AbanyaEfeso 4 - Nouveau Testament et Psaumes en Ndandi Version 1962

Obuguma bwetu omwisi werikirirya

¹ Neryo ingye, mundu womuliki busana noMukama, nga bago mulendere ngoko ritolere eribirikira eryo mwabirikirawamo,

² omwiyikehya yosi neriyibombeka, neri tindaluha, neriganyirana omo lwanzo,

³ eribya nomuhwa erisikya obuguma bweKirimu omo muliki wobuholo.

⁴ Hari mubiri muguma neKirimu kiguma, ngoko mwabirikirawa oko maha maguma owakabya okwibirikirwa ryenyu,

⁵ oMukama muguma, erikirirya iguma, eribatisya iguma,

⁶ oMungu muguma Tata witwe bosi, oyuri endata kobosi nomukati-kati ka bosi nomwisi wabosi.

⁷ Nikwa oko buri mundu kwitwe olukogo molwahabwa ngolulengo lwerihitya rya Kristo.

⁸ Neryo kyabiribuga kiti, Omugulu ahetukira endata mwatwala endeko yabanyegwa, Mwaha erihitya oko bandu,

⁹ (eribuga riti, Ahetukira, ni musindoki kwehi? eryo andagarira omo syongonde sye kihugo syeyikwa.

¹⁰ Oyo wandagala yonoyo wahetukira endata kutsibu kwilaba elubula losi, iniatoka eri usulya emyatsi yosi.)

¹¹ Erihitya riwe ryabya riti abandi babye abakwenda, nabandi babye baminyereri, nabandi abatuli bengulu yowene, nabandi barisya nabakangirirya,

¹² busana nerihikana ryababuyirire, busana nomubiri werikolera, busana nerihimba omubiri wa Kristo,

¹³ erihika aho twasyahikira omo buguma bwerikirirya neriminya ryoMugala woMungu, erihikana ryomundu erikula, erihika oko lulengo lwobukulu bwerihikana ryaKristo;

¹⁴ itutaswabya abana, abakagusawa eyi neyi nerihekwa namahunga gosi werikangirirya, omo menge wabandu, omo bugobya bwabo omo menge weriteba.

¹⁵ Nikwa tubuge ekwenene omo lwanzo, tukule omo byosi omwisi wuwe oyuri mutwe, ni Kristo,

¹⁶ omwisi wuwe mubiri gosi, akatsu kikanibawa nerilukwa haguma busana neriwatikania ryoburi nungo, ngerikola ryoburi kitsuko, rikaleka omubiri iniakanya neriyihimba omwisi wolwanzo.

Omundu wakera nomundu muhyamuhya

¹⁷ Nikwa ngabuga eki neritulago omwisi woMukama, nyiti, simwangalendera ngoko eBihanda bikalendera, omo busa bwo buringikania bwabo;

¹⁸ amenge wabo abiribya mwirimya, babirigabulwa oko engebe yoMungu busana neritindaminya eriri omwisi wabo, busana nerikala ryabo ryomutima;

¹⁹ ba biribasa kandi babiriyiha okwisingira, nerianguha okwikola oburi musindo we bitisirire.

²⁰ Inywe momutige Kristo yo mutya!—

²¹ mwamabya mwabirimowa nerikangirirya omwisi wuwe ngoko ekwenene iri omwisi wa Yesu.

²² Mwambule mundu wa kera owemibere yenyu yakera oyu kahonda busana nesyongumbu syeriteba,

²³ mubye bahyabahya omo kirimu kyobuganirya bwenyu,

²⁴ mwambale mundu muhyamuhya, oyu kahangikawa nga kisosekanio kyoMungu omo ritunganene neribuyirire byekwenene.

Erigana ebibi emisindo yosi

²⁵ Neryo, muhige amabehi, oburi mundu abuge ekyekwenene na mulikyabo, kusangwa turi bitsuko oburi mundu ku muli kyabo.

²⁶ Mwamahitana isimwakola nabi; eryuba sirirenge munahitene,

²⁷ simuhe Satani omwanya.

²⁸ Omwibi siibe kandi, nikwa akole mibiri yowene omo byala biwe, iniatoka eriha abari nobwaga.

²⁹ Simuleke erikania ibi rikalwa omo muno wenyu, nikwa ebibuya busana nerihimba, ngoko ritolere eriha abakowa olukogo.

³⁰ Simwite eKirimu Kibuyirire kyo­Mungu kyobulige, omwisi wakyo momwahirwa kwekibohi oko kiro kyeritongolibwe.

³¹ Erikariha ryosi nerihitana neriaga rirwa, nolukanda neritsuma, bihigirawe hali kwinywe, haguma na mutima mubi gosi,

³² kandi mukolerane ndeke, eribuyirana, ngoko Mungu naYe omwisi wa Kristo ababuyira.