AbaEbrania 7 - Nouveau Testament et Psaumes en Ndandi Version 1962

Yesu oMuhereri nga Melkisedeki

¹ Kusangwa Melkisedeki oyu, omwami weSalemu, omuhereri woMungu wendata okwilaba, mwahindana na Abrahamu mwamutsumula akasubula alwa eyayita abami;

² na Abrahamu mwamuha ekihande kiguma ekyerikumi oko byosi. Eribindula erina riwe, Iye ni wembere, Omwami weritunganene, nibya ni Mwami weSalemu, kiti, Omwami wobuholo.

³ Iye siawite ise kutse nyinya kutse abekitunga, kandi siawite enzuko yebiro kutse enduli yengebe, nikwa erisosa oMugala woMungu akabyaho omuhereri kera na kera.

Melkisedeki alabire Abrahamu na Lawi

⁴ Mulebaye ngokwari mukulu! Abrahamu mwamuha eki hande kyerikumi kyebindu ahunga.

⁵ Na bana abo baLawi abakimaya omubiri wabahereri bawite eritegeka omo bihano riti bimaye oko bandu ekiguma kyerikumi, nabo ni bagala babo nomo bari bana baAbrahamu.

⁶ Nikwa omundu oyu te goko kitunga kyabo mwimya ekiguma kyerikumi uku Abrahamu kandi mwamutsumula oyu wabya nerilaga.

⁷ Sikiri ko buhaka ko mukemuke akatsumulawa nomukulu.

⁸ Eno oko bandu bakahola bakimaya ekiguma kyerikumi; nikwa eyo kikimibawa noyo bakatulago bati aneho.

⁹ Omundu anganabuga ati Lawi oyu kahabawa ekiguma kyerikumi, mwariha ekiguma kyerikumi busana na Abrahamu,

¹⁰ kusangwa abya iniakine omo mbindi yisekulu wuwe omugulu Melkisedeki ahindana naye.

Obukulu bwobuhereri bwaKristo

¹¹ Kumbe eribererera ryatokekana busana nobuhereri bwa Lawi (kusangwa abandu bahabawa ebihano omu buhereri obo), kumbe hangabya obwaga bwogundi muhereri erihangana oko musindo wa Melkisedeki, kwilaba oyu wangahulwa omo musindo wa Arona kwehi?

¹² Kusangwa omugulu hakabya eribindula obuhereri, ebihano nabyo bitolere eribindulwa.

¹³ Kusangwa oyu wahulawa omo myatsi eyi abya wekindi kihanda, ekitekyangalwamo na kera omundu wangakola omubiri weriherera.

¹⁴ Kusangwa kyasibwe ndeke koMukama wetu alwa oko Yuda, na Musa mwatahula bahereri omo kihanda ekyo.

¹⁵ Kusangwa eki kiminyikere ndeke kwilaba omugulu ogundi muhereri akahangana oyu ringene na Melkisedeki,

¹⁶ oyo wabiribya muhereri, butsira ngeritegeka omu nzira yeributwa oko mubiri nikwa busana nakagala kengebe eyitetatoka eri heribwa.

¹⁷ Kusangwa kikatulawa busana naye kiti, Uri muhereri kera na kera, Ngo musindo wa Melkisedeki.

¹⁸ Nikwa, ekihano kyerimbere kikalusibawaho busana nobolo bwakyo kitawite ekyo kyangakola:

¹⁹ (kusangwa ebihanomobitetakola kindu kibuya); nikwa amaha owene kwaho abiriletwa, eritukolya hakuhi noMungu.

²⁰ Nago mwatabyaho hate erilahirya.

²¹ Ababya bahereri erimbere mobakola omubiri oyo butsira erilahirya, nikwa oyu mwahulwa omwi lahirya ati, OMukama abirilahirya Isiendisyabinduka, ati, Uri muhereri na kera na kera.

²² Eki kikatuma Yesu iniabya muwato werilagana ryowene kwilaba.

²³ Abahereri berimbere babya bangi, kusangwa bakakiribawa eriikala omo mubiri busana noluholo;

²⁴ nikwa iye akabya oko buhereri endambi yosi butsira eriumbya, kusangwa akabyaho nakera nakera.

²⁵ Busana nekyo akatoka emigulu yosi erilamya abakasegera hakuhi noMungu busana naye, kusangwa akabyaho kera na kera erisabirabo.

²⁶ Kusangwa ryabya ritolere itwabya nomuhereri mukulu womusindo oyo, oyu buyirire, oyute ko mwatsi, oyute neki tingu, oyu wabirihigulwa oko bakola nabi, oyo wahirawa endata oko butuku.

²⁷ Siabya nobwaga, nga bahereri abo bakulu, eritsuka erihera obuhere busana nebibi biwe nenyuma waho busana nebibi byabandu; mwakola ebyo engendo nguma busana nabosi omugulu ayiyira mo buhere.

²⁸ Kwenene, ebihano bikahira abandu omo bolo bwabo eribya abahereri bakulu, nikwa eKinywa kyerilahirya ekyahika enyuma oko bihano, kikahira oMugala oyo wabirihirwa mo mubuyirire erihika kera na kera.