AbanyaRoma 2 - Nouveau Testament et Psaumes en Ndandi Version 1962

AbaYuda neBihande

¹ Uwe mundu, nomo wangabyandi, suwite ekyeriyihambulya, omugulu ukatswera ogundi yo lubi, kusangwa wamamu tswera olubi ukayisinga, kusangwa uwe mutsweri, nawe unemukola ngo kwakakola.

² Netu tunasi eritswera ryoMungu rikabya kwenene oko bakakola emyatsi eyo.

³ Uwe mundu ukaganiraya uti omugulu ukatswera abakakola emyatsi eyi nawe unemukolayo, uti wasyabala eritswera ryoMungu kwehi?

⁴ Kutse ukapona ebindu byeriyira ndeke riwe nolukogo neri lindirira riwe kwehi? Siwasi kweriyira ndeke ryoMungu rikakutwala okwibinduka kwehi?

⁵ Nikwa busana nomutima wawe akalakalire owatebinduka ukayibikira eriagarirwe busana nawe oko kiro kyeriagarirwa omugulu eritswera ritunganene ryasyabisulwa.

⁶ Kusangwa asyariha oburi mundu ngebitolere emibiri yiwe;

⁷ oko bateluha omwikola ndeke bakasonda olukengerwa nerisikya neritindahola, asyahabo engebe yerikota;

⁸ nikwa busana nabomwaga sibaliowa ebyekwenene, nikwa bakowa ebitisirire, hasyabya eriagarirwa nerikarama.

⁹ Hasya bya eryendererya nobulige oko buri mundu oyu kakola ebibi, eritsuka oko muYuda erihika oko muGiriki;

¹⁰ nikwa olu kengerwa nerisikya nobuholo oko buri mundu oyu kakola ndeke eritsuka oko muYuda noko muGiriki nibya.

¹¹ Kusangwa Mungu syarisombola bitaga.

¹² Abosi ababirikola ebibi butsira ebihano basyahera butsira ebihano, nabosi ababirikola ebibi ibanasi ebihano basyatswerwa nebihano.

¹³ Kusangwa butsira abakowa ebihano bobatunga nene embere syoMungu, nikwa banabo abakola ebihano bo bakandisyayirwa mo batunganene.

¹⁴ Omugulu eBihanda abatawite ebihano bakakola ebyebihano ibobene, ibyabya ebi hano busana nabo, isibawite ebihano.

¹⁵ Bakakangya ekyo ebihano bikategeka kisakire omo mitima yabo, omugulu omu lenge gomutima wabo akatula omwatsi namaringikania wabo awagulukirana akahandikirirabo kutse eriganirabo;

¹⁶ oko kiro ekyo Mungu asyatswera ebibisire byabandu nge ngulu yowene yage, uku Yesu Kristo.

OmuYuda wekwenene

¹⁷ Nikwa wamayahula mo muYuda ukayiketera ebihano ukayihalamba oko Mungu,

¹⁸ ukaminya erisonda riwe inu kasima ebibuya, kusangwa wabirikangiriribwa ebyebihano,

¹⁹ wamabya wasi ndeke kuri musondoli wesyondimatime, ekyakakala kyabari omo mwirimya,

²⁰ oyo kakunga ebikiru, omukangirirya wabana, imunawite omo bihano ekiminyisyo kyamenge ne kwenene—

²¹ uwe ukakangiriraya abandi, inutayikangirirya kwehi? Uwe ukakangiriraya omundu uti siibe, iwiba kwehi?

²² Uwukabuga uti omundu isyasingira, iwasingira kwehi? Uwu kagarirawa okwisumba, iwiba omo hekalu yasyo kwehi?

²³ Uwu kayihalamba omo bihano, iwita Mungu esisoni ukaketa ebihano kwehi?

²⁴ Kusangwa kisakire kiti, Erina ryoMungu rikatsumawa omukati-kati keBihanda busana nenyu.

²⁵ Eribana riwite endundi wamakola ebihano; nikwa wama keta ebihano eribana ryawe iryahinduka eritindabana.

²⁶ Neryo omundu oyu tabwene amateya eritegeka ryebihano, eritindabana riwe siryendisyaganzwa ngeribana kwehi?

²⁷ Neryo abo bata bwene oko mubiri nikwa bakategaya ebihano basyabatswera olubi uwe uwite ebihano bisakire neribana nikwa ukaketa ebihano.

²⁸ Kusangwa omuYuda wakwenene si yoyu kami nyikala oko mubiri, kutse eribana ryekwenene si kindu kyendata yomubiri.

²⁹ Yono muYuda oyune muYuda nomwisi, neribana eryekwenene ni ryomutima, nekirimu butsira eryamasako. Neripipwa riwe siryelwa oko bandu rikalwa oko Mungu.