Emibiri 11 - Nouveau Testament et Psaumes en Ndandi Version 1962

Erikania rya Petero busana neBihanda

¹ Neryo abakwenda na balikietu ababya eYudea mobowa kweBihanda byabiriangirira eKinywa kyoMungu.

² Na Petero abere abihetukira eYerusalema, ababwene mobamuha yira, bati,

³ Busana naki waya oko batabwene warira haguma nabo?

⁴ Nikwa Petero mwatsuka erikaniryabo mwatondola kigumakiguma: ati,

⁵ Nabya oko muyi wa Yopa ngasaba; monabya omo bulime monalangira omo syonzoli ekindu kika ndagala, ngolukimba lunene, ilulerembirye nesyongonde ini erilwa elubula; mokyambikako.

⁶ Monasamalirakyo ndeke monalangira syonyama syemihimbi ini, esyahesi nesyomoli, nesikayikura ahisi, nesyonyonyu syomokyanya.

⁷ Monowa omulenge akabuga nage, ati, Hangana, Petero; usinze urye.

⁸ Nikwa nage nyiti, Eyihi, Mukama: kusangwa sihari kindu buyira kutse kindu kibi ekingira omo obuno bwage ne kera; nikwa omulenge mwanyisubirya engendo ya kabiri erilwa elubula, ati,

⁹ Ebyo Mungu abirierya susololebyo eriahulabyo mo buyira.

¹⁰ Omwatsi oyu mwabya atya ngendo isatu, nebyosi mobyasumbirwa omo lubula.

¹¹ Noko ndambi eyo abandu basatu mobahika oko nyumba eyo twabyamo, batumawa kwingye erilwa eKaisaria.

¹² NeKirimu mokyambwira kiti nyigende nabo butsira eritika-tika. Abalikyetu aba endatu moba genda nage, motwingira omo nyumba yomundu oyo.

¹³ Naye mwatubwira ngoko alangira omulaika inianimene omo nyumba yiwe akabuga, ati, Utume eYopa utumire ku Simoni oyo kahulawa mo Petero;

¹⁴ asyakutulira omwatsi ngoko wasya lamibwa, uwe nenyumba yawe yosi.

¹⁵ Nage nabere natsuka eribuga, eKirimu Kibuyirire mokyandagalira kubo ngoko kyatwandagalirako embere.

¹⁶ Monibuka eKinywa kyoMukama, ngoko abuga ati, Yoane abatisaya omo magetsi, nikwa inywe mwasyabatisibwa omo Kirimu Kibuyirire.

¹⁷ Omungu ama habo erihitya eryo ngoko atuharyo omugulu twikiriraya oMukama Yesu Kristo, ingye nabya ndi nyiti nangatoka erilwa noMungu kwehi?

¹⁸ Babere bowa ebyo mobabya bukutu mobapipa Mungu, bati, oMungu abiriha oko Bihanda nibya eribindukira oko engebe.

Eritsuka eriahulwa mo baKristo eAntiokia

¹⁹ Neryo abapanzawa busana neriendererya eryatsuka busana na Setefano mobalendera erihika Foiniki neKipuro neAntiokia, ibakabwira abaYuda basa eKinywa.

²⁰ Nikwa habya abandi bakubo, abandu beKipuro nabeKurene babere babihika eAntiokia mobabuga na baGiriki, bakatula engulu yoMukama Yesu.

²¹ Nebyala byoMukama byabya nabo, nabangi mobi kirirya mobabindukira oko Mukama.

²² Nengulu eyi moyahika omo matwi wekanisa eYerusalema, nabo mobatuma Barunaba eAntiokia.

²³ Abere abihikayo alangira olukogo lwoMungu, mwatsema; mwahanabo bosi ati bakwamirire oMukama nomu tima asikire:

²⁴ kusangwa abya mundu mubuya, iniuswire neKirimu Kibuyirire nerikirirya: nendeko nene moyatome kerwa oko Mukama.

²⁵ Neryo, Barunaba mwaya Tarso akaya sonda-sonda Saulo;

²⁶ abere amubana mwamuleta eAntiokia. Noko mututa mugima mobahindana nekanisa, mobakangirirya endeko nene ya bandu; eAntiokia yabiga batsukira eriahulwa mobaKristiano.

²⁷ Noko biro ebi abaminyereri mobalwa eYerusalema bakaya eAntiokia.

²⁸ Nomuguma wakubo oyo kahulawa mo Agabo mwahangana mwaminyerera iniabiribwirwa neKirimu, ati, Enzala nene yasyabya omu kihugo kyosi: neki mokyabererera omu biro byaKlaudio.

²⁹ Nabiga omo lulengo lweritoka ryo buri mundu, mobaringikania erituma oko balikyabo abikere eYudea ebyeriwatikyabo;

³⁰ mobakola batya, mobatumabyo oko bakulu omo byala bya Barunaba na Saulo.