AbaEbrania 6 - Nouveau Testament et Psaumes en Ndandi Version 1962

Tuyitsinge erilola emuliro

¹ Busana nekyo tusige erikangirirya ryerimbere rya Kristo tulolaya emuliro erikula, butsira erihira akandi ekibanza kyeribinduka oko mibiri iholire nerikirirya oko Mungu,

² neri kangirirya busana nerinaba, nerihira kwebyala, nerilubuka ryabaholi, neritswera ryerikota.

³ Tukandisyakola neki Mungu amaliga.

⁴ Kusangwa siryetokekana erisubya okwi binduka kandi abo ababirikoleribwa kwe ekyakakala, kutse ababirigerya erihitya ryelubula kutse ababirisangira eKirimu Kibuyirire,

⁵ kutse ababirigerya obubuya bwekinywa kyoMungu, nakagala komugulu owakandisyasa,

⁶ bamayilusya oko Mungu, sirye tokekana erisubyabo okwibinduka kandi, kusangwa bakabamba oMugala woMungu oko muti ibakamwita esisoni embere wabandu.

⁷ Kusangwa ekitaka ekyabiripulya embula eyikawa kukyo ngendo nyingi, eyikalasaya ebiti byowene busana naba kalimakyo, kikahabawa omuyisa noMungu.

⁸ Nikwa kyama lasya emisaki-saki namatolu, sikiwite endundi kandi kiri hakuhi neritakirwa; nenduli ryakyo ni hisibwa.

⁹ Nomo twangabuga tutya, nikwa busana nenyu, abanze, tunasi ndeke kwemyatsi yowene kwaho ikabya okwilama.

¹⁰ Kusangwa Mungu siaribya atatunganene eribirirwa oko mubiri wenyu nolwanzo mwakanganaya busana naye muka kolera ababuyirire, na lino mukinakolerabo.

¹¹ Netu tukasonda tuti oburi mundu kwinywe akanganaye omuhwa oyo omwi berererya erisika ryamaha erihika oko nduli,

¹² neryo ritya imutabya abagata, nikwa mubye abakagerereraya abakarya omwandu werilaga busana nerikirirya neritindaluha.

¹³ Kusangwa Mungu omugulu alaga Abrahamu, kusangwa sihari gundu umulengire owerilahirya, mwayilahirya,

¹⁴ ati, Kwenene nasyakuha omuyisa nerikukanya.

¹⁵ Ritya, amabisika neritindaluha, mwabana ebyalagawa.

¹⁶ Kwenene abandu bakalahiraya abalengirebo, nomo buhaka bosi bwabo erilahirya rikabuga omwatsi nerisikyago.

¹⁷ Kyo kyaleka Mungu omu gulu asonda erikangya abari bomwandu werilaga eritindabi nduka ryerisonda riwe, mwahiraho erilahirya,

¹⁸ ritya busana nemyatsi ibiri itebinduka, Mungu siaritoka eribiha mubyo, itwe itwatoka erisika kutsibu busana neribana obusagiro, erihamba amaha awahirirwe embere syetu.

¹⁹ Tuwite amaha ayo nge kindu kisikirye omutima ndeke, amaha awakingira ahabuyirire omwisi enyuma wolukimba,

²⁰ aho Yesu abiri ingira erimbere busana netu, iniabiribya omuhereri mukulu wakera na kera omo musindo wa Melkisedeki.