AbaEbrania 13 - Nouveau Testament et Psaumes en Ndandi Version 1962

Erianzana

¹ Olwanzo olwomusindo owabagala babo lubye.

² Simwi birirawe erikokya abageni, kusangwa ritya abandi babiri kokya abalaika isibasibo.

³ Mwibuke abari omo muliki, nga muri omo muliki haguma nabo; na bakakolawa nabi, kusangwa nenyu muri omo mubiri.

⁴ Eriherukania rikengawe nabosi, negingo yabo isiyayirawa mo nyibi; kusangwa Mungu akasya tswera abamaragane nabasingiri.

⁵ Mubike engebe yenyu sibohawe nolwanzo lwesyofaranka, mubye nobuholo omobyo muri nabyo; kusangwa abiribuga ati, Sindiendisyakwibirirwa na kera kutse erikusigania.

⁶ Kikaleka itwatoka eribuga nerisika tuti, OMukama ni muwatikya wage; sindiendisiubaha; Ko mundu anganyikolaki kwehi?

Tukenge

⁷ Mwibuke abasondoli benyu, ababuga nenyu eKinywa kyo Mungu; muganiraye enduli yengebe yabo, mugerereraye eri­kirirya ryabo.

⁸ Yesu Kristo siarihinduka muligolo, na munabwire nakera nakera ikwane atya.

⁹ Simutwalawe omwi kangirirya ryemisindo-misindo neryobugeni; kusangwa ryowene omutima iniasika omo lukogo, butsira erisika omo byalya, ebiteha endundi oko bakakwamabyo.

¹⁰ Itwe tuwite aherihe rera habakakola omubiri wehema isibawite ehamuli yeririraho.

¹¹ Kusangwa emibiri yesyonyama esyo muhereri mukulu akaleta omusasi wasyo ahabuyirire mo buhere busana nebibi sikahisiribawa ekyaswa kyomuyi.

¹² Ritya Yesu mwagalwa enyuma weririmbo iniatoka erihigula abandu busana nomusasi wuwe.

¹³ Neryo tumwegaye ekyaswa kyomuyi, itunahekire eritsumwa busana naye.

¹⁴ Kusangwa eno situwite omuyi weribyaho, nikwa tusonde omuyi owakandisyasa.

¹⁵ Neryo busana naye tuhe oko Mungu endambi yosi obuhere bweripipa, ebyo ni biguma byeminywa yetu eyikapipa erina riwe.

¹⁶ Simwibirirawe erikola ebibuya nerisangira ebyo muwite nabandi, kusangwa Mungu akatsemisibawa namahere awari atya.

¹⁷ Mowe abakabasondola muyibombeke busana nabo; ku sangwa bakategaya emitima yenyu, nga bandu bakandisyaleta eriganza. Bakole batya nobutseme, butsira nobulige, kusangwa erikola no bulige siryebaletera endundi.

¹⁸ Mutusabire, kusangwa tukayiketera eribya nomulenge womutima owate nolubanza, itukasonda erikola ndeke omo myatsi yosi.

¹⁹ Ngabago nomuhwa kwilaba nyiti mutusabire inatoka erisubibwa kwinywe luba.

Omulisya mukulu

²⁰ Neryo oMungu wobuholo oyo walubukaya oko baholi Mukama wetu Yesu, oMulisya mukulu wesyombuli, busana nomusasi werilaga ryakera na kera,

²¹ abahe eribya nebyowene byosi imwatoka erikola erisonda riwe, iniakakola omwisi wenyu ebyerisimwa embere siwe, busana na Yesu Kristo; olukengerwa lubye kwiye na kera na kera. Bibye bitya.

²² Ngabalembalemba, bagala betu, nyiti mowe eKinywa kyage kyeribahana, kusangwa namabasakira myatsi mike.

²³ Mwangaminya ko mugala wetu Timoteo abiriboholwa, amasa luba nasyabalolako ituri haguma naye.

²⁴ Mumbukiraye abasondoli bosi na babuyirire bosi. Abakalwa eItalia baka babukaya.

²⁵ Olukogo lubye ninywe bosi. Bibye bitya.