Emibiri 13 - Nouveau Testament et Psaumes en Ndandi Version 1962

Olugendo lwaPaulo lwerimbere

¹ Omo kanisa ya Antiokia mohabya abaminyereri nabaka ngirirya, Barunaba na Simeoni uyu akahulawa mo Nigeri, na Lukio weKurene, na Manaeni oyo walemberawa haguma nomwami Herode, na Saulo.

² Omugulu babya bakasaba oMukama neritsira karyo, eKirimu Kibuyirire kiti, Munyiso mbolere Barunaba na Saulo busana nomubiri nabirikirirabo.

³ Neryo babere babitsira nerisaba mobahira kubo kwebyala, mobatumabo.

Elema

⁴ Kandi babitumwa neKirimu Kibuyirire mobandagalira eSeleukia; nerilwa eyo mobwato mobasokira eKipuro.

⁵ Babere bahika Salami, mobabuga eKinywa kyoMungu omo manyumba werihindana wabaYuda. Ibanawite Yoane eriwatikyabo.

⁶ Neryo bamabilendera omo kitsira ekyo kyosi erihika Pafo, mobeya omusaki, omuminyereri wamabihi wabaYuda oyo kahulawa mo Bara-Yesu.

⁷ Abya haguma nomurongani, Sergio Paulo, omundu wa menge. Oyo wabirikira Barunaba na Saulo akasonda eriowa eKinywa kyoMungu.

⁸ Nikwa Elema omu kumu (kusangwa eribindula erina riwe ryeryo) mwalwa nabo, iniakasonda eribindula omurongani oyo aleke erikirirya.

⁹ Nikwa Saulo, oyo kahulawa mo Paulo, iniuswire neKirimu Kibuyirire, mwamusamalira kutsibu

¹⁰ mwabuga ati, Uwe mugala weSatani, enzigu yebitunganene byosi, goswire neriteba ryosi nobubi, siwendisyombya erihengemya esyonzira situnga nene syoMukama kwehi?

¹¹ Na lino, lebaya ebyala byo Mukama biri kuwe, wasyabya ndimatime inutatoka erilola oko ryuba oko katambi. Neryo, neryo ekihohe nomwirimya mobyamutogerako; naye mwalendera akamatamata erisondya bandu berimusondola nebyala.

¹² Neryo omurongani mwiki rirya, omugulu alangira ekyakolawa, kusangwa aswekera erikangirirya ryoMukama.

Eritulago ryaPaulo eAntiokia yePisidia

¹³ Nikwa Paulo na bali kyabo mobalwa ePafo omo bwato, mobasokera ePerga mo Pamfilia: na Yoane mwasigabo mwasuba eYerusalema.

¹⁴ Nikwa mobatwangana erilwa Perga erihika Antiokia ya Pisidia. Noko kiro kyasabato mobingira omo nyumba yerihindana, mobikala.

¹⁵ Babere babisoma ebihano nabaminyereri, abarongani benyumba yerihindana mobatumira kubo, bati, Balikyetu, mwamabya muwite eKinywa kyerihana bandu, mubugekyo.

¹⁶ Paulo mwahangana, mwakoheryabo omo byala ati, Abalume beIsraeli, nenyu inywe mukakenga Mungu, muhu likirire.

¹⁷ Omungu wekihanda eki kyeIsraeli ayisoga abotata wetu mwayirabo mo bandu bakulu eryo babya babunga omu kihugo kyeMisiri, kandi mwalusyabo mukyo eyo omo kuboko kuwe kwamaka.

¹⁸ Noko mituta amakumi ani mwahekabo omo mbwarara.

¹⁹ Abere abiherya ebihanda birinda omo kihugo kyeKanana, mwahabo e kihugo kyabo omo mwandu, emituta amagana ani na makumi atano.

²⁰ Nenyuma waho mwahabo abatsweri erihika oko muminyereri Samweli.

²¹ Enyuma waho mobasaba erihabwa omwami; Mungu mwahabo Saulo, mugala wa Kisi, omundu wekitunga kya Benyamina, emituta amakumi ani.

²² Abere abimulusyaho mwahangania Dawidi eribya omwami wabo; mwamukania, ati, namabana Dawidi mugala wa Yese, omundu oyu katsemesaya omutima wage, oyo wasyakola ebyo nyanzire byosi.

²³ Oko lubuto lwomundu oyu Mungu abiriletera Israeli oMulamya, Yesu, ngoko alaga.

²⁴ Embere werihika riwe Yoane mwatula engulu yeribatisya ryeribinduka oko bandu bosi baIsraeli.

²⁵ Yoane abere abuga mubiri wuwe, mwabuga, ati, Muka ganiraya muti ingyendi kwehi? Sindiye eyihi, nikwa enyuma kwingye ikasa mundu, ingye sinyitolere erikundula esyonge ndero syebisandu biwe.

²⁶ Balikyetu, abagala bekitunga kya Abrahamu, nabo omukati-kati kenyu abakubaha Mungu, omwatsi werilama eri ryabiritumwa okwitwe.

²⁷ Busana nabo abikere eYerusalema nabarongani, kusangwa mobatamuminya kutse ebinywa byaba minyereri ebikasomawa oburi sabato, mobaberererya ebi eri mutswera lubi.

²⁸ Nomo banabula ekyangamwitisya, mobasaba Pilato bati itawe.

²⁹ Neryo babere babiberererya ebyosi ebyasakawa busana naye, mobamubamba oko muti, mobamu hira omwisinda.

³⁰ Nikwa Mungu mwamulubukya oko baholi;

³¹ nebiro bingi mwabutukira abahetukira eYerusalema haguma naye balwa eGalilaya, bo balangiri buwe lino oko bandu.

³² Netu tukabaletera engulu yowene tuti ebyo Mungu alaga abotata,

³³ abiriberereryabyo ukwitwe abana babo busana nerilubukya Yesu; ngoko risakire omo Sauma ya kabiri riti, Uri mugala wage, Munabwire namakubuta.

³⁴ Kandi kwa mulubukaya oko baholi, eritindasuba okwihonda, mwabuga ati, Nasyakuha omuyisa abuyirire nowasikire wa Dawidi.

³⁵ Neryo akabuga omo yindi Sauma ati, Siwendisyaleka Oyu buyirire wawe akalola okwihonda.

³⁶ Kusangwa Dawidi, abere abika erihana ryoMungu omo lulengo luwe, mwagotsera, mwahirwa haguma nabotata wuwe, mwahonda;

³⁷ nikwa oyo alubukaya mwatalola okwihonda.

³⁸ Neryo kiminyikale okwinywe, balikyetu, busana nomundu oyu eribuyirwa ryebibi rikakangiriribawa kwinywe:

³⁹ na busana naye oburi mundu oyu kikiriraya iniamabiboholwa oko byosi ebyo mutemwangatoka eriboholwa nebihano bya Musa.

⁴⁰ Mutegaye, neryo, sibibahikeko ebyabugawa nabaminyereri, bati:

⁴¹ Lebaya, inywe abasunati, musweke, muhere; Kusangwa ngakola omubiri oko biro byenyu, Omubiri ogo mutindasikirirya, omundu nomwangabaka-niryago.

Paulo akabindukira eBihanda

⁴² Neryo omugulu bahuluka, abandu mobamugonga-gonga bati emyatsi eyi babwiraweyo kandi oko yindi sabato.

⁴³ Nikwa erihindana ryabere ryahwa omo nyumba yerihindana, abaYuda bangi nababinduka oko baYuda abagenge mobakwama Paulo na Barunaba, nabo mobabuga nabo nerihatikanabo bati bakwamirire omu lukogo lwo Mungu.

⁴⁴ Noko sabato yakabiri omuyi gosi mwahindana eriowa eKinywa kyoMungu.

⁴⁵ Nikwa abaYuda omugulu balangira esyondeko, mobusula neritsura mobagana ebyo byabugawa na Paulo, mobamutsuma.

⁴⁶ Na Paulo na Barunaba mobabuga neritindiubaha, bati, Ryabya ritolere eKinywa kyoMungu ikyatsuka eribugwa nenyu. Kusangwa mwamagumiryakyo kwinywe, mukayiganza simutolere engebe yerikota, lebaya, twamabindukira oko Bihanda.

⁴⁷ Kusangwa oMukama mwa tutegeka ati, Nabirikuhiraho eribya ekyakala kyeBihanda Imwaleta erilama erihika oko nduli ye kihugo.

⁴⁸ EBihanda byabere biowa eki, mobasima, mobapipa eKinywa kyoMungu; nabosi abayisogawa busana nengebe yerikota mobi kirirya.

⁴⁹ Nekinywa kyoMukama mokyapanzikana omo kihugo ekyo kyosi.

⁵⁰ Nikwa abaYuda mobababirirya abakali bagenge bolukengerwa nabakulu bomuyi, mobasembegetya eriendererya ku Paulo na Barunaba mobahigabo omo kihugo kyabo.

⁵¹ Nikwa mobakungutirabo olututu olo mo bisandu byabo mobaya eIkonio.

⁵² Nabiga mobusula nobutseme neKirimu Kibuyirire.