Emibiri 19 - Nouveau Testament et Psaumes en Ndandi Version 1962

Abiga baYoane neKirimu Kibuyirire

¹ Nomugulu Apolo abya eKorinto, Paulo mwalaba omo kihugo kyendata mwahika Efeso. Neryo mweyayo abandi biga.

² Mwabulyabo ati, Momwangirira eKirimu Kibuyirire omugulu mwikiriraya? mobasubirya bati, Eyihi, sitwetowa ko hari eKirimu Kibuyirire.

³ Neryo mwabuga ati, Mwabatisi bawa muki kwehi? Nabo bati, Omo batisimo ya Yoane.

⁴ Paulo ati, Yoane abatisaya omo batisimo yeribinduka, aka bwira bandu ati bikiriraye oyu kandisyasa enyuma kwiye, ni Yesu.

⁵ Neriowa eki mobabatisibwa omo rina ryoMukama Yesu.

⁶ Nomugulu Paulo abere abihira kubo kwebyala, eKirimu Kibuyirire mokyasa kubo; mobabuga neyindi mibuge mobaminyerera.

⁷ Nabo babya nga bandu ikumi nababiri.

Erikania ryeKinywa kyoMungu

⁸ Neryo mwingira omo nyumba yerihindana mwabugayo emikera isatu akatula engulu yowene neritindiubaha nerikuba obuhaka nerihatikanabo busana nobwami bwoMungu.

⁹ Nikwa omugulu abandi bakubo bakala mobatikirirya, ibakabuga nabi busana neNzira eyo embere syendeko, iye mwalwa kubo, mwatwala abiga haguma naye, mwabya akakuba obuhaka oburi kiro omo nyumba yeriigirimo ya Tirano.

¹⁰ Neryo mwakola atya mwabuga emituta ibiri, kyaleka abosi ababya bikere eAsia, abaYuda na baGiriki ibowa eKinywa kyoMukama.

¹¹ NoMungu mwakola ebitikotiko omu byala byaPaulo ebitebyatakolwa,

¹² kyaleka ibatwala ebihande byesyongimba nesyongimba bakatulyasyo oko mubiri wuwe ibatwalirasyo abakoni, neryo esyondwala isyalwa kubo nesyombinga isya lwamo.

¹³ Neryo abandi babasaki babaYuda abalenderi mobalenga eriahula erina ryoMukama Yesu endata wabari kwesyombinga bati, Ngakusema Yesu oyo Paulo akakangiriraya.

¹⁴ Abagala balinda bomuhereri mukulu muYuda oyo kahulawa mo Sikewa babya bakakola batya.

¹⁵ Nikwa embinga eyo moyasubirya, iti, Yesu nyimwasi, na Paulo nabirimuminya; nikwa inywe muri bahi kwehi?

¹⁶ Nomundu oyo wabya kwembinga mwagulukirabo, mwakindabo bosi, mwatokabo, mobatibita eyihya yondumbu ibamabihutala ebironda.

¹⁷ No mwatsi oyo mwaminyikala oko bosi abikere Efeso, abaYuda nabaGiriki; mobakwa obuba abosi; nerina ryoMukama Yesu moryakengwa.

¹⁸ Abangi boko bikirirye mobasa nerikangania nerihulukya emibiri yabo.

¹⁹ Nabandi boko bakumu mobaleta ebitabu byabo haguma mobahisyabyo omo meso wabosi; mobaganza obuguri bwabyo mobwabya esyofranka syekitsipa elfu makumi atano.

²⁰ Nekinywa kyoMukama mokyatsungana mokyasingana namaka.

Abahesi bArtemi

²¹ Neryo enyuma wemyatsi eyi Paulo mwaganirya omo Kirimu erilaba eMakedonia neAkaya neriya eYerusalema, ati, Nasyabya nabibyayo, ritolere inaya lebya neRoma.

²² Neryo abere abituma abawatikya buwe babiri, Timoteo na Erasto eMakedonia, iye mwasigala eAsia ebiro bike.

²³ Oko mugulu oyo omwaga munene mwahuluka busana neNzira eyo.

²⁴ Kusangwa omundu oyo kahulawa mo Demetrio, omuhesi webitsipa, oyo wabya akahesa emisaka yekitsipa yerisabiramo Artemi, mwaletera abahesi endundi nene.

²⁵ Mwahindaniabo haguma na bandi abakakola omubiri oyo, mwabuga ati, Inywe balume munasi endundi yetu ikalwa oko mubiri oyu.

²⁶ Mukalangira neriowa butsira Efeso hasa nikwa hakuhi neAsia hosi Paulo oyu abiribindula endeko nene yabandu, ati emiungu ikakokotibawa omo byala si miungu.

²⁷ Hari kyeriitisya butsira oko mubiri wetu musa watindahera nikwa ehekalu yomungu mukulu wobukali Artemi iyaganzwa nga buyira, naye mbino inialusibwa oko bubuya buwe, Oyu kasabawa eAsia yosi ne kihugo.

²⁸ Omugulu bowa ebi mo bahitana kutsibu, mobabugira igoma bati, Artemi wEfeso ni Mukulu!

²⁹ Nomuyi gosi musula nolukuko; mobatibita haguma omo nyumba yebitsange,

³⁰ ibaka kura haguma nabo Gayo na Aristarko, abanyaMakedonia ababya bakagenda na Paulo. Na Paulo mwasonda eriingira omo ndeko, nikwa abiga mobamukaga.

³¹ Nabandi bakulu beAsia, ababya abira buwe, mobamutumirako mobamugonga-gonga bati sialenge eriingira omo nyumba yeritsangiramo.

³² Neryo abandi mobabirikira omwatsi muguma, nabandi ogundi; kusangwa endeko yabya lityalitya, nabangi bakubo isibasi ikiryaleka ibahindana.

³³ Nabandi bendeko mobahulu kya Alesanduro, oyo baYuda bahira emuliro wabandu. Neryo Alesanduro mwakoheryabo iniakasonda eriyigana oko bandu.

³⁴ Nikwa omugulu baminya kwari muYuda, abosi mobabugira igoma ngendambi ibiri, bati, Artemi wabaEfeso ni mukulu!

³⁵ Nomugulu omusaki weka amabibonderya endeko eribya bukutu, mwabuga ati, Balume bEfeso, kwe nindi oyo tasi komuyi wabanyaEfeso ni muteya wehekalu yaArtemi mukulu, noweribwe eribuyirire eryatoga rikalwa omo kyanya kwehi?

³⁶ Nikwa kusangwa munasi kwe myatsi eyi kwiteyangatoka eriganwa mutolere eribya bukutu neritindakola lubaluba.

³⁷ Kusangwa mwabirileta abandu aba hano abate barahi bebyo mohekalu kutse batsumi bomungu wetu wobukali.

³⁸ Neryo Demetrio, nabakakola haguma naye bamabya bawite olubanza oko mundu, hane aheribugire nabatsweri; neryo baletane nesyombanza syabo.

³⁹ Nikwa mwamasonda ogundi mwatsi asyasoherwa omwibugiro haguma na batsweri.

⁴⁰ Kusangwa tukahwa nomwaga wamunabwire, kusangwa sihari nekiguma ekyo twangabuga busana nolukanda olu.

⁴¹ Amabibuga atya, mwakulukya endeko.