AbaEbrania 12 - Nouveau Testament et Psaumes en Ndandi Version 1962

Erisuyira ryoMukama

¹ Neryo kusangwa tutimbirweko nekitu kinene kitya kyabalangiri, tuyihigule kwe bitulitohere byosi, nebibi ebikamatana netu kutsibu, tutibite neritindaluha omo matangwa owabirihirwa embere syetu,

² itunemosamalira Yesu oyo watsuka noyu kandisyabererya erikirirya ryetu, oyu wasika oko musalaba busana nobutseme wahirawa emuliro wuwe, mwapona esisoni esyo, na lino ikere oko byala byamali byekitumbi kyobwami bwoMungu.

³ Muganiraya oyo wasika omo buyigu obwabakola nabi, na ritya imutaluha kutse erioloba omo mutima.

⁴ Omo malwa nebibi simwetahika aho muta omusasi omo malwa ayo.

⁵ Kandi mwabiribirirwa erihana eryo rikabahula mo bagala kwehi? riti, Omugala wage, isiwapona erisuyira ryoMukama, Kutse siwolobe omugulu ukakungawa naye.

⁶ Kusangwa oyo oMukama anzire yakaswiraya, Nerisuyira oburi mugala oyo akakokaya.

⁷ Musike omwiswiribwa eryo. Mungu akabayira nga bagala; kusangwa mugala ni wahi oyo ise wuwe ateswiraya kwehi?

⁸ Mwamabya butsira erisuyirwa nga bandi bosi, imuri basa nenyinya isimuri bagala.

⁹ Nakandi twabya itunawite abotata wetu abe kihugo abakatusuyira netu tukakengabo. Sitwangowa kwilaba aho ise webirimu tukabyaho kwehi?

¹⁰ Kusangwa ebo mobatusuyira akatambi kake ngoko ryatsemesayabo, nikwa iye akatusuyira eritukola ndeke, itwasangira obubuyirire buwe.

¹¹ Kusangwa oko katambi ako erisuyira ryosi rikabya obulige butsira eritsemesya; enyuma waho rikayira ebiguma byobuholo byeritunganene busana nabo abakiyisibawa muryo.

Eriyihigula oko kihugo

¹² Neryo musumbe amaboko alerembire musikaye amatwi molomolo,

¹³ muyire esyonzira situganene busana nebisandu byenyu, ekilema sikitsukukale, nikwa kilamibawe.

¹⁴ Muyi tsinge eribya nobuholo oko bandu bosi, neribya nobubuyirire kandi buteko sihali mundu wasyalola oko Mukama.

¹⁵ Mulebaye sihabye omundu oyo kabula eribana olukogo lwoMungu; sihabye omurihi owerikaliha owakalasa nerileta obulige nabangi ibatsanda busana nago;

¹⁶ sihabye omusingiri kutse oyo tekenga Mungu nga Isau, owagulaya omwandu wuwe busana nekisa kiguma.

¹⁷ Kusangwa munasi enyuma kwaho mwa sonda erihabwa omuyisa womwandu, mwataligirwa, kusangwa mwatabana omwanya weribinduka, nomwana asondayago neri rira ryemisoni.

¹⁸ Kusangwa simwetahika oko kitwa ekikatulawako, noko muliro owagulumira, noko mwirimya, nekitu kikinire, noko kanyabungu,

¹⁹ noko mulenge wengubi, nomulenge webinywe abakowabyo ibagonga-gonga bati ebindi sibeswebugawa nabo.

²⁰ Kusangwa mobataluka okwowa eritegeka eryo ryahabawa riti, enyama yamatula oko kitwa ekyo iyitwa omo mabwe.

²¹ Kandi, omwatsi oyo iniakubahaya kutsibu kyaleka Musa iniabuga ati, Namatitimana neriubaha.

²² Nikwa inywe mwa birihika oko kitwa Sioni noko muyi woMungu uyuriho, ne Yerusalema yelubula, noko bamalaika abateganzika, abahindene neritsema,

²³ noko kanisa yehimbere abasakire elubula, noko mutsweri oyuri Mungu wabosi, noko birimu byabandu batu nganene ibabiriyirwa mo babuyirire,

²⁴ nuku Yesu, omu sangania werilaga rihya, noko musasi werilagalirya owakabuga nolukogo kwilaba omusasi wa Abele.

Obwami obutesukana

²⁵ Mulebaye simugane oyu kabuga. Kusangwa nibya moba tabala abagana oyo wakungabo omwihana omo kihugo, kwilaba aho sitwendisyabala twamagana oyu katukunga omwihana erilwa elubula.

²⁶ Omulenge wuwe mwatitimania e kihugo ekiro ekyo; nikwa lino abirilaga ati, Hakisiya engendo nguma inatitimania butsira e kihugo kyokyene nikwa nolubula.

²⁷ Eki nywa eki kiti, Hakisiya engendo nguma, kikahula erilusibwa ryebikatitimanibawa ngekyo kyahangikawa, ebitetoka erititi manibwa ibyatoka eribyaho.

²⁸ Neryo, erihabwa obwami obutatoka eritenganibwa, tubye newasingya, na ritya tuhe oMungu erisaba erikaligawa omwikenga nerimuswekera;

²⁹ kusangwa Mungu wetu ni muliro owakakiriraya.