Neryo musikaye emitima yenyu, balume, kusangwa nyikirirye ko Mungu kobinemwendisyabya bitya ngoko nabwirawa.

²⁶ Nikwa ritolere itwaguswa oko kitsira kiguma.

Erilamibwa omo ngetsi

²⁷ Omugulu ekiro kyerikumi nebini kyahika itunemohekwa rityaritya oko ngetsi yaAdria, hakuhi nakati kanene abasokya mobaganirya nga bamahika hakuhi nekitaka.

²⁸ Mobahiraho olulengero mobabana obuli bwaho ni syondengero amakumi abiri; babere baswagenda akatambi kake ibaswalenga ni nde ngero erikumi nitano,

²⁹ neriubaha bati mbino basyaguswa oko mabwe, mobandagalya esyongomo ini syekyuma gobwato, mobasaba bati bukye.

³⁰ Abasokya mobasonda eritibita erilwa omo bwato, ibamabyandagalirya ehyatu hike omo ngetsi bati bakahira esyongomo emuliro wobwato.

³¹ Paulo mwabuga nomukulu werigana nokobasoda ati, Abandu aba bamatindabya omo bwato, simwenditoka erilamibwa.

³² Neryo abasoda mobatwa esyongoba syehyatu, erilekahyo hitoge.

³³ Neryo bwasonda ikya, Paulo mwagonga-gongabo bosi ati barye, ati, Munabwire ni kiro kyerikumi nebini mukalinda neritsira, isimwetaryaki.

³⁴ Neryo ngabago murye: bikandibaganula, kusangwa sihari noluyuiri noluguma loko mitwe yenyu olukandihera.

³⁵ Abere abibuga atya, mwimya obundu mwaha ewasingya oko Mungu emuliro wabosi mwa tsutsangabo mwatsuka erirya.

³⁶ Neryo nabo abosi mobaswa sikasika mobarya karyo.

³⁷ (Itwe bosi kotwabya omo bwato twabya bandu amagana abiri namakumi arinda na bandu ndatu.)

³⁸ Babere babiuguta, mobanguhya obwato, mobagusa enganu omo ngetsi.

³⁹ Bwabere bwakya, mobataminya e kihugo ekyo, nikwa mobalangira obwerere bwekiharo kyekisege, oho basonda bati kyamatokekana, ibahiraho obwato.

⁴⁰ Neryo mobagusa esyo­ngomo esikasikaya obwato mobasigasyo omo ngetsi, noko ndambi eyo mobakundula esyongoba esikaboha omuti owaka bindula obwato; neryo erisumba olukimba olwemuliro wobwato omwihunga mobalabyabo oko kisege.

⁴¹ Erihika omwisanga sangano syamagetse mobalolya obwato oko kitaka; nomutwe wobwato mwamakiririra mwataswatsinga-tsinga, nenyuma yo bwato moyasatangika busana nakagala kebisunda.

⁴² Nabasoda mobasonda eriita abomuliki, bati sihayire wakubo oyo wango gerera akabala:

⁴³ nikwa omukulu werigana akasonda erilamya Paulo, mwakagabo sibakole ngoko basonda. Mwategekabo ati, abosi abasi eriogerera bayiguse omo magetsi baye oko kitaka.

⁴⁴ Nabandi oko bisayi kutse oko bihandebihande byobwato. Neryo abosi mobabala mobahika oko kitaka.