Emibiri 18 - Nouveau Testament et Psaumes en Ndandi Version 1962

Paulo oko muyi weKorinto

¹ Enyuma webyo Paulo mwalwa eAtene mwaya eKorinto.

² Mweyaho omuYuda oyu kahulawa mo Akwila, embu tirwa yePonto, asa linolino akalwa eItalia haguma na mukaliwe Pirisila, kusangwa Klaudio iniamabitegeka abaYuda bosi ati balwe eRoma. Naye mwayalola kubo;

³ neryo kusangwa babya bomubiri muguma mwabya nabo, mobakola, kusangwa oko mibiri yabo babya baluki bamahema.

⁴ Naye mwakuba buhaka omu manyumba werihindana oburi sabato, mwabindula baYuda na baGiriki.

⁵ Nomugulu Sila na Timoteo bahika bakalwa eMakedonia, Paulo abya iniakatula engulu yowene, eritulago oko baYuda ko Kristo ni na Yesu.

⁶ Nomugulu bagana nerimutsuma, mwa kunguta esyongimba siwe mwabuga nabo ati, Omusasi wenyu abye oko mitwe yenyu! Sindi kolubanza. Eritsuka lino ngaya oko Bihanda.

⁷ Neryo mwalwaho mwingira omo nyumba yomundu ukahulawa mo Tito Yusto, omusabi woMungu; enyumba yiwe ihererenye nenyumba yerihindana.

⁸ Na Kristo, omurongani wenyumba yerihindana, mwikirirya oMukama, haguma nabenyumba yiwe yosi; nabangi banya Korinto abowa Paulo mobikirirya mobabatisibwa.

⁹ No Mukama mwabuga na Paulo omo kiro omo nzoli, ati, Sigubahe, nikwa ubuge subye bukutu:

¹⁰ kusangwa ndi haguma nawe, sihali mundu wasyakubambira erikukola nabi; kusangwa ngwite bandu bangi omu muyi oyu.

¹¹ Naye mwabugayo mututa muguma nemikera endatu, erikangirirya eKinywa kyoMungu omukati-kati kabo.

AbaYuda bakatsongera Paulo

¹² Nikwa Galio eryabya omurongani weAkaya, abaYuda mobaya embita mobabambira Paulo bamutwala embere yeki tumbi kyeritswera, bati,

¹³ Omundu oyu akabindula bandu erikukamira Mungu omusindo owate webihano.

¹⁴ Nikwa Paulo abere akasonda erikumbula obuno buwe, Galio mwa bwira abaYuda ati, Kumbe alwe mwatsi werikola nabi kutse ekibi kikalire, nga nangabowa ndeke, inywe baYuda;

¹⁵ nikwa kusangwa ni mwatsi wobuhaka bwebinywa namena nebihano byenyu, mulebayekyo inywe bene; ngagana eribya mutsweri wemyatsi eyi.

¹⁶ Neryo mwahigabo embere yekitumbi kye ritswera.

¹⁷ Nabosi mobahamba Sositeni, omurongani wenyumba yerihindana, mobamuswirirya emuliro wekitumbi kyeritswera. Nikwa Galio mwatatsomana ebyosi ebyo.

Olugendo lwaPaulo lwakasatu

¹⁸ Enyuma waho Paulo mwaswikalaho biro bingi, neryo mwalagana na balikyetu mwasokera eSiria omo bwato haguma na Pirisila na Akwila. EKenkuria mwasiswa, busana neribya nerilahirya.

¹⁹ Neryo mobahika eEfeso, neyo mwasigabo; nikwa iye mwingira omo nyumba yerihindana mwakuba obuhaka na baYuda.

²⁰ Babere bamugo eriikalayo ebindi biro, mwataliga;

²¹ nikwa erilagana nabo mwabuga, ati, Nasyaswasa kandi kwinywe Mungu amanza, neryo mwasoka omo bwato akalwa Efeso.

²² Abere abilwa mobwato eKaisaria mwahetuka mwabukya ekanisa, neryo mwandagarira eAntiokia.

²³ Neryo abere amabisiba akatambi mwalwayo mwalendera ku muyimuyi omo kihugo kyaGalatia na Furigia, iniakasikaya abiga bosi.

Erikangirirya ryApolo eEfeso

²⁴ Nikwa habya omundu ahulawa mo Apolo, embutirwa ya Alesanduria, oyo wasi eribuga ndeke owekisehya, mwahika Efeso; naye abya asi amasako ndeke.

²⁵ Iniabirikangiriribwa enzira yoMukama; iniawite omuhwa omo kirimu, mwabuga nerikangirirya ndeke emyatsi yaYesu, tse naho abya asi batisimo ya Yoane nyisa.

²⁶ Mwatsuka eribuga neritindiubaha omo nyumba yerihindana; nikwa omugulu Pirisila na Akwila bamowa, mobamutwala mobamukumburira enzira yoMungu yo ndeke kwilaba.

²⁷ Nomugulu asonda erisokera eAkaya, balikyetu mobamusikya omutima, mobasakira abiga bati bamu kokaye. Abere ahika, mwawatikya kutsibu abikiriraya busana nolukogo,

²⁸ kusangwa mwasinga abaYuda kutsibu embere syabandu, iniakakangaya omo masako ko Yesu ni Kristo.