2 Petero 3 - Nouveau Testament et Psaumes en Ndandi Version 1962

Erihika ryekiro kyoMukama

¹ Abanze, eyi ni barua ya kabiri nabiribasakira, omwibiri syosi ngabukaya oburingikania bwenyu obwekwenene eribibukya;

² mwibuke ebinywa byabugawa erimbere na baminyereri babuyirire, nekihano kyoMukama noMulamya omo bakwenda benyu.

³ Mutsuke eriminya eki, ngoko ebiro byenyuma abatenyi basyasa ibakatenya nerikwama esyongumbu syabo ebobene,

⁴ neribuga bati, Erilaga ryerihika riwe riri hahi kwehi? Kusangwa eritsuka aho abotata wetu bagotserera, emyatsi yosi ine ngoko itula okwitsuka erihangika.

⁵ Nabo bakagana omwatsi oyu nepono, ngoko busana nekinywa kyo Mungu elubula molwabyaho kera, ne kihugo mokyalwa omo magetsi nomokatikati kamagetsi,

⁶ kandi e kihugo kyomugulu oyo mokyalenga kwa magetsi mokyahera.

⁷ Nikwa busana nekinywa ekyo olubula ne kihugo ebiri lino byabiribikirwa omuliro, bibikire erihika aho ekiro kyeritswera nerihera rya bandu abatekenga Mungu.

Ekiro kiri ngemituta amagana ikumi

⁸ Nikwa abanze, simwibirirawe omwatsi muguma oyu, busa na noMukama ekiro kiguma kiringene nge mituta amagana iku mi, nemituta amagana ikumi iri nge kiro kiguma.

⁹ OMukama siari nobolo busana nerilaga riwe ngoko abandi bakaganza obolo, nikwa akalindirira busana nenyu, isianzire nomuguma akahera, nikwa akasonda abosi bahike okwibinduka.

¹⁰ Nikwa ekiro kyoMukama kyasyasa ngomurahi, noko mugulu oyo olubula lwasyahwaho nolukanda lunene, nebyahangikawa bya syakirira omo muliro we seke-seke ne kihugo nemibiri irimo byasyahisiriribwa.

¹¹ Kusangwa emyatsi eyi yosi yasyakirira itya, mwangabya bandu bomusindo wahi omo migendere yibuyirire nerikenga Mungu kwehi?

¹² erilindirira neriangu hya erihika ryekiro kyoMungu, busana nakyo olubula lwasyaka neriakirira, nebyahangikawa byasyanagukala omo muliro we seke-seke!

¹³ Nikwa ngerilaga riwe tukalindirira olubula luhyaluhya ne kihugo kihyakihya, nomwisi wabyo mwikere eritunganene.

Erilindirira ryoMukama ni lama

¹⁴ Neryo, abanze, kusangwa mukalindirira ebi, mubye nomuhwa eryeyibwa naye nobuholo, butsira ekitingu kutse obulema oko meso wuwe.

¹⁵ Kandi muganze erilinda ryo­Mukama wetu ngerilama. Ngoko mugala wetu mwanze Paulo abasakira nga menge ahabawa,

¹⁶ nomo syobarua siwe syosi akahula emyatsi eyi. Hari eyindi myatsi musyo eyikalire eriminyayo, abatasi nabatasikire bakahengemayayo ngoko baka hengemaya awandi amasako okwihera ryabo.

¹⁷ Neryo inywe abanze, kusangwa munasi ebi emuliro, muyitegaye, simuhekawe omwi tala rya bakolanabi, mukawa erilwa okwisika ryenyu.

¹⁸ Nikwa mukurire omo lukogo neriminya ryoMukama wetu noMulamya Yesu Kristo. Olukengerwa lubye luwe lino nerihika oko kiro kyerikota. Bibye bitya.