Emibiri 17 - Nouveau Testament et Psaumes en Ndandi Version 1962

Eriendereribwa eryeTesalonika

¹ Neryo bamabilaba Amfipoli na Apolonia, mobahika eTesalonika, ahabya enyumba yerihindana ya baYuda.

² Paulo mwingiramo ngoko anagenda akakola, mwakaniryabo amayenga asatu omo masako,

³ iniakakumburirabo nerikania ndeke ko ryabya ritolere Kristo iniagalwa nerilubuka oko baholi, kandi ati, Yesu oyu ngababwira, yona Kristo.

⁴ Nabandi bakubo mobabindulwa, mobayihira haguma na Paulo na Sila; nabaGiriki bangi bagenge mobabya batya, nabakali bangi abakakengawa.

⁵ Nikwa abaYuda mobabya neritsura, neri songya abandu babi batyabatya, mohindania endeko, moba buya omo muyi molukanda, mobayabambira enyumba ya Yasona, ibakasonda eriletabo eyihya oko bandu.

⁶ Nomugulu babulabo, mobakura Yasona nabandi boko balikyetu embere syabakulu bomuyi, mobabugira iguma, bati, Abandu aba ababiribindula e kihugo kyosi, bamasa eno,

⁷ na Yasona abirikokyabo; nabosi bakapona ebihano byaKaisari bakabuga bati hari gundi mwami, ni Yesu.

⁸ Nabandu nabakulu bomuyi omugulu bowa ebyo mobahahukya emitima.

⁹ Neryo babere babiimya emboho uku Yasona nabandi, mobalekabo erigende.

Beroya

¹⁰ Neryo-neryo mobatuma Paulo na Sila omo kiro eBeroya: babere bahikayo mobaya omo nyumba yerihindana nabaYuda.

¹¹ Nikwa abaYuda aba babya babuya kwilaba abeTesolonika, kusangwa bangirira eKinywa nomuhwa gosi, ibakasonda-sonda amasako ebiro byosi erilebya nge myatsi eyi ni kwenene.

¹² Na bangi bakubo mobikirirya, abakali bangi babaGiriki aberi kengwa nabalume nibya.

¹³ Nikwa abaYuda beTesolonika abaminya kwekinywa kyoMungu kyatulawa na Paulo eBeroya, mobayayo, mobasembegetya mobababirirya oko syondeko.

¹⁴ Neryo-neryo abalikyetu mobatuma Paulo oko ngetsi, nikwa Sila na Timoteo mobasigalaho.

¹⁵ Nabatsindika Paulo moba muleta eAtene: ibamabilairwa eritegeka Sila na Timoteo ati bamukwame luba neryo mobagenda.

Paulo eAtene

¹⁶ Paulo abere analindirirebo eAtene, ekirimu kiwe mokya bya nobulige omwisi wuwe omugulu alangira omuyi iniuswire nesisumba.

¹⁷ Nikwa mwakuba obuhaka na baYuda na bandu bagenge omu nyumba yerihindana nomwiguliro nababyaho ebiro byosi.

¹⁸ Abandi bamenge abakahulawa mo baEpikurio na baStoiko mobahindana naye. Nabandi bakubo bati, omu buyi webingi oyu akasonda eribugaki kwehi? Abandi bati, Asosire mukangirirya wemiungu yehali kusangwa akangiriraya Yesu nerilubuka.

¹⁹ Neryo mobamuhamba mobamuleta oko Areopago, bati, Twanganaminya erikangirirya eririhyarihya nga ni ryahi eriukatula kwehi?

²⁰ Kusangwa ukaleta emyatsi yehali omo matwi wetu; neryo tukasonda eriminya omusindo wemyatsi eyi.

²¹ Nikwa BanyaAtene bosi nababunga ababya bikereyo mobasiba endambi yosi isibekola kindu irye neribuga neriowa emyatsi mihyamihya.

²² Na Paulo inianimene omukati-kati ka Areopago, mwabuga ati, Inywe abalume beAtene, ngalebaya omo myatsi yosi muri bandu bakakenga emiungu.

²³ Kusangwa nabere ngalaba, monayitegererya ebindu mukasaba, moneya eribwe ryeriherera erisakirweko riti, Oko Mungu atasibwe. Oyo mukasaba ata sibwe, yo ngababwira.

²⁴ OMungu oyo wabumba e kihugo nebiri mukyo byosi, iye ni Mukama welubula ne kihugo, siariikala omo misaka eyikahimbawa nabandu,

²⁵ kandi siari kolerawa nebyala byabandu, ngari nobwaga bwekindu, kusa ngwa iye akaha bandu engebe nomuka nebindu byosi.

²⁶ Naye mwakola ebihanda byosi byabandu erilwa oko muguma eriikala omo kihugo ehosi, iniabiritegeka emituta yabyo nemitano ryeriikala ryabo,

²⁷ basonda-sonde Mungu, omu maha werimumatamata nerimubana, nikwa siari hali oko buri mundu gukwitwe,

²⁸ kusangwa Mwiye turiho, tukalendera turi neribyaho; Ngabandi basaki benyu besyonyimbo babuga bati, Turi olubuto luwe kwenene.

²⁹ Nikwa twamabya turi olubuto lwoMungu, siritolere tuka ganirya tuti Mungu ari nge miringa, kutse kitsipa, kutse eribwe, bikabatsawa neriganirya namenge womundu.

³⁰ Nemigulu yeritindaminya Mungu mwakirukya ameso, nikwa lino aka tegeka abandu bosi ehosi eribinduka,

³¹ kusangwa abirihira ekiro asyatwa olubanza lwe kihugo omo ritunganene nomundu oyo abirihira, nokweki abiriha bandu bosi eriminyisyabo kwa birimulubukya omo baholi.

³² Nikwa omugulu bowa erilubuka ryabaholi, abandi moba negula; nikwa abandi bati, Twangaswakowa kandi omwatsi oyu.

³³ Ritya Paulo mwalwa omukati-kati kabo.

³⁴ Nikwa abandi balume bayihira kwiye, mobikirirya, Dionisio abya wakubo munya Areopago, nomukali muguma ahulawa mo Damaria nabandi haguma nabo.