Emibiri 16 - Nouveau Testament et Psaumes en Ndandi Version 1962

Timoteo

¹ Neryo mwahika eDerbe neLystra. Yabya omwiga oyu kahulawa mo Timoteo, omugala womuYuda wobukali oyo wabya wikirirye; nikwa ise wuwe abya muGiriki.

² Abya oyu kasimawa ndeke na balikyetu eLystra neIkonio.

³ Neryo Paulo mwanza Timoteo erigenda naye; mwamwimya mwamu bania busana na baYuda ababya eyo, kusangwa abosi babya basi kwise wuwe abya muGiriki.

⁴ Neryo babere bakalaba omo miyi eyo mobabwirabo ebyo abakwenda nabakulu beYeru salema bategeka bati bakolebyo.

⁵ Nesyokanisa mosyabana maka omwikirirya, neriganza ryabo moryakanya ebiro byosi.

Eribirikirwa ryaPaulo eriya eMakedonia

⁶ Mobalaba omo kihugo kye Furigia neGalatia, eKirimu Kibuyirire ikyabirikagabo eribuga eKinywa eAsia.

⁷ Nomugulu bahika hakuhi neMisia, mobalenga eriya eBitinia, nikwa eKirimu kyaYesu mokitaligirabo;

⁸ mobatwangana eMisia moba ndagalira eTroa.

⁹ Na Paulo mwalola oko nzoli omo kiro: omundu weMakedonia iniahangene iniakamuhatikana ati, Wase, usokere eMakedonia utuwatikaye.

¹⁰ Neryo abere alola oko nzoli, neryo-neryo motwasonda eriya eMakedonia, itwamabi minya kundu ko Mungu atubirikira eritula engulu yowene kubo.

Ludia

¹¹ Nerilwa eTroa omo bwato motwagenda omo nzira itunganene erihika eSamotirake, nengyakya mo twahika eNeapoli,

¹² nerilwa eyo motwahika eFilipi, ni muyi munene woluhande olo lwe Makedonia, ahabya Baroma, neryo motwa siba oko muyi oyo biro bike;

¹³ noko kiro kyasabato motwaya ekyaswa oko musike wolusi, motwaganirya nga hari aherisabira; motwikala motwabuga na bakali ababya bahindeneho.

¹⁴ No muguma wakubo oyo watowa abya mukali ukahulawa mo Ludia alwa oko muyi wa Tuatira ini mugulya wesyongimba syobwami oyo wabya musabi woMungu. OMukama mwibukya omutima wuwe erihulikirira ebyo Paulo abuga.

¹⁵ Neryo abere abiba tisibwa nabenyumba yiwe, mwatu-go, ati, Mwama nyilangira ko nyikirirye oMukama, mwingire omwage mwikale. Neryo mwatuhatikana.

Mwanamuto wembinga

¹⁶ Neryo twabere tukaya aherisabira, omugombe-mwanamuto mwahindana netu oyo wabya nembinga yerilagula iniakaletera abakama buwe endundi nene busana nerilagula.

¹⁷ Mwakwama Paulo, netu, inianemobirikira ati, Abandu aba ni bagombe boMungu wEndata Kwilaba hosi, bakabatulira enzira yerilama.

¹⁸ Naye mwakola atya biro bingi. Nikwa Paulo mwagalwa, mwakeba mwabuga nekirimu ekyo, ati, Namakutegeka omo rina rya Yesu Kristo umulweko. Neryo mokyamulwako oko endambi eyo.

¹⁹ Nikwa abakama buwe babere babilangira kwamaha wendundi yabo yamahwa, mobatsimba Paulo na Sila moba kurirabo omwiguriro embere syabarongani;

²⁰ bebere babi letabo oko batsweri bati, Abandu aba ni baYuda bakatsandaya omuyi wetu.

²¹ Bakakangiriraya emitsye eyo tutsirire erikirirya kutse erikola kusangwa turi baRoma.

²² Nendeko moyahanga nira kubo; nabatsweri mobalusya esyongimba syabo eritula ngasyo mobategeka bati bahunzawe omo miti.

²³ Neryo babere babihunzabo miti mingi, mobagusabo omo nyumba yomuliki, mobategeka omuteya eriteyabo ndeke.

²⁴ Neryo amabiowa eritegeka atya, mwahirabo omo nyumba mwekati mobabohera ebisandu byabo omo miti.

Omuteya wabomuliki

²⁵ Nikwa hakuhi na kati kanene Paulo na Sila babya bakasaba bakimbira oMungu, nabomuliki mobahulikirirabo,

²⁶ neryo neryo mohabya omusiki munene, kyaleka ebibanza byenyumba yomuliki ibyatengatengana; neryo-neryo esyonyuyi mosyaki ngulwa namahulula woburi mundu mwakundukala.

²⁷ Omu teya abere abuka mwalangira esyonyuyi syenyumba yomuliki isikingwire, mwakula muyari wuwe mwasonda eriyiita, mwa minya ati abomuliki batibitire.

²⁸ Nikwa Paulo mwabirikira nomulenge munene ati, Suyiyire nabi, kusangwa itwe bosi tune hano.

²⁹ Neryo mwatumira esiseke mwayigusamo, akatitimana neriubaha mwagwa embere syaPaulo na Sila,

³⁰ mwaletabo eyihya mwabuga ati, Bakama, ritolere inakolaki erilamibwa kwehi?

³¹ Mobamubwira, bati, Wikiriraye oMukama Yesu, iwalamibwa, uwe nenyumba yawe.

³² Mobamubwira eKinywa ekyoMukama noko bosi babya omo nyumba yiwe.

³³ Naye mwimyabo oko ndambi eyo yekiro, mwerya ebironda byabo, naye mwabatisibwa neryo-neryo, nekitunga kiwe.

³⁴ Neryo mwahetukyabo mwatwalabo omuwe, mwahira akaryo embere wabo; mwatsema haguma nabuwe bosi kusangwa amabikirirya oMungu.

Erilwa omo muliki ryaPaulo na Sila

³⁵ Bwabere bwakya, abatsweri mobatuma abasoda bati, Mulwike abandu abo bagende.

³⁶ Nomuteya mwatulirago Paulo, ati, Abatsweri bamatuma bati, mulwikawe; na lino muhuluke mugende obuholo.

³⁷ Nikwa Paulo mwabuga nabo, ati, Bariatuswiriraya omo meso wabandu, isituritwatswerwa, netu ituri baRoma, babiritugusa omo nyumba yomuliki; na lino bakasonda eritulusyamo bubi-sobiso kwehi? Eyihi, base bobene batutwale eyihya.

³⁸ Nabasoda mobayatulira ebinywa ebyo byabatsweri, nabo mobubaha bowa ko bari baRoma;

³⁹ neryo mobasa mobabalembalembabo, mobatwalabo eyihya mobagonga-gongabo bati balwe oko muyi.

⁴⁰ Kobalwa omo nyumba yomuliki batya, mobingira omwa Ludia: neryo babere babilola ku balikyetu, mobahanabo, mobagenda.