AbanyaRoma 7 - Nouveau Testament et Psaumes en Ndandi Version 1962

Kristo akatubohola oko bihano

¹ Munasi kwehi, balikyetu—kusangwa ngabuga kwabo basi ebihano—kwebihano bikaboha omundu omo biro akiriho bisa kwehi?

² Litya omukali uhikibwe abohirwe nebihano ukwiba wuwe omugulu akiriho; nikwa iba wuwe amahola, iniamaboholwa nebihano ukwiba.

³ Nibya amikala nogundi mulume omugulu iba wuwe akiriho, asyahulwa mo musingiri. Nikwa iba wuwe amahola amaboholwa oko kihano ekyo, isi musingiri nomwangahikibwa nogundi mulume.

⁴ Ritya, balikyetu, mwabirihola oko bihano busana nomubiri wa Kristo, imwatoka erihindanibwa eribya wogundi, kwoyo walubukibawa oko baholi imwatoka eributa ebiguma busana noMungu.

⁵ Omugulu twabyaho omo mubiri, esyongumbu syetu syebibi, sikakunawa nebihano, mosyakola omo bitsuko byetu eributa ebigumo busana noluholo.

⁶ Nikwa lino twama boholwa oko bihano, ituholire oko kyabya kitubohire, kikaleka itwakolera engebe nyihyanyihya yeKirimu butsira masako wakera.

⁷ Neryo tubugeki kwehi? Ebihano ni bibi kwehi? Eyihi na hake! Nikwa, kumbe ebihano biteho, sinangaminya ebibi. Sinangaminya erirumwa ngoko riri kumbe ebihano bitebuga, biti, Surumawe.

⁸ Nikwa ebibi, bikabana omwanya omo bihano, bikakola omwisi wage emisindo yosi yerirumwa. Kumbe hate bihano ebibi ibiholire.

⁹ Omugulu werimbere nabyaho hate ebihano, nikwa ekihano kyabere kyahika, ebibi mobyasuba nage monahola;

¹⁰ ekihano ekyo ekyalaga engebe mokyaminyikala eribya ekikanyiholaya.

¹¹ Kusangwa ekibi kikabana omwanya omo kihano, mokyandeba mokyanyita mukyo.

¹² Ritya ekihano kibuyirire, neritegeka ribuyirire, ritunganene, ni ribuya.

Obukobe bwebibi

¹³ Neryo ekine kibuya mokianyiletera oluholo kwehi? Eyihi na hake! Byabya ini bibi, bikakola oluholo mwisi wage omo nzira yebibuya, ebibi biminyikale kobiri bibi, nomo nzira yeritegeka ibyabya nabi kwilaba lulengero.

¹⁴ Tunasi ebihano kobiri byekirimu; nikwa ingye ndi womubiri, naguribawa omo bibi.

¹⁵ Sindiminya ebyo ngakola. Kusangwa sindikola ekyo nyanzire, nikwa ekyo ngakwa obusu kyo ngakola.

¹⁶ Neryo namakola ekyo ndanzire erikola, ngaliga kwe bihano ni bibuya.

¹⁷ Na lino ingye ndekolakyo, nikwa bye bibi ebikere omwisi wage.

¹⁸ Kusangwa nyinasi ko mwisi womubiri wage sihari kibuya ekikeremo. Ngatoka erianza erikola ekibuya, nikwa sinditoka erikolakyo.

¹⁹ Kusangwa ekibuya ekyo nyanzire kyo ndekola, nikwa ebibi ebyo ndanzire byo ngakola.

²⁰ Lino namakola ekyo ndanzire, ingye ndeswakolakyo, nikwa ebibi ebikere omwisi wage.

²¹ Ritya ngabana ekihano kiti omugulu ngasonda erikola ebibuya, ebibi bikere hakuhi nage.

²² Kusangwa ngatsema omo bihano byoMungu, omwisi wo mutima wage,

²³ nikwa ngalangira omo bitsuko byage ekindi kihano kikalwa nekihano kyoburingikania bwage nerinyiboha oko kihano kyebibi ebikere omo bitsuko byage.

²⁴ Ingye mundu wobulige! Ni ndi wasyanyitongolya oko mubiri oyu woluholo kwehi?

²⁵ Wasi ngya kuMungu busana na Yesu Kristo oMukama wetu! Neryo ingye ngakolera ekihano kyoMungu noburingikania bwage, nikwa nomubiri wage ngakolera ekihano kyebibi.