AbaEbrania 8 - Nouveau Testament et Psaumes en Ndandi Version 1962

Erilagana rihya

¹ Neryo omwatsi tukabuga woyu: tuti, tuwite omuhereri mukulu womusindo oyu, oyu wikere oko byala byamali byekitumbi kyobwami kyoMwenye oBukulu omo lubula,

² omusuyi wahabuyirire nowehema yekwenene eyabandu bata hanganaya nikwa yahanganibawa noMukama.

³ Kusangwa oburi muhereri mukulu akahirawaho eriherera erihitya nobu here; neryo ritolere omuhereri oyu iniabya nekindu kyeriherera.

⁴ Kumbe ari omo kihugo, siangabya muhereri na hake, ku sangwa hari bahereri abakaherera erihitya ngebihano ko bikategeka.

⁵ Bakakolera ekisosekanio nekitsutsu kyahabuyirire ekyelubula; kusangwa omugulu Musa asonda erihangania ehema, Mungu mwamukangirirya ati, Lebaya uyire ebyosi mo kisosekanio ekyo wakanganibawa oko kitwa.

⁶ Nikwa lino, Kristo abiribana obusuyi oburi bubuya kwilaba obwakera ngerilagana eryo akalagana ni ribuya kwilaba kusangwa rika hirawa okwilaga erilabire omo bubuya.

⁷ Kusangwa kumbe erilagana ryerimbere ritaribya mo bulema, nga siharitabya omwanya busana neryakabiri.

⁸ Kusangwa akabana obulema kubo omugulu akabuga ati: Ebiro bikandisyasa, oMukama atya, Nasyahira erilagana rihyarihya nenyumba ya Israeli nenyumba yaYuda;

⁹ Eritaringene nerilagana nalagana na bise wabo Oko kiro nahambabo oko byala Erisondolabo erilwa omo kihugo kyeMisiri; Kusangwa mobatakwamirira omwilagana ryage, Kyaleka inaponabo, oMukama atya.

¹⁰ Erilagana ryeri eryo nasyayira nenyumba yaIsraeli Enyuma webiro ebyo oMukama atya: Nasyahira ebihano byage omo maganiryo wabo, Nasyasakabyo oko mitima yabo, Kandi nasyabya oMungu wabo, Nabo basyabya abandu bage.

¹¹ Sibendisyakangiriryania oburi mundu muli kyabo, Kutse oburi mundu mugala wabo ati, Uminye oMukama, Kusangwa abosi basyanyiminya, Eritsuka oko bakebake erihika oko bakulubakulu.

¹² Kusangwa nasyaganyira ebibi byabo, Isindiendi syaswibuka amalolo wabo.

¹³ Omugulu akahula erilagana rihya iniakaganza eryerimbere nga ryamabya ikulu iryombya. Neryo erikabya ryakera rikakula iryahwaho.