AbanyaRoma 3 - Nouveau Testament et Psaumes en Ndandi Version 1962

Abosi ni bakola nabi

¹ OmuYuda alengire abandi ati kwehi? Kuste eribana rikakuba lwahi kwehi?

² Bilengire omo byosi. Eritsuka, abaYuda mobabikibwa ebinywa byoMungu.

³ Kwa abandi bamabya butsira erikirirya kwehi? Eritindikirirya ryabo rika sangula eritindasiganirya ryoMungu kwehi?

⁴ Na hake! OMungu abye wekwenene nomo buri mundu abye wamabihi ngoko kisakire kiti, Ubanike neritunganene omo binywa byawe, Usingane omugulu ukatswerawa.

⁵ Nikwa ebitowene byetu byamasondya erikangya eritunganene ryoMungu, tukandibugaki kwehi? Tuti oMungu syatunganene eritusuyira omwagarirwa kwehi? (ngabuga ngomundu)

⁶ Na hake! Kusangwa byamabya bitya Mungu angatswera e kihugo kyati kwehi?

⁷ Nikwa ekwenene yoMungu yamakanya omwi kengwa riwe busana namabihi wage, busana naki nginatswerawa ngo webibi kwehi?

⁸ Busana naki sitwekola ebibi ebyowene ibyatoka eriasa kwehi? ngoko bandi bandu batubihira bati tukabuga tutya. Eritswera ribi ryabo ritunganene.

⁹ Nikwa niki kwehi? Itwe baYuda tulengirebo kwehi? Eyihi, na hake; kusangwa twabiritsuka eritsongera abandu bosi abaYuda nabaGiriki, bari omo maka webibi,

¹⁰ ngoko kisakire kiti: Sihari oyu tunganene eyihi nomuguma;

¹¹ Sihari nomuguma ukaminya, sihari nomuguma oyukasonda-sonda oMungu.

¹² Abosi babirisiga enzira, haguma babirigenda nabi; Sihari nomuguma oyu kakola ndeke, nomuguma.

¹³ Omumero wabo ni sinda itatabire, Bakabuyisaya esyondimi syabo syamabihi Nobuti bwesyondanga buri omwisi weminywa yabo.

¹⁴ Obuno bwabo buswire neritakira nerikariha.

¹⁵ Ebisando byabo bikayihuta okuta omusasi,

¹⁶ Erihera nobulige biri omo nzira syabo,

¹⁷ Sibasi enzira yobuholo.

¹⁸ Sihari eriubaha ryoMungu embere syameso wabo.

¹⁹ Lino tunasi ebyo ebihano bikabuga bikabwira abari mwisi webihano, oburi buno bukumbawe, ne kihugo kyosi kitolere eribya okwitswera ryoMungu.

²⁰ Kusangwa sihari mundu womubiri oyo wasyaganzwa mo mutunganene embere siwe busana nemibiri yebihano kusangwa ebihano byo bikaminyisaya ebibi.

Eritunganene busana nerikirirya Yesu

²¹ Nikwa lino eritunganene ryoMungu ryabiriminyikala butsira omo bihano, nikwa ebihano nabaminyereri bikatula omwatsi waryo,

²² eritunganene ryoMungu busana nerikirirya omwisi wa Yesu Kristo busana nabosi bakikiriraya. Kusangwa sihari gundi na gundi;

²³ kusangwa abosi babirikola nabi babirikeha oko lukengerwa lwoMungu,

²⁴ bakayirawa mo batunganene busana nolukogo luwe ngerihitya, busana nerito ngolya eriri omwisi wa Kristo Yesu,

²⁵ oyo Mungu ahira ngembanulo busana nomusasi wuwe eribanika busana neriki rirya. Eki kyabya ekikakangaya eritunganene ryoMungu, kusangwa omwiganyira riwe mwalaba okwe bibi byerimbere;

²⁶ ryabya erikangania ndeke linolino kwari mutunganene nakandi kwakayira oyo wikirirye Yesu mo mutunganene.

²⁷ Neryo eriyihalamba ryetu rikabya riti kwehi? Rikaka kiribawa. Busana nomwatsi wahi? Busana nomwatsi wemibiri kwehi? Eyihi, nikwa oko mwatsi werikirirya.

²⁸ Kusangwa itwe tuti omundu akayirawa mo mutunganene busana neriki­rirya butsira emibiri yebihano.

²⁹ Kutse Mungu ni Mungu wabaYuda ibobene kwehi? Iye si Mungu weBihanda nibya kwehi? Ega, ni weBihanda nibya,

³⁰ kusangwa Mungu ni muguma; asyayirabo mo batunganene ababwene busana neri­kirirya ryabo, nabatabwene busana nerikirirya ryabo.

³¹ Neryo tukagusa ebihano busana nerikirirya eri kwehi? Na hake! Nikwa tukasikaya ebihano.