2 Petero 2 - Nouveau Testament et Psaumes en Ndandi Version 1962

Abaminyereri bamabihi

¹ Nikwa abaminyereri bamabihi mobahangana omukati-kati kabandu, ngoko hakandisyabya abakangirirya bamabihi omukati-kati kenyu abakandisingirya erikangirirya ryeriherya, ibakagana oMukama oyo wagulabo, ibayiletera erihera ryoluba.

² Kandi abangi basyakwama emitsye yabo yerisingira, kandi busana nabo enzira yekwenene yasyatsumwa.

³ Nomo ngumbu yerirumwa basyabatundya omo binywa byeriteba; eritswerwa lubi ryabo eritsuka kera siryelinda, neriheribwa ryabo siriri yato.

⁴ Kusangwa Mungu amabya imwatabalya abalaika omugulu bakola nabi, nikwa mwagusabo omo kyuna kandi mwa hirabo omo mahya gomwirimya eribikabo busana neritswerwa;

⁵ kandi mwatabalya e kihugo kyakera, nikwa mwateya Noa, omutuli weritunganene, haguma nabandi bandu barinda, omugulu aleta erigunga ryamagetsi oko kihugo kyabatekenga Mungu;

⁶ kandi mwasindula emiyi yaSodoma na Gomora mwibu mwatswerayo okwihera mwayirayo mo kisosekanio busana nabo basyabya batekenga Mungu;

⁷ Mwalamya Loti oyu tunganene, iniakakwa obulige busana nerisingira ryabakola nabi

⁸ (kusangwa omundu utunganene oyo mwikala omukati kati kabo, busana nebyo alangira neriowa mwagalwa omo mutima wuwe ekiro nekiro busana nemibiri yabo mibi),

⁹ kandi oMukama anasi erilamya abagenge okwilengwako neribika abatatunganene erihika aho asyasuyirabo oko kiro kyeritswera,

¹⁰ nikwa okwilaba abakakwama omubiri nengu mbu yesyonye nabakapona ehamuli. Ni bobulumelume neriyipipa, sibariubaha eritsuma abolukengerwa,

¹¹ nikwa abalaika, nomo balengirebo omo maka nobutoki, sibetswerabo neritsuma embere syoMukama.

¹² Nikwa aba ngesyonyama esitawite oburingikania, esyahangikawa butsira menge esika butirawa eritegwa neriitwa, bakatsuma omo myatsi batasi, basyaheribwa nerihera eryo haguma nabo,

¹³ ibakagalawa nabi busana nerikola nabi; bakaganza nga butseme erikunda omwitungi, ni bitingu nebirema, ibakatsema omwiteba ryabo, omugulu bakarira haguma nenyu.

¹⁴ Bawite ameso oswire neri singira, sibariuguta ebibi. Bakateba emitima itasikire. Bawite emitima yabiribegera erirumwa. Ni bana beritakira!

¹⁵ Babi rileka enzira itunganene babiritala; babirikwama enzira ya Balama, omugala waBeori, oyo wanza endundi yebibi,

¹⁶ nikwa akungawa oko bibi biwe; epunda itebuga moyabuga omo mulenge womundu nerikakirya obusire bwomuminyereri.

¹⁷ Ebo ni isoko site momagetsi, ni luhohe lukahekawa nekikomo kyerihunga; balindirwe nomwirimia wenyahinda.

¹⁸ Ku sangwa, eribuga binywa binene byeriyianza, bakatebaya nesyo ngumbu syomubiri syerisingira abo bakabibala okwabo bikere omwitala.

¹⁹ Bakalagabo eriyigenderya, nikwa ebo ni bakobe berihonda; kusangwa ekikakinda omundu, ikyamamuyira mo mukobe wakyo.

²⁰ Kusangwa, bamabibala esyonye sye kihugo busana neriminya ryoMukama noMulamya wetu Yesu Kristo, bamaswayigobya musyo isyaswakindabo, enduli yabo yabiribya enyibi kwilaba erimbere.

²¹ Kusangwa ryowene kubo kumbe sibaminya enzira yeritunganene kwilaba eriminyayo nerisuba enyuma erilwa oko kihano kibuyirire bahabawa.

²² Ryabirihika kubo ebyo musyo wekwenene ati, Embwa ikasubira ebisalo byayo, kandi ati engulube yabyeribwa iyaswayigalagalya omo londo.