AbaEbrania 10 - Nouveau Testament et Psaumes en Ndandi Version 1962

Kristo ni buhere bwetu

¹ Kusangwa ebihano biwite ekitsutsu buyira kyemyatsi yowene eyikandisyasa butsira erisosa kundukundu rye myatsi eyiriho, sibyangatoka na kera eriyira abakahika hakuhi mo babuyirire busana namahere ayo bakahera ebiro byosi oko oburi mututa.

² Bitebitya, kumbe sibetumbya eriherago kwehi? Kumbe abakukamiri beribawa engendo nguma kundu, sibangaswaminya ebibi.

³ Nikwa omo mahere aya hari eribukya ryebibi oko buri mututa.

⁴ Kusangwa siryangatokekana omu sasi wesyonume nowesyombene erilusya ebibi.

⁵ Kyaleka, omugulu Kristo ahika omo kihugo iniabuga ati, Amahere namatolere siwanzirebyo, Nikwa wabirinyikokoterya omubiri;

⁶ Mutatsema omo mahere weriokya namahere busananebibi.

⁷ Neryo monabuga nyiti, Lebaya, namasa erikola erisondaryawe uWe Mungu, Ngoko kisakire omo mukunzo wekitabu.

⁸ Omugulu abuga endata ati, Suritasonda kutse eritsemesibwa omo mahere namatolere namahere weriokibwa namahere busana nebibi (ebi bikaherawa ngebihano ko byategeka),

⁹ neryo mwatomeka kubyo ati, Lebaya, ngahika erikola ebyo wanzire. Akalusaya ebyerimbere iniatoka erihangania ebyakabiri.

¹⁰ Na busana nerisonda eryo twabirihigulwa omo buhere bwomubiri bwa Yesu Kristo engendo nguma busana na kera na kera.

¹¹ Noburi muhereri akahangana ebiro byosi oko mubiri wuwe, akahera ngendo nyingi amahere ayo, awatetoka erilusya ebibi.

¹² Nikwa omugulu Kristo amabihera obuhere buguma bwa kera na kera busana nebibi, mwikala oko byala byamali byoMungu,

¹³ eririnda omugulu esyonzigu siwe syamabihirwa omo kitumbi kyebisandu biwe.

¹⁴ Kusangwa busana nobuhere buguma abiriyirabo mo babuyirire ababirihigulwa busana nakera nakera.

¹⁵ NeKirimu Kibuyirire nakyo kikabya omu langiri wetu; kusangwa amabibuga ati,

¹⁶ Erilaga ryeri nasyalagana nabo Enyuma webiro ebyo, oMukama atya: Nasyahira ebihano byage oko mitima yabo, Nasyasakabyo oko maringikania wabo,

¹⁷ Mwaswasubira ati, Sindindisyaswibuka ebibi byabo neritindakola ndeke ryabo kandi.

¹⁸ Ahari eribuyira ryebibi, sihakiri kandi eriherera ryebibi.

Tuhike hakuhi noMungu butsira eriubaha

¹⁹ Neryo, bagala betu, kusangwa tuwite eriyiketera ryeri ingira ahabuyirire busana nomusasi wa Yesu,

²⁰ busana nenzira nyihya eyengebe eyo abirilibula busana netu omo lukimba, go mubiri wuwe,

²¹ kandi kusangwa tuwite omu hereri munene busana nenyumba yoMungu,

²² tusegere hakuhi nomutima wakwenene oguswire nerikirirya erisikire, nemitima yetu yamabilagaliribwa eriera oko mulenge mubi womutima nemibiri yetu yabirieribwa namagetsi mabuya.

²³ Tuhamba ndeke erikangania ryamaha wetu butsira eritsinga tsinga, kusangwa oyo walaga siaribirirawa;

²⁴ Tulebaya ngoko twangibukania busana nolwanzo nemibiri yowene,

²⁵ situleke erihindana haguma ngemibere yabandi, nikwa erisikania, na kwilaba ngoko mukalangira eKiro ekyo kikahika hakuhi.

Olubanza lwerisuba oko bibi

²⁶ Kusangwa twamaswakolelera ebibi itwamabibana eriminya ryekwenene, sihakiri obuhere busana nebibi kandi,

²⁷ nikwa hari amaha weriubaha ryerilindirira eritswerwa lubi, nobuka ngira bwomuliro obukandisyabuga esyonzigu.

²⁸ Omundu oyo wabiriketa ebihano byaMusa akahola butsira eriganyira okwitulago ryabalangiri babiri kutse abasatu.

²⁹ Si mwega niraya erisuyira erikalire kwilaba ritolere kwehi oko mundu oyu kapona oMugala woMungu, nerikamba omusasi oweri lagana owahigulawamo, nerihemula eKirimu kyolukogo?

³⁰ Kusangwa tunasi oyo wabuga ati, Erikisya ni ryage, nasya riha. Nakandi ati, oMukama asyatswera abandu buwe.

³¹ Ni kindu kyeriubahya erigwa omo byala byoMungu oyuriho.

Eritindasuba enyuma

³² Nikwa mwibuke ebiro byerimbere omugulu mwakoleri bawako nekyakakala ngoko mwasika omo malwa owakalire weriagalwa,

³³ oko gundi mugulu imukatsumawa embere syabandu neriagalwa, noko gundi mugulu imune nabakakolawa batya.

³⁴ Kusangwa mwabya nolukogo oko bomuliki, imukaliga nobutseme erisagulwa ebindu byenyu, imunasi ko muwite ebindi bindu byowene kwaho ebikandisyabyaho.

³⁵ Neryo simuguse eriyiketera ryenyu, eriwite oluhembo lunene.

³⁶ Ku sangwa mutolere eribya nerisika imwatoka erikola erisonda ryoMungu neribana ebyalagawa.

³⁷ Kusangwa hakisiya omugulu muke, Noyu kandisyasa iniasa isiendisyalinda;

³⁸ Nikwa oyu tunganene wage asyabyaho busana nerikirirya, Kandi amasuba enyuma, omutima wage siarimutsemera.

³⁹ Nikwa itwe situri kwabo bakasuba enyuma tukaheribwa, nikwa turi kwabo abawite erikirirya ibakabika erilama ryemi tima yabo.