Emibiri 23 - Nouveau Testament et Psaumes en Ndandi Version 1962Paulo embere yabo mwibugiro 1 Paulo abere atungerera eribugiro ndeke, mwabuga ati, Balikyetu, namabyaho embere syoMungu nomutima ate nolubanza erihika oko kiro eki. 2 Nomuhereri mukulu ye Anania mwategeka ababya bimeneho erimuswirya oko buno. 3 Paulo mwabuga naye ati, Mungu asyakuswirya, uwe luhimbo luhakabirye embemba! Ukikalira erinzwera ngebihano, nikwa ukategeka erinzwirya erite omo kihano kwehi? 4 Nababya bimeneho bati, Ukatsuma omuhereri mukulu woMungu kwehi? 5 Paulo ati, Sinyilwe nyasi, balikyetu, kwari muhereri mukulu; kusangwa kisakire kiti, Susyebuga nabi oko murongani wabandu benyu. 6 Nikwa omugulu Paulo aminya kwekihande babya ba Sadukayo nekindi babya baFarisayo, mwabirikira omwibugiro ati, Balikyetu, nage indi muFarisayo, omugala wabaFarisayo; busana namaha werilubuka eryabaholi namabya oko lubanza. 7 Abere abibuga atya, mohabya erinegena ryabaFarisayo na baSadukayo; nendeko moyagabana. 8 Kusangwa abaSadukayo bati sihari erilubuka, kutse omulaika, kutse ekirimu; nikwa abaFarisayo bakaliga ebyosi. 9 Mohabya olukanda lungi; nabandi abasaki boko baFarisayo mobahangana bati, Sitweta bana oko mundu oyu kokibi. Kyanganabya ini kirimu kutse omulaika akabuga naye kwehi? 10 Omugulu erinegena ryabya inene, omukulu, iniakubaha ati mbino bakanditulanga Paulo mo bihandebihande, mwategeka basoda ati bandagale baya musagulebo bamulete omo nyumba. 11 Enyuma kwaho omo kiro oMukama mwahangana hakuhi naye mwabuga ati, Usike, ngoko watulago busana nage eYerusalema, ritolere iwatulago neRoma. Embita yeriita Paulo 12 Bwabere bwakya, abaYuda mobamuyira embita mobayi kumira haguma omwilahirya bati sibendirya kutse eripulya bate bita Paulo. 13 Abamuyira embita eyi babya bangi kwilaba makumi ani. 14 Mobaya oko bahereri bakulu na bakulu, bati, Twabiriyisema eritindagerya akaryo tutetwita Paulo. 15 Neryo nenyu, haguma nabo mwibugiro, mubwire omukulu amwanda galiraye kwinywe, ngoko mukasonda eriminya omwatsi wuwe ndeke. Netu tusikire erimwita ate ahika hakuhi. 16 Nikwa omuhwa wa Paulo mowa embita yerimulamba: mwaya ingira omo nyumba ya basoda mwabwira Paulo. 17 Na Paulo mwabirikira mukulu muguma wabasoda ati, Twala omulwana oyu oko mukulu: kusangwa awite eKinywa kyerimu bwira. 18 Neryo mwamwimya mwamutwala oko mukulu mwabuga ati, Paulo mundu womuliki ariambirikira ati nyilete omulwana oyu kuwe, awite ekyakasonda erikubwira. 19 Omukulu mwamuwata oko byala, nerimutwala omo ngonde mwa mubulya bubi-sobiso, ati, Ekyu kasonda erimbwira niki kwehi? 20 Naye ati, abaYuda babirihanana erikubulya bati usyandaga laya Paulo omungyakya omwibugiro, ngoko bakasonda eribulya omwatsi wuwe ndekendeke. 21 Nikwa suligirebo; kusangwa abalume kwilaba makumi ani banamulambire omo nzira, babirilahirya bati sibendirya kutse eripulya batebamwita; na lino basikire, bakalinda erilaga ryawe. 22 Omukulu mwamusu bulya, ati, Subwire mundu nomuguma ko wamabwira ebi. Eritwala Paulo eKaisaria 23 Neryo mwabirikira abakama babasoda babiri mwabwirabo ati, Oko ndambi isatu syekiro muhire abasoda magana abiri bagosole eriya eKaisaria haguma nabakalwira oko farasi amakumi arinda nabamatumo magana abiri. 24 Kandi ubane syofarasi busana na Paulo erigenda kusyo, mumutwale nobuholo uku Feliki omurongani. 25 Neryo mwasaka ebarua iti: 26 Klaudio Lusia oko murongani mukulu mubuya Filiki, obuholo kuwe. 27 Omundu oyu atsimbawa na baYuda, basonda erimwita, monahikaho na basoda monamutongolya, inamabiowa kwari muRoma. 28 Nerisonda eriminya ekyaleka ibamuhandikirira, monamuleta ahari eribugiro ryabo. 29 Mo nalebya iniabirihandikirirwa busana nemyatsi yebihano byabo, isibawite ekyerimwitisya kutse ekyangamubohesya. 30 Nomugulu nabwirawa ambu hari mbita busana nomundu oyu, namamutuma kuwe neryo-neryo, neritegeka abamuhandikirira basweyabuga embere syawe ebyo bakamuhandikirirako. 31 Abasoda nabo, ngoko babwirawa, mobimya Paulo moba mutwala omo kiro eAntipatiri. 32 Nengyakya mobasuba oko manyumba wabasoda, mobasiga abari oko syofarasi erigenda naye. 33 Neryo babere bahika eKaisaria mobaha omurongani mukulu ye barua, mobahira Paulo embere siwe. 34 Abere abisoma ebarua, mwabulya nga ni we kihugo kyahi. Abere abiminya kwari munya Kilikia, 35 mwabuga ati, Nasyakowa abahandikiriri bawe babihika; neryo mwategeka ati ategeribawe omo nyumba yolubanza ya Herode. |
Le Nouveau Testament et les Psaumes en Ndandi © British and Foreign Bible Society, 1962.
Bible Society of the Democratic Republic of Congo