AbanyaEfeso 2 - Nouveau Testament et Psaumes en Ndandi Version 1962

Erilamibwa omo lukogo

¹ Nenyu yo waleka imwabyaho, omugulu mwabya abaholi busana namalolo nebibi

² ebyo mwabya mukalenderamo erimbere, imukakola emitsye yi kihugo kino, erikwama omu kama wobutoki bwekyanya, ekirimu ekikakola lino omo bagala abatiowa.

³ Kandi netu omukati-kati kabo twagenda tukakwama esyongumbu syomubiri wetu, itukakwama erisonda ryomubiri neryobuganirya, okwibutwa ituri abana berihitana ngabandi.

⁴ Nikwa Mungu, oyuri wobusoki bweriganyira busana nolwanzo lunene olo atwanza nalo,

⁵ nibya itwabiribya baholi omo malolo wetu, mwaleka itwabyaho haguma na Kristo (mwabirilamibwa busana nolukogo),

⁶ kandi mwatulubukya haguma naye, mwatwikalya haguma naye aho mulubula omwisi wa Kristo Yesu,

⁷ neryo oko migulu ikandisyasa iniatoka eritukangya obusoki obutelengawa bwolukogo luwe omo bubuya busana netu omwisi wa Kristo Yesu,

⁸ Kusangwa mwabiri lamibwa omo lukogo busana nerikirirya; neri sikola ryenyu, ni hitya ryoMungu—

⁹ siryalwa oko mibiri, sihabye omundu oyu kayipipa.

¹⁰ Kusangwa turi ikola riwe, erihangikwa omwisi wa Kristo Yesu busana nemibiri yowene, eyo Mungu akokotaya erimbere, ati tulendere muyo.

Situkiri bahali

¹¹ Neryo mwibuke ngoko mwabya erimbere eBihanda oko mubiri, imukahulawa mo batabanirye nabakahulawa mo beri bana, omo mubiri omo byala—

¹² mwibuke ngoko mugulu oyo mwabya mugabene ko Kristo, ababunga oko kihanda kyeIsraeli, na bageni oko amalagano werilaga, isimuwite amaha kandi simuwite Mungu omo kihugo,

¹³ Nikwa lino omwisi wa Kristo Yesu inywe mwabya hali kera mwabiriletwa hakuhi omo musasi wa Kristo.

¹⁴ Kusangwa iye ni buholo bwetu, oyo wayira babiri mo muguma kandi mwaterya oluhimbo lwobuyigu lwerigabana,

¹⁵ amabilusya obuyigu omo mubiri wuwe yo Migambo yategekawa omo binywa byerihana, iniatoka erihangika omwisi wuwe oko babiri mundu muguma muhya muhya, neryo inialeta obuholo,

¹⁶ kandi iniatoka erisangania ababiri oko Mungu omo mubiri muguma busana nomusalaba, iniabuga obuyigu atya.

¹⁷ Neryo mwasa mwabakanirya obuholo inywe mwabya hali na kandi obuholo kwabo babya hakuhi;

¹⁸ kusangwa busana naye itwe babiri tukabana erihika uku Tata omo Kirimu kiguma.

¹⁹ Neryo simukiri ababunga na bagendi, nikwa muri bekitunga haguma nababuyirire nabenyumba yoMungu,

²⁰ Muhimbire oko kibanza kyaba kwenda na baminyereri, Kristo Yesu inibwe inene erikawataya enunga,

²¹ omuryo enyumba yosi ikahindanibawa ndeke ikusula eribya ehekalu ibuyirire omwisi woMukama;

²² omwisi wuwe tukahimbawa haguma eribya aheriikala ryoMungu omo Kirimu.