Emibiri 2 - Nouveau Testament et Psaumes en Ndandi Version 1962

Eriandagala ryeKirimu Kibuyirire

¹ Nekiro kye Pentekote kyabere kyabihika, abosi mobabya hagumaguma.

² Neryo-neryo omulenge mwalwa elubula ngeribuhirira rye rihunga inene, moryusulya enyumba yosi aho babya bikere.

³ Neryo mohabutuka kubo ebirimi ibigabene ngebyomuliro; mobikala oko buri mundu.

⁴ Nabosi mobu sulibwa neKirimu Kibuyirire, mobatsuka eribuga omo yindi mibuge, ngoko Kirimu kyahabo eribuga.

⁵ Nikwa habya baYuda abikere eYerusalema, bandu bagenge, erilwa omo bihanda byosi eyikwa oko butuku.

⁶ Nomugulu omulenge oyo ogubawa, endeko moyahindanaho, mobasweka kusangwa oburi mundu owabo bakabuga omo mubuge wuwe.

⁷ Nabosi mobasweka mobumirwa, bati, Lebaya, abakabuga abo sibaGalilaya kwehi?

⁸ Netu tukowa tuti kwehi, oburi mundu omo mubuge wuwe abutawa mo.

⁹ BanyaParti na banyaMedi na banyaElamu nabatula eMesopotamia, Yudea, na Kapadokia, Ponto na eAsia,

¹⁰ Furigia, na Pamfilia, Misiri nebihande bye Libia kihererenye neKurene, na bageni beRoma, abaYuda na bakwamirebo,

¹¹ banyaKrete na Barabu, tukowabo bakabuga omo mibuge yetu emibiri yamaka yoMungu.

¹² Nabosi moba sweka, mobabula kyeribuga mobabulania, bati, Eki kikahulaki kwehi?

¹³ Nikwa abandi mobanegula, bati, Babirikunda nebinyu bihyabihya.

Eritulago ryaPetero

¹⁴ Nikwa Petero mwahangana haguma nerikumi na muguma, mwasumba omulenge wuwe, mwabuga nabo, ati, Inywe bandu beYudea, nenyu bosi abikere eYerusalema, eKinywa eki mu minyekyo, mowe ebinywa byage.

¹⁵ Aba sibakundire ngoko mukaganiraya: kusangwa ni ndambi isatu syeritungi;

¹⁶ nikwa eki kyabugawa nomuminyereri Yoeli, ati,

¹⁷ Mungu ati, kikandisyabya oko biro byenyuma. Nasyutulira eKirimu kyage oko mibiri yosi: Nabagala benyu nabali benyu basyaminyerera, Nabalwana benyu basyalola oko nzoli, Nabasyakulu benyu basyalota:

¹⁸ Kandi oko biro ebyo oko bagombe bage abalume na bakali Nasyutulira eKirimu kyage; basyaminyerera,

¹⁹ Nasyakangania ebyeriswekera omo lubula endata Nebitikotiko mona kihugo eyikwa; Omusasi, nomuliro, neritumba ryomuki:

²⁰ Eryuba ryasyabindulwa mo mwirimya, Nomukera mo musasi, Embere werihika ryekiro kyoMukama, Ekiro ekyo kikulu ekyeriminyikala.

²¹ Neryo kyasyabya omundundi oyo wasyabirikira erina ryoMukama asyalamibwa.

²² Inywe balume baIsraeli, muhulikirire ebinywa ebi: Yesu we Nazareti, omundu usimirwe noMungu busana nenyu oko mibiri yamaka, nebyeriswekera nebitikotiko ebyo Mungu akola busana naye omukati-kati kenyu, ngoko nenyu munasi;

²³ iye abere abihoterwa ngoko Mungu ahana neriminya ebitebyabya, inywe momwamwita oko muti nerimuholya omo byala bya bandu babi;

²⁴ oyo Mungu alubukaya, iniamabibohola eri agalwa ryoluholo: kusangwa moritatokekana akabohwa muryo.

²⁵ Kusangwa Dawidi mwabuga busana naye, ati, Monalola oko Mukama ebiro byosi embere syage: Kusangwa ari oko byala byamali byage, isinangatundwa:

²⁶ Neryo mutima wage mwatsema, no lulimi lwage molwatsanga; Kandi mubiri wage asikala omo maha:

²⁷ Kusangwa siwendisya siga ekirimu kyage omo Kurimu, Kutse siwendisyaha oMubuyirire wawe erilola okwihonda,

²⁸ Mowanyiminyisya esyonzira syengebe; Wasyanyusulya nobutseme embere syobusu bwawe.

²⁹ Balikyetu, ngabuga nenyu neriminyikalya busana na Tata mukulu ye Dawidi, kwa hola kwa tabawa, neyisinda yiwe ine ewetu na lino.

³⁰ Kwa bya muminyereri, mwaminya ko Mungu amulahiriraya nerilahirya, asyahira muguma woko lubuto luwe oko kitumbi kiwe kyobwami;

³¹ anye erilangira bitebyabya ahula erilubuka rya Kristo, nakandi mwatamuleka ekurimu, nomubiri wuwe mwatalola okwihonda.

³² Yesu oyu Mungu mwamulubukya, netu turi balangiri beritulago.

³³ Neryo mwa hetukibwa nebyala bya mali byoMungu, nerihabwa nIse erilaga rye Kirimu Kibuyirire, mutula eki mukalangira mukowa.

³⁴ Kusangwa Dawidi mwatahetukira elubula: nikwa iye mwa­buga ati, OMukama mwabwira oMukama wage, ati, Wikale oko byala byage byamali

³⁵ Erihika aho nasyayirira esyonzigu syawe mokitumbi kya bisandu byawe.

³⁶ Neryo enyumba yosi ya Israeli iminye ndeke, ko Mungu abirimuyira mo Mukama na Kristo oyo mwitira oko muti.

Erikirirya ryaBandu maelfu asatu

³⁷ Omugulu bowa ekyo, mobahisibwa omo mitima yabo, mobabulya Petero na bandi bakwenda, bati, Balikyetu, tuyire tuti kwehi?

³⁸ Petero mwasubiryabo, ati, Mubinduke, oburi mundu abatisibawe omu rina ryaYesu Kristo mubane erilu sibwa kwe bibi byenyu; kandi mwasyimya erihitya ryeKirimu Kibuyirire.

³⁹ Kusangwa erilaga riri busana nenyu nabana benyu noko bosi bari hali, abo Mukama Mungu wetu asyabiri kira kwiye.

⁴⁰ Mwatula neyindi myatsi mingi, nerihanabo, ati, Muyilamaye oko lulengo luhengemire olu.

⁴¹ Neryo abangirira kinywa kiwe mobabatisibwa: noko kiro ekyo mohatomekerwa kubo nga bandu elfu isatu.

⁴² Neryo mobakwamirira ndeke erikangirirya ryabakwenda nerianzana, neritsutsanga obundu nerisaba.

⁴³ Neriubaha moryahika oko buri mundu: nebyeriswekera nebitikotiko bingi mobyakolwa na bakwenda.

⁴⁴ Nabosi bikiriraya mobabya haguma, mobasangira ebyosi;

⁴⁵ moba gulya obusoki bwabo nebindu byabo, mobagababyo oko bosi, ngoko mundu ekyari nobwaga.

⁴⁶ Nekirokiro mobakwamirira nomutima muguma omo hekalu, neritsutsanga obundu eka, mobimya akaryo kabo nobutseme nomutima muguma,

⁴⁷ eri pipa Mungu nerisimwa na bandu bosi. NoMukama mwatome kera kubo ekirokiro abalamibawa.