2 Timoteo 1 - Nouveau Testament et Psaumes en Ndandi Version 1962

Erisika omo nguhi yowene

¹ Paulo, omukwenda waKristo Yesu ngerisonda ryoMungu ngerilaga ryengebe eriri omwisi wa Kristo Yesu,

² Oko Timoteo, omwana wage mwanze: Olukogo, eriganyira, nobuholo, erilwa oko Mungu Ise noko Kristo Yesu Omukama wetu.

³ Ngaha Mungu yo wasingya oyo ngakolera nomulenge womutima owene, ngoko abotata wage bakola, omugulu ngabi buka emigulu yosi omwisaba ryage.

⁴ Ngoko ngibuka emisonia yawe, ngakukwa olukando erikulolako omo kiro nomo mwisi, inatoka erisulibwa nobutseme.

⁵ Ngibukibawa erikirirya ryawe ryakwenene, erikirirya eryatsuka uku mukaka wawe Lois nuku koyo wawe Euniki, na lino, nyasi ndeke, rikere omwisi wawe.

⁶ Kikaleka inakwibukya erihuhania erihitya ryoMungu eriri omwisi wawe nerihirwa kwebyala byage;

⁷ kusangwa Mungu mwatatuha eKirimu kyeriubaha nikwa ekirimu kyobutoki nolwanzo neriyiteya.

⁸ Subye nesisoni busana neritulago ryoMukama wetu, kutse busana nage mundu womuliki wuwe, nikwa usangire eriagalwa busana nengulu yowene omo butoki bwoMungu,

⁹ oyo watulamaya atubirikira eribirikira ribuyirire, butsira busana nemibiri yetu nikwa busana nobuganirya buwe nolukogo atuha oko migulu yakera omwisi wa Kristo Yesu,

¹⁰ na lino abiri minyikalyabyo busana neributuka ryoMulamya wetu Kristo Yesu, oyo walimaya oluholo mwahulukya engebe neritindahola omo kyakakala busana nengulu yowene.

¹¹ Busana nengulu yowene eyi nahirawa mo mutuli nomukwenda nomukangirirya.

¹² Kandi busana nekyo ngagalawa nyitya, Nikwa sindi nesisoni, kusangwa nyasi oyu nyikirirye kandi nyasi ndeke kwangatoka eriteya ebyakanyibikaya erihika oko Kiro ekyo.

¹³ Ukwame olulengero lwebinywa bisikire ebyo wanyowako, omwikirirya nomo lwanzo ebiri omwisi wa Kristo Yesu;

¹⁴ utegaye omwatsi wa kwenene owabiribikibwa kuwe busana neKirimu Kibuyirire ekikere omwisi wetu.

¹⁵ Unasi ko abanyaAsia bosi babirinyitswako, kandi Figelo na Herimogene ni bakubo.

¹⁶ OMukama aganyire enyumba ya Onesiforo, kusangwa mwanyisikya engendo nyingi; mwa tabya nesisoni busana na mahulula wage,

¹⁷ nikwa abere ahika eRoma mwanyisonda-sonda nomuhwa mwanyibana—

¹⁸ oMukama amuhe eribana eriganyira oko Mukama oko Kiro ekyo—nawe unasi ndeke emibiri yosi anyikolera eEfeso.