Emibiri 1 - Nouveau Testament et Psaumes en Ndandi Version 1962

Yesu eriya elubula

¹ Omo kitabu ekyerimbere, uwe Teofilo nabirikusakira, bu sana nebyosi Yesu atsuka erikola nerikangirirya,

² erihika oko kiro akokibawa endata, amabitegeka abakwenda abo ayisoga busana neKirimu Kibuyirire:

³ mwayikangya kubo inianeho enyuma wobuligo buwe busana nebiminyikalo bingi, neribu tukirabo ebiro amakumi ani akabuga emyatsi yobwami bwo Mungu:

⁴ Neryo abere akine nabo, mwategekabo ati sibalwe eYerusalema, nikwa balindirire erilaga rya Tata, ati, eryo mowa kwingye:

⁵ kusangwa Yoane abatisaya omo magetsi; nikwa inywe mwasyabatisibwa omo Kirimu Kibuyirire kute kwakya ebiro bingi,

⁶ Nabo, bamabihindana haguma, mobamubulya bati, Mukama, oko mugulu oyu ukandisubya obwami oko Israeli kwehi?

⁷ Naye mwabwirabo ati, Si busana nenyu eriminya emigulu kutse ebirimo, ebyo Tata abiritegeka omo hamuli yiwe iyowene.

⁸ Nikwa mwasyabana maka, eKirimu Kibuyirire kyabibahikako; mwasyabya abatuli bomwatsi wage eYerusa lema, nomo Yudea yosi, neSamaria, nerihika oko nduli ye kihugo.

⁹ Neryo ambibuga emyatsi eyi, ibanatungerere, mwahetukibwa; nekitu mokyamwimya erilwa omo meso wabo.

¹⁰ Nomugulu balalamira elubula akagenda, lebaya, abalume babiri mobahangana hakuhi nabo nesyongimba sihenirye,

¹¹ ababuga bati, Inywe balume beGalilaya, busana naki mu hangene mukasamalira elubula kwehi? Yesu oyu, wamatwalwa elubula erilwa kwimwe, asyasa atya ngoko mwamamulebya akaya elubula.

Amena wabakwenda

¹² Neryo mobasuba eYerusalema balwa oko kitwa ekikahu lawa mo Zeituni, ekiri hakuhi neYerusalema ngolugendo lwe sabato.

¹³ Neryo babere babiingira, mobahetukira omo ngonde yendata yenyumba, neryo mobasibamo; ye Petero na Yoane na Yakobo na Anderea, Filipo na Toma, Balitolomayo, na Matayo, Yakobo mugala wa Alfayo, na Simoni-Zelote, na Yuda mugala wa Yakobo.

¹⁴ Abo bosi omwisonda iguma mobakwamirira erisaba, haguma na bakali, na Maria nyinya wa Yesu, na bagala babo.

Matia

¹⁵ Nomo biro ebi Petero mwahangana omukati-kati kabali kyetu mwabuga (nabo babya endeko ya bandu bahindene haguma ngerigana na makumi abiri) ati,

¹⁶ Balikyetu, amasako abya atolere iniabererera, ayo eKirimu Kibuyirire kyabuga erimbere omo buno bwa Dawidi busana na Yuda, oyo wabya musondoli wa bahamba Yesu.

¹⁷ Kusangwa aganzirawa kwitwe, kandi mwahabwa ekihande kiwe oko mubiri oyu.

¹⁸ (Nikwa omundu oyu mwagula eririma omo luhembo lwebibi biwe; mwatoga mwatulama, mwatulika, nebila biwe byosi mobyasa ndukala.

¹⁹ Neryo mokyaminyikala oko bosi abatula eYeru salema; kyaleka eririma eryo iryahula moAkeldama, omo mubuge wabo, ryeribuga ambu, Eririma ryomusasi.)

²⁰ Ku sangwa kyasakawa omo kitabu kya Sauma, kiti, Aho wuwe kibye kima, Sihasweswikala mundu, Nobukulu buwe bwimibawe nogundi.

²¹ Neryo oko bandu ababirisiba haguma netu endambi yosi eritsuka aho Mukama ingirira omukati-kati ketu neriswahika oko mugulu alwa kwitwe,

²² eritsuka okwibatisya ya Yoane, erihika oko kiro atwalawa endata erilwa kwitwe, omundu muguma wakubo atolere eribya mulangiri haguma netu oweri lubuka riwe.

²³ Mobahira babiri embere syabo, ye Yosefu oyu kahulawa mo Baranaba, oyu waswalukawa mo Yusto, na Matia.

²⁴ Neryo mobasaba, bati, Uwe Mukama, uwe wasi emitima ya bandu bosi, ukanganaye oko aba babiri oyo wamayisoga,

²⁵ erimya omwanya omo mubiri nobukwenda bwa Yuda oyo watoga, agende ho wuwe.

²⁶ Nabo mobakola ekura busana nabo; nekura moyatogera ku Matia; naye mwaganzirwa oko bakwenda ikumi na muguma.