Emibiri 12 - Nouveau Testament et Psaumes en Ndandi Version 1962

Petero omo muliki neriboholwa riwe

¹ Oko mugulu oyo omwami Herode mwahamba abandi bekanisa nekiniga erikolabo nabi.

² Mwita Yakobo mugala wabo Yoane omo muyari;

³ abere alangira ko kyama tsemesya baYuda, mwaswayahamba Petero. Oyo abya mugulu wobundu bute mo kihamya.

⁴ Abere abimuhamba, mwamuhira omo nyumba yomuliki, mwamuha oko basoda erikumi nendatu erimuteya banibani, iniakasonda erimuletera abandu Pasaka yahwa.

⁵ Nikwa Petero mwateyibwa omo muliki; nikwa ekanisa moyamusabira oko Mungu nomuhwa.

⁶ Nomo kiro ekyo Herode asonda erimuhulukiryabo, Petero abya agotsere omukati-kati kabasoda babiri, inianabohire omo mahulula abiri, nabateya ibanimene embere syoluyi ibakategaye enyumba yomuliki;

⁷ neryo lebaya, omulaika woMukama mwabutuka, nekyakakala mokyakolerya omo kakonde; naye mwabanda ku Petero oko lukanga mwamubukya, ati, Hangana luba. Namahulula mwalwa oko byala biwe.

⁸ Nomulaika mwabuga naye, ati, Uyiswike, wambale esyongendero syawe. Naye mwakola atya. Uyiringire kwekanzo yawe unyikwame.

⁹ Neryo mwaya eyihya mwamukwama; isiasi ebikakolawa nomulaika nga ni kwenene, nikwa mwaganirya ngakalola oko nzoli.

¹⁰ Babere balaba oko muteya owerimbere noko wakabiri, mobahika okwirimbo ryekiuma erikalola oko muyi. Neryo moryayikingula iryo ryene, mobaya eyihya mobalaba omo nzira nguma; neryo-neryo mulaika mwamusiga.

¹¹ Neryo Petero amabibuka, mwabuga ati, Lino namaminya kwenene ko Mukama abirituma omulaika wuwe erinyitongolya omo byala byaHerode noko myatsi yosi abaYuda basonda erinyikola.

¹² Amabiminya ekyo, mwaya ahari enyumba ya Maria nyinya wa Yoane, oyo waswalukawa erya Mariko, ahabya hahindene bangi bakasaba.

¹³ Neryo abere ahumanga oko luyi lweri rimbo, mwanamuto oyu kahulawa mo Roda mwasa erihulikirira.

¹⁴ Mwaminya omulenge wa Petero, nomo butseme buwe mwatakingula eririmbo nikwa mwatibita mwingira omo nyumba mwabwirabo ko Petero anahangene okwirimbo.

¹⁵ Nabo moba mubwira bati, Uri kwisire, Nikwa iye mwayitsinga ko kuri kwenene. Nabo bati, Ni mulaika wuwe!

¹⁶ Nikwa Petero mwayitsinga erihumanga; nomugulu bakingulaho, mobamu lolako mobasweka.

¹⁷ Nikwa iye mwakoheryabo ati babye bukutu, mwakaniryabo ngoko Mukama amamulusya omo nyumba yomuliki ati, Mubwire Yakobo na balikietu. Neryo mwalwaho mwaya handi.

¹⁸ Bwabere bwakya, mohabya erigangaganga omukati-kati kabasoda Petero ngayirehi.

¹⁹ Na Herode abere abimusonda sonda mwamubula, mwabulya bateya neryo mwategeka ati bitawe. Neryo mwandagalira eKaisaria akalwa Yudea, mwa byayo.

Erikanuka ryaHerode

²⁰ Nikwa Herode mwagarirwa oko bandu abeTiro neSidona; neryo mobasa haguma, mobatwana kobwira na Balasto, oyu kategaya engonde omwami akagotseramo, neryo mobasaba obuholo, kusangwa e kihugo kyabo ikikabana akaryo omo kihugo kyomwami.

²¹ Noko kiro kyategekawa Herode mwambala olukimba lwobwami, mwikala oko kitumbi kiwe kyobwami, mwakaniryabo.

²² Nabandu mobabugira iguma bati, Ni mulenge woMungu, si mulenge womundu!

²³ Neryo-neryo, omulaika woMukama mwamuswirya, kusangwa mwataha Mungu erikengwa; neryo mwaribwa nemihuka mwahola.

²⁴ Nikwa eKinywa kyoMungu mokyakanya mokyabya kingi.

²⁵ Na Barunaba na Saulo mobalwa eYerusalema ibamabibuga omubiri wabo, mobaletania Yoane oyo walukawa mo Mariko.