AbaEbrania 3 - Nouveau Testament et Psaumes en Ndandi Version 1962

Kristo ni mukulu kwilaba Musa

¹ Neryo, abagala betu babuyirire, abakasangira eribirikiraryelubula, Muganiraye ndeke Yesu omukwenda nomuhereri mukulu werikirirya ryetu tukakanganaya.

² Abya butsira erisiganirya okwoyo wamuhira, ngoko Musa abya butsira eri siganirya omo nyumba yosi yoMungu.

³ Tse Yesu abiriganzwa kwatolere olukengerwa lunene kutsibu kwilaba Musa ngomu himbi wenyuma ari nerisikya rinene kwilaba enyumba.

⁴ (Kusangwa amanyumba gosi akayira omuhimbi, nikwa omu handi webindu byosi ni Mungu.)

⁵ Nikwa Musa abya butsira erisiganirya omo nyumba yoMungu yosi ngomugombe, eritu lago busana nemyatsi eyasyabugwa enyuma,

⁶ nikwa Kristo abya butsira erisiganirya busana nenyumba yiwe ngo mugala. Netu turi nyumba yiwe twamahamba ndeke eritindiubaha ryetu neriyihalamba omo maha wetu erihika oko nduli.

Simukalaye mitima

⁷ Neryo ngoko eKirimu Kibuyirire kikabuga kiti, Munabwire omugulu mukowa omulenge wuwe,

⁸ Simukalaye emitima yenyu ngo mugulu werimuhitania, Oko kiro kyerirengwako omo mbwarara,

⁹ Ho abotata wenyu banyirengako, Mobalangira emibiri yage emituta makumi ani.

¹⁰ Ekyo kyatuma inagarirwa oko lulengo olo, Monabuga nyiti, Bakatala ebiro byosi omo mitima yabo; Sibetaminya esyonzira syage.

¹¹ Ngoko nalahiraya omwihitana ryage nyiti, Sibendisingira omwiluhuka ryage.

¹² Bagala betu, mutegaye, sihabye mundu kwinywe ogo mutima mubi owatikirirye, eribasondola erilwa oko Mungu oyuriho.

¹³ Nikwa muhanane ekiro nekiro, omugulu kikanahulawa mo munabwire, sihabye muguma ukwinywe oyu kakalibawa neri tebya ryebibi.

¹⁴ Kusangwa tukasangira Kristo, kumbe tukahamba ndeke erisika ryetu ryerimbere erihika oko nduli,

¹⁵ omugulu kikabugawa kiti, Munabwire, omugulu mukuwa omulenge wuwe, Simukalaye emitima yenyu ngo mugulu werimuhitania.

¹⁶ Nikwa ni bahi abowa baleta obwanise kwehi? Sibabalwa eMisiri bakasondolibawa na Musa kwehi?

¹⁷ Ni bahi bamu hitanaya emituta amakumi ani kwehi? Sibabakola nabi, ebinda byabo byagwa omo mbwarara kwehi?

¹⁸ Ni bahi alahiriraya ko batindasingira omwiluhuka riwe kwehi? Sibabagana eriowa kwehi?

¹⁹ Ritya tukalangira ko bataluka eriingira busana neritindikirirya.