2 Timoteo 3 - Nouveau Testament et Psaumes en Ndandi Version 1962

Amahano zuebiro byenyuma

¹ Nikwa uminye eki, omo biro byenyuma hasyasa emigulu yobulige.

² Kusangwa abandu basyabya bakayanza, abanzi besyofaranka, abakayipipa, abakayihalamba, abakatsuma, aba teowa ababutabo, abatesima, abatabuyirire,

³ abatianza bali kyabo, abatanzire erisangana, abakalega abandi, abateyitegaya, batsibu, abakakwa ebibuya ekiniga,

⁴ abatebya, abakaponana, abakayihamaya, abanzi beriyitsemesya butsira abanzi boMungu,

⁵ bari nomusindo werikenga Mungu nikwa bakagana akagala kuwe. Usage bandu baringabo.

⁶ Kusangwa kubo hari abakingira omo manyumba nerihamba abakali bikiru abarito herwe nebibi babirihekwa nesyongumbu syemisindo mingi

⁷ abakiga emigulu yosi sibetoka erihika okwiminya eryakwenene.

⁸ Nga Yane na Yambure abalwa na Musa, batya abandu aba bakalwa nomwatsi wakwenene, abandu boburingikania buho ndire nerikirirya ryamabihi;

⁹ nikwa sibendisyalaba aho. Kusangwa obukiru bwabo bwabiriminyikala oko bosi ngobwa bandu babiri abo ko bwabya.

¹⁰ Nikwa wabirikwama erikangirirya ryage, nemigendere yage, nerisonda ryage, nerikirirya, neririndirira, nolwanzo, neritindaluha,

¹¹ neriendereribwa ryage, neriagalwa ryage, ebyanyihikako eAntiokia, na Ikonio, neListra; eriendererya na sikamo koryabya; nikwa oMukama mwanyilamya omo gosi.

¹² Kwenene abosi abanzire erihika okwikenga Mungu omwisi waKristo Yesu basyendereribwa,

¹³ akandi abandu babi na batebya basyakola nabi kwilaba aho okwikola nabi, ibakateba kandi bakatebibawa.

¹⁴ Nikwa uwe ukwamirire ebyo wabiriiga nebyo wabirisikamo, inunasi oyo wigira byoko;

¹⁵ kandi unasi eritsuka omo bwana bwawe wabiriminya amasako abuyirire awa katoka erikwigisya amenge werilama omwikirirya omo Kristo Yesu.

¹⁶ Amasako gosi akaganiribawa noMungu kandi awite endundi busana nerikangirirya, busana nerikunga, busana neritunganania, busana neriigisya omuritunganene,

¹⁷ omundu woMungu ahikane, abye nebyosi ebitolere oburi mubiri owene.