Emibiri 14 - Nouveau Testament et Psaumes en Ndandi Version 1962

Ikonio

¹ Neryo eIkonio mobingira haguma omo nyumba yerihi ndana ya baYuda, mobabuga eKinywa kyaleka endeko nene yabaYuda na baGiriki ibikirirya.

² Nikwa abaYuda abagana erikirirya mobasembegetya eBihanda mobabindula oburingikania bwabo mo bubi oko balikyetu.

³ Neryo mobikala eyo omugulu muli, eribuga busana noMukama neritindiubaha, naye mwatulago nekinywa kyolukogo luwe, iniakaha ebiminyi kalo nebyeriswekera bikolawe nebyala byabo.

⁴ Nikwa abandu bomomuyi mobagabana; abandi oko baYuda nabandi oko bakwenda.

⁵ Nomugulu eBihanda na baYuda, haguma naba rongani babo, balenga erilwa nabo neriitabo omo mabwe,

⁶ mobaminya mobatibita eListra neDerbe, emiyi yeLikaonia, nomo kihugo kihirerenieyo;

⁷ neyo mobatula engulu yowene.

Kirema kyeListra

⁸ EListra habya omundu, isiaritoka erigenda; abutawa ikwane atya, isiariatayigendera na kera.

⁹ Naye mowa Paulo akabuga; na Paulo akamusamalira ndeke nerilangira kwawite erikirirya ryerilamibwa,

¹⁰ mwabuga nomulenge munene, ati, Hangana, wimane omo bisandu byawe. Naye mwabatuka mwayigendera.

¹¹ Nesyondeko syamabilangira ekyo Paulo akola, mobasumba emilenge yabo, mobabuga omo mubuge wabanyaLikaonia, bati, Emiungo yamatwandagalirako omo bisosire abandu!

¹² Barunaba mobamwahula mo Zeu, na Paulo mobamwahula mo Herme.

¹³ Nomuhereri wa Zeu, ehekalu yago yabya mbere yomuyi, neryo mwaleta esyonume nehikira hyobusoyo okwilimbo ibakasonda eriherera haguma nabandu ababyaho.

¹⁴ Nikwa abakwenda Barunaba na Paulo babere babiowa mobatula esyongimba syabo mobatibita eyihya om ondeko, mobasumba emilenge, bati,

¹⁵ Balume, busana naki mukakola eki kwehi? Netu turi bandu, abaringene nenyu, Tukabaletera engulu yowene, mulwe oko myatsi mityamitya mubindukira Mungu oyuriho oyo wabumba olubula ne kihugo nengetsi nebyosi ko birimo.

¹⁶ Omo syondengo syabirilaba abirileka ebihanda byosi erilendera omo syonzira syabo ibobene;

¹⁷ nikwa mwatayileka butsira omulangiri, kusangwa mwakola bibuya mwabaha embula erilwa elubula, nebirimo byerigesa, akugutaya emitima yenyu nakaryo nobutseme.

¹⁸ Omo binywa ebi mobasonda eritaluka erikakirya bandu erihererebo.

Eriswirya Paulo na mabwe

¹⁹ Nikwa abaYuda mobahikaho bakalwa Antiokia neIkonio; mobabindula bandu, mobita Paulo omo mabwe, mobamukurira ekyaswa kyomuyi, mobaringikania bati abirihola.

²⁰ Nikwa omugulu abiga bamutimbako, mwahangana mwingira omo muyi: nengyakya mwaya eDerbe haguma na Barunaba.

²¹ Neryo babere babitula engulu yowene oko muyi oyo ibama biyira abiga bangi, mobasuba eListra neIkonio neAntiokia,

²² nerisikya emitima yabiga erihanabo bayitsinge omwikirirya, bati ritolere itwingira omo bwami bwoMungu na malige mangi.

²³ Neryo babere babiyisoga abakulu bomo syokanisa syosi, haguma nerisaba neritsira, mobahirabo oko Mukama oyo bikiriraya.

²⁴ Neryo mobalaba ePisidia mobahika ePamfilia.

²⁵ Neryo babere babibuga eKinywa ePerga mobandagalira eAtalia;

²⁶ nerilwa eyo mobaya eAntiokia omo bwato, aho bahirawa oko lukogo lwoMungu busana nomubiri ogo babugirira.

²⁷ Neryo babere babihika, mobahindania ekanisa mobakani ryayo ebyosi Mungu akola nabo, kandi ngoko akingula oluyi lwerikirirya oko Bihanda.

²⁸ Neryo mobikalayo migulu mingi haguma nabiga.