AbanyaRoma 4 - Nouveau Testament et Psaumes en Ndandi Version 1962

Erikirirya rya Abrahamu

¹ Neryo tubugeki busana na Abrahamu, sokulu wetu oko mubiri?

² Kusangwa kumbe ayirawa mo mutunganene busana nemibiri nga wite ekyeriyihalambamo, nikwa butsira embere syoMungu.

³ Kusangwa amasako akabugaki? Abrahamu mwikirirya oMungu, naryo moryaganza mo ritu nganene busana naye.

⁴ Neryo oyu kakola, ebihembo biwe sibiganzawa ngerihitya nikwa ngerituha.

⁵ Noyu tekola nikwa ikirirye oyo kayira abate bagenga mo batunganene, erikirirya riwe rikaganzawa mo ritunganene.

⁶ Kandi Dawidi akatsumula omundu oyo Mungu akaganza mo mutunganene butsira emibiri ati,

⁷ Omuyisa ari nababiribuyirwa ebibi byabo, ebibi byabobyabirikuningirwa;

⁸ Omuyisa ari nomundu oyo Mukama atindasyaganza kwe bibi.

⁹ Omuyisa oyu ari kobabwene ibobene kutse oko batabwene kwehi? Tukabuga tuti erikirirya moryaganzwa ku Abrahamu ngeritunganene.

¹⁰ Moryaganzwa kwiye riti? Moryaganzwa erimbere kutse enyuma weribana riwe kwehi? Siryabya ryenyuma nikwa embere weribana riwe.

¹¹ Naye mwangirira eribana omo kiminyikalo kutse kiminyiso kyeritunganene ekyabya awite ateabanibwa. Busana neribuga ati abye ise wabosi abakikiriraya, batabwene baganzawe mo batunganene,

¹² nakandi atya ise wababwene batabwene risa nikwa abakakwama lulengero lwerikirirya eryo tata wetu Abrahamu abya awite ate abanibwa.

¹³ Erilage uku Abrahamu noko lubuto luwe, riti asyimya e kihugo mo mwandu, moritasa busana nebihano nikwa busana neritunganene ryerikirirya.

¹⁴ Kumbe abakakwama ebihano, bo bari bomwandu, erikirirya nga ni buyira nerilaga naryo ini busa:

¹⁵ kusangwa ebihano bikaleta eriagarirwa, nikwa ahate ebihano sihari kibi.

¹⁶ Kikaleka iryahangana okwikirirya, erilaga ritoke eribya olukogo iryatoka erisika oko lubuto losi—butsira abakwamire ebihano ibobene nikwa ukwabo abakasangira erikirirya ry Abrahamu kusangwa iye ni tata wetu itwe bosi,

¹⁷ ngoko risakire riti, Nabirikuyira mo tata webihanda bingi—embere syoMungu oyo ikiriraya, oyu kaha engebe oko baholi oyo kabirikira ebindu ebiteho ibyabyaho.

¹⁸ Omo maha mwikirirya ahate hangahirwa amaha, iniatoka eribya ise webihanda bingi; ngoko abwirawa ati, Olubuto lwawe lwasyabya lutya.

¹⁹ Mwa toloba okwikirirya omugulu alola omubiri wuwe amabya ngaholire kusangwa iniamabibuga emituta ngerigana abutirwe, kutse omugulu alola oko obugumba bwenda yaSera.

²⁰ Sihabya eritika-tika eryangamusukasukya busana nerilaga ryoMungu, nikwa mwakula namaka omwikirirya riwe akaha Mungu olu kengerwa,

²¹ mwaminya ndeke ko Mungu angatoka erikola ekyo alaga.

²² Ekyo kyaleka erikirirya riwe iryaganzwa mo ritunganene.

²³ Nikwa ebinywa, biti ryaganzawa okwiye, mobitasakwa busana naye iyowene,

²⁴ nikwa busana netu nibya. Ryasyaganzwa kwitwe itwe tukikiriraya oyo walubuki bawa oko baholi Yesu oMukama wetu,

²⁵ oyo witawa busana na malolo wetu alubukibawa erituyira mo batunganene.