2 AbanyaKorinto 8 - Nouveau Testament et Psaumes en Ndandi Version 1962

Erihitya

¹ Na lino, abagala betu, tukabaminyisaya olukogo loMungu olo esyokanisa syeMakedonia syahabawa,

² tuti, omwi lengwako ringi ryamalige, obutseme bwabo bungi nobwera bwabo bungi mobyatswaga oko bindu byerihitya ryabo.

³ Kusangwa ndi mulangiri ngoko bahitaya ngo butoki bwabo, na kwilaba obutoki bwabo ngoko banzire,

⁴ erituhatikana kutsibu omo mwatsi wolukogo erisangira okwiwatikya ababuyirire;

⁵ kandi butsira ngoko twaganiraya, nikwa mobatsuka eriyiha oko Mukama na kwitwe busana nerisonda ryoMungu.

⁶ Neryo kyaleka itwahatikana Tito, tuti, ngoko atsuka erimbere, neryo aberereraye olukogo olu omwisi wenyu.

⁷ Nikwa ngoko mulabirye omo myatsi yosi, omwikirirya, okwibuga, omwiminya, nomuhwa gosi nomo lwanzo lwenyu ukwitwe, neryo mwangakanya omo lukogo olu nibya.

⁸ Sindi buga omwatsi oyu omo kihano, nikwa erikangya busana nomuhwa wabandi ekwenene yolwanzo lwenyu.

⁹ Kusangwa munasi olukogo loMukama wetu Yesu Kristo, nomwanabya webindu, nikwa busana nenyu nomwatsi wenyu mwayiyira mo mwera, neryo omo bwera buwe imwatoka eribya bebindu.

¹⁰ Neryo ngaha erihana ryage nyiti: ryowene busana nenyu eriberererya ekyo mwatsuka oko mututa ahwa butsira erikola risa nikwa erisonda,

¹¹ ritya muberereraya ebyo muwite bibye ngomuhwa wenyu werisonda.

¹² Kusangwa omuhwa ama byaho, rikaligawa ngoko mundu awite, butsira ngoko atawite.

¹³ Sindibuga nyiti abandi banguhirawe nenyu mulitoherawe,

¹⁴ nikwa busana neriringirirania, ebingi byenyu ibyabya lino busana nobwaga bwabo, neryo ebingi byabo ibyabya busana nobwaga bwenyu, ihatoka eribya eriringirirana.

¹⁵ Ngoko kisakire kiti: oyo wakumakuma bingi mobitalaba kwaho; noyo wakumakuma bike mobitakeha.

Erituma Tito nabandi

¹⁶ Nikwa ewasingya ibye oko Mungu oyo kahira omuhwa oyo weribalembere omo mutima wa Tito,

¹⁷ kusangwa mwa taliga erihatikana ryetu eryo ryene, nikwa kusangwa musula nomuhwa mungi, mwayilolya eyo muri okwianza riwe.

¹⁸ Neryo twabirituma ogundi mugala wetu haguma naye oyu kasimawa nesyokanisa syosi busana neritula engulu yowene;

¹⁹ butsira ekyo ikyokyene, nikwa abirihirwa nesyokanisa erilendera netu omo mubiri oyu wolukogo ogo tukakola, busana nolukengerwa loMukama nerikangya omuhwa wetu.

²⁰ Sitwa nzire omundu akatutongo omo mwatsi oyu werihitya rinene eryo tukakola:

²¹ Kusangwa tukaganiraya emyatsi yowene butsira embere syoMukama hasa, nikwa embere syabandu.

²² Kandi tukatuma haguma nabo mugala wetu, oyo twalenga ngendo nyingi ini mundu womuhwa omo myatsi mingi, nikwa lino ari nomuhwa kwilaba busana neriyiketera inene eryo awite omwisi wenyu.

²³ Nikwa oko mwatsi wa Tito iye ni musangiri haguma nage nomukoli womubiri omo myatsi yenyu; kandi busana naba­ndi balikyetu nabo ni bakwenda besyokanisa, lo lukengerwa lwa Kristo.

²⁴ Ritya mukangayebo embere wesyokanisa, ekiminyisyo kyolwanzo lwenyu, neripipa ryetu busana nenyu.