AbanyaEfeso 6 - Nouveau Testament et Psaumes en Ndandi Version 1962

Erihana ryekitunga

¹ Abana, mowe abakababuta omwisi woMukama, kusangwa eki kitunganene.

² Usikaye tata wawe na koyo wawe (eki ni kihano kyerimbere ekiwite erilaga),

³ ubane omuyisa kandi ukote mona kihugo.

⁴ Nenyu abise, simuhitanaye abana benyu, nikwa mukulayebo musuyirebo nerikangiriryabo omwisi wo Mukama.

Erihana ryabakama nabahingi

⁵ Abakobe, mowe abakama benyu abari mona kihugo, haguma neriubaha nerititimana, nomutima muguma, ngoko mukowa Kristo;

⁶ butsira erikola erilolwako, kutse ngeritsemesya abandu, nikwa ngabagombe baKristo, erikola erisonda ryo Mungu erikalwa omo mutima,

⁷ erikola omubiri nomutima owene ngerikolera oMukama butsira ngabakakolera abandu,

⁸ imunasi kwebyosi mundu akakola, asyatuhwa kandi no Mukama, nomwangabya omukobe kutse oyu kayigenderaya.

⁹ Abakama, mukolebo mutya nenyu, muleke eriubahya, imunasi kwari Mukama wabo nowenyu elubula, kandi sihari ebitaga ewuwe.

Abasirikari nebindu byamalwa

¹⁰ Ekikisiya, mubye namaka omwisi woMukama nomo kagala kobutoki buwe.

¹¹ Mwambale ebindu byosi byamalwa ebyoMungu, imwatoka erihangana erilwa namenge gosi we Satani.

¹² Kusangwa siturilwa nomubiri nomusasi, nikwa tukalwa namami, nebyamaka, nabarongani be kihugo omo mwirimya wasesene, nemilondo yebirimu yebibi aho elubula,

¹³ Neryo muhambe ebindu byosi byoMungu byamalwa, imwatoka erisika omo kiro kibi, kandi mwamabikola ebyosi, muhangane.

¹⁴ Neryo muhangane, imwamabiboha esyombindi syenyu omo mwatsi wakwenene, imwamabiambala ebyuma byeritunganene omo kikuba,

¹⁵ imwamabiambala esyonge ndero syengulu yowene yobuholo;

¹⁶ kandi kwilaba ebyosi mwimaye engabo yerikirirya, imwatoka erilima emisoha yosi eyomundu mubi eyikaka.

¹⁷ Kandi mwimaye akakira kerilama, nomuyari weKirimu, kye kinywa kyoMungu.

¹⁸ Musabe emigulu yosi omo Kirimu, nerisaba ryosi nerigo. Kandi mutegaye neritindaluha, imukasabira ababuyirire bosi.

¹⁹ Nage munyisabire, nyibane erihabwa eribuga nerikumbula obuno bwage neritindiubaha erikania ekibisire kyengulu yo wene,

²⁰ nage ndi mukwenda wayo omo mahulula; nyitulego neritindiubaha, ngoko ritolere inabuga.

Erilagana

²¹ Nikwa mutoke eriminya engulu yage nebyo ngakola, Tikiko mulikyetu mwanze nomukwenda oyu tesiganiraya omwisi woMukama akandisyabatulira ebyosi.

²² Yo namatuma okwinywe busana nomwatsi oyu muminye emyatsi yetu, kandi iniatoka eribasikya emitima.

²³ Obuholo bubye oko balikyetu, nolwanzo haguma neri kirirya, bikalwa ewoMungu Tata noko Mukama Yesu Kristo.

²⁴ Olukogo lubye nabosi abakanza oMukama wetu Yesu Kristo nolwanzo olutehola.